KALAQAMA 30 - Qullaawa Maxaafa

¹ Raaheeli Yaiqoobira ooso iltinokki daafira rodoose hinaassu. Yaiqoobino, «Ila uyie; hakkuyi ka'a reemma» yitusi.

² Yaiqoobino Raaheelira hanqe, «Halaalintanni ani ila ho'late Magano lawummohe? Ila afi'rattakki gede assinohehu Maganohowe!» yiise.

³ Iseno, «Kune borojjicho'ya Biliha no; ise ila afidhuro, anino ise widoonni hige ilate ama ikkeemmana, ise adhi» yitusi.

⁴ Borojjichoseno galte ikkitannosi gede uyitusi. Yaiqoobi iseno adhe galte assi'ri.

⁵ Bilihano godobbe Yaiqoobira labbaa beetto iltusi.

⁶ Raaheelino, «Maganu coyi'rinoe; ku'lo'yano macciishshe labbaa beetto uyinoe» yite, su'ma Daani yite fushshitusi.

⁷ Raaheeli borojjicho Biliha ledde godobbe, Yaiqoobira layinkiha labbaa beetto iltusi.

⁸ Raaheelino, «Jawaata sharro rodoo'ya ledo sharrame qeeloomma» yite, su'ma Nifitaalemi yite fushshitusi.

⁹ Liyano ledde ila afidhannokkita affe, borojjichose Zilfa galte ikkitannosi gede Yaiqoobira uyitusi.

¹⁰ Zilfano Yaiqoobira labbaa beetto iltusi.

¹¹ Liyano, «Kaayyo afi'roomma» yite su'ma Gaadi yite fushshitusi.

¹² Zilfa Yaiqoobira layinkihano labbaa beetto iltusi.

¹³ Liyano, «Hagiirraame ikkoomma; meentuno, ‹Hagiirraame mancho› yaannoe» yite su'ma Aseeri yite fushshitusi.

¹⁴ Roobeeli qamade mindanni aganira loonsanniwa mare, Inkoye yinanni haqqi laalo afi're, amasi Liyara abbe uyise. Raaheelino Liyara, «Beettikki abbiheta inkoyete laalo uyie» yituse.

¹⁵ Iseno, «Ayiddaanna'ya adhoottati ajjeennahe, qolte xaano beetti'ya abbinoe inkoye adhattara kaitta?» yituse. Raaheelino, «Inkoyete laalo uyittaero techo hashsha Yaiqoobi ate ledo galara dandaanno» yituse.

¹⁶ Hatte hawarro Yaiqoobi loosuwiinni higanni hee'reennanni Liya fulte, «Beetti'ya inkoyenni baaxxoommahe daafira, techo anewa galatto» yitusi. Isino hakko hashsha ise ledo gali.

¹⁷ Maganu Liya huuccattono macciishsheenna, Yaiqoobira ontikkiha labbaa beetto iltusi.

¹⁸ Iseno, «Borojjicho'ya ayiddaanni'yara oomma daafira Maganu ba'raa'ra uyinoe» yite su'ma Yisaakoori yite fushshitusi.

¹⁹ Liya ledde godobbe Yaiqoobira leelkiha labbaa beetto iltu.

²⁰ Iseno, «Maganu dancha ba'raara uyinoe; lee labballo iloommasi daafira xaate ayiddaani'yano ayirrisannoe» yite, su'ma Zaabilooni yite fushshitusi.

²¹ Hakkunni gedensaanni meya beettono ilte su'ma Diina yite fushshituse.

²² Qoleno Maganu Raaheeli towate, huuccattoseno macciishshe, iltanno gede assise.

²³ Iseno godobbe labbaa beetto ilte, «Maganu saalunni fushshinoe» yitu.

²⁴ Qolteno, «Kaaliiqi layinkiha labbaa beetto ledoe» yite, su'ma Yooseefi yite fushshitusi.

YAIQOOBI JIRO AFI'RINO GARA

²⁵ Raaheeli Yooseefi iltuhu gedensaanni Yaiqoobi Laabara, «Xaate ilamoommo gobba ha'reemmo gede assie.

²⁶ Lamunku seennikki daafira yee ikke daafuroommota afoottona, insanna ooso'ya adhe ha'reemmona uyie» yii.

²⁷ Laabano, «Kaaliiqi ate widoonni hige maassi'rinoeta kulotenni afoommona, ballo anewa hee'ri.

²⁸ Daafurikkira eemmohere kulie» yiisi.

²⁹ Yaiqoobino, «Ikke soqqamoommohe garanna ani allaalanna saadakki hiitto ikkite qalantinoro afootto.

³⁰ Ani daammora albaanni shiima saadalla noohe; techo kayinni lowo geeshsha batidhinohe; ane daanni Kaaliiqi maassi'rinohe; xaate ani mini'yara loosi'ra hasiissannoe» yiisi.

³¹ Laabano, «Maahoyyena, maricho ooheyya?» yee xa'misi. Yaiqoobino, «Anera woxe uyitootie; ani yeemmoheha mitto coye assittoero, galagale hooffille saadakki allaaleemmo.

³² Techo hooffille saadakki giddora e"e ge'reewikki giddonni kolishsho, hacaranna burroota, meikki giddonnino eleellaammanna burroota badeemmo; kuri daafuri'ya waagira ikkona.

³³ Kunni garinni ammanama'ya albillittete leeltanno; daafuri'ya waaga la"attora daatto woyite, burroota woy eleellaamma ikkinokki me"e afittoro, qoleno koliddaanna ikkinokki ge'reewo afittoro, moorame dayinoho yaate» yiisi.

³⁴ Laabano, «Maahoyye yootto gede ikkona» yii.

³⁵ Ikkollana hakko barra, burroota meu goccanna eleellaamma goodanna hacara, burrootanna koliddaanna ge'reewo bade oososi allaaltanno gede assi.

³⁶ Hakkunni gedensaanni Laaba hooffille saadasi ga'ne 3 barri doogo Yaiqoobiwiinni fafe ha'ri. Yaiqoobino gattinota Laaba saada allaalanni keeshshi.

³⁷ Yaiqoobino gowacho, daanshichonna dhoqonote siqquwa fushshi're, siqquwate goga sholoole borreesse seekki.

³⁸ Borreesse seekkino siqquwano saada waa aggara dagganno woyite la'anno gede waa toonkanni badiri giddo wori. Saada waa aggara dagganno yannara,

³⁹ siqquwa la'anni gocca uurritu; hakkunni gedensaanni, gocca haa're burroota, muraamurrootanna eleellaamma wilii'le qali.

⁴⁰ Yaiqoobi konne wilii'le addinni badi; gattinore kayinni muraamurrootanna koliddaanna Laaba saadara albaanni uurrisi; kunni garinni umisi saada haammachiishi're Laabatewiinni badi.

⁴¹ Illete biifinorinna misinori gocca uurranno woyite, Yaiqoobi siqquwa albansaanni noo badiri giddo woranno; kunni garinni siqquwate mule hee're gocca haa'ranno.

⁴² Shottino saadara albaanni kayinni siqquwa diworino; kunni garinni shottino saada Laabata ikkitanna jawaata kayinni Yaiqoobita ikkitu.

⁴³ Yaiqoobino lowo geeshsha dureessa ikki; lowo me"e, ge'reewo, gaalanna harre, hattono labbaanna meya borojjeno afi'ri.