KALAQAMA 25 - Qullaawa Maxaafa

WOLOOTA ABIRIHAAMI SIRCHO

¹ Abirihaami Kexura yinannita wole galte adhi.

² Iseno Zimiraani, Yoqishaani, Medaani, Midiyaami, Yushibaaqinna Shuhaani yinanni ooso iltusi.

³ Yoqishaani, Saabanna Dedaani ili; Dedaani sirchi Ashuurootaho, Lexushootahonna Leaamootaho.

⁴ Midiyaami oosono Eefa, Efeeri, Hanooki, Abidaatinna Elida"aati. Kuri baalunku Kexura godowaati.

⁵ Abirihaami noosi jiro baala Yisihaaqira ragisiisi.

⁶ Wolu meenti ilinosi oosorano lubbotenni hee're mitore uyinsahu gedensaanni wole ooso Yisihaaqiwiinni faffe soojjaato higge hadhe heedhanno gede assinsa.

ABIRIHAAMI REYO

⁷ Abirihaami mitteenni 175 diro hee'rino.

⁸ Kunni garinni Abirihaami diro duuwe mannu aalo ikki.

⁹ Oososi Yisihaaqinna Ismaeeli Makiphela godira madaartusi; kuni godi Memirera soojjaatoonni Hitichu Tsohaari beetti Efirooni gobbara nooho.

¹⁰ Hakkonne darga Abirihaami Hitootuwiinni waammate yee hidhino; Abirihaamino galtesi Saara madaarroonni godira madaarroonnisi.

¹¹ Abirihaami reyihu gedensaanni beettosi Yisihaaqi Maganu maassi'risi. Yisihaaqi Bieeri Lahayi Rooi mule hee'rino.

ISMAEELI SIRCHO

¹² Saara borojjicho Gibitsitte Aggaara Abirihaamira iltinosihu Ismaeeli,

¹³ ilino ooso dirinsa garinni aante noote: Nebayooti, Qeedaari, Adibieeli, Mibisaami,

¹⁴ Mishimai, Duma, Maasa,

¹⁵ Hadaadi, Teema, Yixuuri, Nafiishiitinna Qedimaati.

¹⁶ Kuri Ismaeeli ooso 12 ga'rera akaakkate; su'mansano heedhino katammanninna darguwanni woshshinanni.

¹⁷ Ismaeeli 137 diro ikkisita reyi.

¹⁸ Ismaeeli sirchi Gibitsete soojjaatoonni Asoori massitanno farora Hawiilanna Beshuuri mereero hee'ranno; insano wolu Abirihaami sirchi baaluwiinni faffe heedhino.

EESAWUNNA YAIQOOBI ILAMA

¹⁹ Abirihaami beetti Yisihaaqi ilama aante noote: Yisihaaqi Abirihaamiho.

²⁰ Yisihaaqi Beetueeli beetto Ribiqa 40 dirihu hee're adhino; Ribiqa anni Beetueelinna rodiise Laaba Sooriyu mannaati; heedhannohuno Mesiphexoomiyahooti.

²¹ Ribiqa ila keeshshiteenna Yisihaaqi ise daafira Kaaliiqa huucci'ri; Kaaliiqino huuccattosi macciishsheenna Ribiqa godobbu.

²² Ribiqa godobbinohu lakkuwu giddose hee're mimmito xiiwi; iseno, «Kuni coyi mayira ikkie?» yite Kaaliiqa huuccidhu.

²³ Kaaliiqino, «Godowikki giddo nooti 2 gosaati; mimmitoho sumuu yitannokkire 2 gosa ilatta; mittu ko'onne roore jawaata ikkanno; bayiru maa'neho soqqamaancho ikkanno» yiise.

²⁴ Iseno yanna iillituta 2 labballi ooso iltu.

²⁵ Umi beetti dana biishshaho; bisono baancaamoho; kunnira Eesawu yinisi.

²⁶ Layinkihu ilami woyite bayiriidihu ginde amade fulino; kunnira Yaiqoobi yini; Ribiqa ooso iltu yannara Yisihaaqira 60 diro ikke noosi.

EESAWU BAYIRROONYESI HIRI

²⁷ Oosono lophitu; Eesawu dubboho hosannoha egennamino ugaaxaancho ikki; Yaiqoobi kayinni wodanaamoho; qaetella hosanno.

²⁸ Eesawu ugaaxe abbino maala itisannosi daafira Yisihaaqi iso baxanno; Ribiqa kayinni Yaiqoobi baxxanno.

²⁹ Mitto barra Yaiqoobi duume missiru woxi gananni hee'reenna Eesawu ugaaxetewiinni dayi; lowo geeshsha hudi're noo daafira,

³⁰ «Hude shituena rakke tenne duume woxi iteemmona uyie» yiisi. Su'masi Edoomi yinoonnihu kunni daafiraati.

³¹ Yaiqoobino, «Balaxxe bayirroonyekki uyiexa» yiisi.

³² Eesawuno, «Ani reyanni hee're bayirroonye ma"assi'reemmosi?» yii.

³³ Yaiqoobino, «Hanni maahoyyena, ‹Bayirroonye oommohe› yite xaariexa» yiisi. Eesawuno bayirroonyesi xaare Yaiqoobira hire aguri.

³⁴ Yaiqoobino Eesawura buddeenanna missiru woxi uyisi; Eesawuno itenna age kae ha'ri; kunni garinni Eesawu bayirroonyesi mulla gede asse aguri.