KALAQAMA 29 - Qullaawa Maxaafa

YAIQOOBI LAABA MINIRA IILLI

¹ Yaiqoobi kae soojjaati gobba ha'ri.

² Hakkiira iillanni hee're xawoho mitte wayi bue afi; sase hoshsha hooffille saadati buete gaangaawira no; tini saadano waa tenne buenni agganno; bueteno lowo kincho tu'nanni.

³ Hooffille saada baalanti hakkiicho gamba yituhu gedensaanni allaalaasine kincho gongo'mishshe hoolte waa hayikkissanno; saadansa hayikkisidhuhu gedensaanni kayinni kincho dawarte balete tu'anno.

⁴ Yaiqoobino allaalaasine, «Ayidde'ya, ki'ne hiikkiinni dagginoonnireeti?» yee xa'minsa. Insano, «Ninke Kaaraaninni dangoommoreeti» yite dawartusi.

⁵ Isino, «Naakoori beetti beetto Laaba egentinoonni?» yee xa'minsa. Insano, «Ee egenninoommo» yitu.

⁶ Isino qole, «Isi keere no?» yee xa'mi. Insano, «Ee keereholla; beettosi Raaheelino kuu"uneeti, ge'reewo haadhe dagganni no» yitu.

⁷ Yaiqoobino, «Yanna barraati; saada minira qo'litinanni yanna di"iillitino; waa hayikkissine ka'ine massitine mayira diallaaltinanni?» yiino.

⁸ Insano, «Allaalaasine baalanti saadansa adhite dagga geeshsha mittoreno assine dianfeemmo; baalunku daggeenna kincho kaa'lamme hoolle saada hayikkisi'neemmo» yitusi.

⁹ Isi insa ledo hasaawanni hee'reenna Raaheeli anniseta hooffille saada haadhe hakkiira daggu; iseno hooffille saada allaaltanno.

¹⁰ Yaiqoobino amasi rodiita Laaba beetto Raaheelinna hooffille saadasi afi yannara shiqqi yee, buete afiinni kincho hoole waa hayikkisinsa.

¹¹ Raaheelino sunqe, hagiidhino daafira wi'le qo'la hoogi.

¹² Hakkunni gedensaanni Raaheelira, «Ani annikki fiixaati; Ribiqa beettooti» yiise. Iseno doddanni hadhe konne coye annisera kultu.

¹³ Laabano rodoosi beettiha Yaiqoobi duduwo macciishshe haa'rasira rahe mari; hanqafe sunqisihu gedensaanni, minisira haa're ha'risi. Yaiqoobino baalanka coye Laabara hasaawi.

¹⁴ Laabano, «Halaalinta ati maala'yaatinna mundee'yaati» yiisi. Yaiqoobino mittu agani geeshsha abbisi ledo hee'ri.

YAIQOOBI RAAHEELINNA LIYA DAAFIRA LAABARA SOQQAMI

¹⁵ Laaba Yaiqoobi, «Ate fiixa'yaati yee calla soqqamie diyeemmo; kunnira daafurikkira maricho eemmohero kulie» yiisi.

¹⁶ Laabara lamu seenni noosi; bayirate su'mi Liyaati; maa'nete su'mi Raaheeliiti.

¹⁷ Liya ille shiimate; Raaheeli kayinni dana xumate; albano biifadote.

¹⁸ Yaiqoobi Raaheeli lowo geeshsha baxino daafira, «Raaheeli uyittoero 7 diro soqqameemmohe» yii.

¹⁹ Laabano, «Woleho aammonkunni atera uummohero woyyannona, ane ledo hee'ri» yii.

²⁰ Yaiqoobino Raaheeli daafira 7 diro soqqami; ise baxino daafira 7 diri shiima barra ikkisi.

²¹ Yaiqoobi Laabara, «Coyi'rammoommo yanna gooffinona, xaate beetto uyie» yiisi.

²² Laabano jila jile aanino manna baala woshshi.

²³ Hashshita Laaba beettosi Liya haa're Yaiqoobira uyi; Yaiqoobino adhe galtesi assi'ri.

²⁴ Laaba beettosi Liyara borojjichosi Zilfa soqqantannose gede uyise.

²⁵ Soodo la'nanni woyite ise hada Liyaati; Yaiqoobi Laabara, «Togo mayira assittoe? Soqqamoommohehu Raaheeli daafiraati; mayira dogittoeyya?» yiisi.

²⁶ Laabano, «Gobbankera bayira heedheenna maa'ne aa bude di"ikkino.

²⁷ Konne 7 barra agari; qolte wole 7 diro soqqamittoero Raaheelino eemmohe» yiisi.

²⁸ Yaiqoobino kunni coyira sumuu yii; Liya ledo 7 barra keeshshihu gedensaanni Laaba Raaheelino Yaiqoobira uyisi.

²⁹ Raaheelira soqqantannose gede Biliha yinanni borojjicho uyise.

³⁰ Yaiqoobi Raaheelino adhe galtesi assi'ri. Raaheeli Liyanni roorse baxise; hakkunni gedensaannino Laabara 7 diro lede soqqami.

YAIQOOBIRA OOSO ILANTUSI

³¹ Yaiqoobi Liya naadinosekkita afe Kaaliiqi, iltanno gede assise. Raaheeli kayinni gaanate.

³² Liya godobbe labbaa beetto ilte, «Kaaliiqi qarra'ya laino; kunni ka'a ayiddaanni'yano baxannoe» yite su'ma Roobeeli yite fushshitu.

³³ Xaano godobbe labbaa beetto ilte, «Naandoonniekkita macciishshe Kaaliiqi konne ledinoe» yite su'ma Simiooni yite fushshitusi.

³⁴ Xaano godobbe labbaa beetto ilte, «Xaano ayiddaanni'ya anewa gamba yaanno» yite su'ma Leewi yite fushshitusi.

³⁵ Xaano godobbe labbaa beetto ilte, «Xaa woyite Kaaliiqa galaxxeemma» yite su'ma Yihuda yite fushshitusi. Hakkunni gedensaanni ila uurritu.