KALAQAMA 24 - Qullaawa Maxaafa

YISIHAAQINNA RIBIQA ADHAMA

¹ Abirihaamino lowo geeshsha geedhi; Kaaliiqino baalunku coyinni maassi'rinosi.

² Mitto barra Abirihaami, jajjisi baalaho annimma uyineenna minesi lowo yanna soqqamanni hee'rinoha soqqamaanchosi, «Angakki giwoodi'ya aana worte xaarie.

^3-4 Beetti'yara Yisihaaqira seenne gobba'yanninna fiixi'yawiinni marte haa'rattosita ikkinnina, ledonsa hee'reemmo Kana"aanooti seenne haa'rattosikki gede, gordunna baattote Magani Kaaliiqi su'minni xaarsiiseemmohe» yiisi.

⁵ Soqqamaanchuno, «Miteekke hatte gobba seenni ane ledo kawiira daa giwiro beettokki galagalche ati dayotto gobba haa're ha'roni?» yee xa'mi.

⁶ Abirihaami qole, «Beetto'ya galagalchite haadhe ha'rattokki gede qorophi;

⁷ anni'ya mininninna ilamoommo gobbanni fushshe, ‹Tenne baatto sirchikkira eemmo› yee kulinoehunna xaarinoehu gordu Magani Kaaliiqi, sokkaasinchosi alba qole soyannohena, atino marte hakkiinni beetti'yara seenne haa'risi.

⁸ Beetto ledokki daa gibbuha ikkiro kayinni, xaarsiisoommohe xaaro diamaddannohe; beetto'yalla hakkiira qoltooti» yiisi.

⁹ Soqqamaanchuno mootichisi Abirihaami giwoodira woroonni anga wore xaari.

¹⁰ Hakkunni gedensaanni mootichisi gaalla giddonni 10 haa're, uduunnisi giddonnino uyinanniha seyino uduunne doore haa're, Mesiphexoomiya Naakoori hee'ranno katama ha'ri.

¹¹ Hakkiira iilli yannara gaalla katamaho gobbaanni noo bale wayinnite mule guluphite fooliishshidhanno gede assi.

¹² Qoleno, «Mootichi'ya Abirihaami Magano Kaaliiqa! Huucci'reemmohe; mooticha'ya Abirihaami bagamannokki baxillikkinni laisi; anerano techo haja'ya qineessie.

¹³ Kuneeti, ani tenne wayi bale mule uurre noommo; kunni katami seenni waa dirri'rara daanno.

¹⁴ Insa giddonni mitticho, ‹Waa ageemmona gambayichokki heeshshi assie› yeenna, ‹Atino agi; gaallakkirano hayikkisi'ri› yitannoe beetto, soqqamaanchikki Yisihaaqira qixxeessoottota ikkito; mootichi'yara eloottota tennenni afeemmo» yee huucci'ri.

¹⁵ Huuccattosi gudikkinni, Milka iltinoti Beetueeli beetto Ribiqa gambayicho bayidhe daggu; Milkano Abirihaami rodii Naakoori galteeti.

¹⁶ Beettono lowo geeshsha xumate; labbaahunni xaaddinokki seemooti; iseno wayi balewa dagge gambayichoho waa wonshidhe fultu.

¹⁷ Soqqamaanchuno isewa rahe mare, «Gambayichikkinni ballo shiima waa hayikkisie» yee huucci'ri.

¹⁸ Iseno, «Maahoyyena mooticha'ya agisi» yite, gambayichono rakke badhetenni dirrisse waa hayikkissusi.

¹⁹ Isira hayikkissusihu gedensaanni, «Gaallakkirano duubba geeshsha waa tooheemma» yitu.

²⁰ Waano rakke gambayichunni saada agganno badirira galchite, marro marro higge hinkiiltanni gaalla duubba geeshsha tookku.

²¹ Manchu mittoreno coyi'rannokkiha, Kaaliiqi hajasi wonshannoronna hoogannoro afate sammi yee assitannore lai.

²² Gaalla agge ka'uhu gedensaanni, manchu beettote 5 giraame geeshsha ikkannoha culku butichanna 2 gume fushshe anga wore,

²³ «Hanni ballo kulie; ati ayete? Mine'ne gallanniwi nooni?» yee xa'mise.

²⁴ Iseno, «Ani Beetueeli beettooti; Beetueelino Milka Naakoorira iltinoho.

²⁵ Minenke galtinanniwi hee'ranno; gaallateno ikkanno geeshshi galawinna birqooshu no» yitusi.

²⁶ Manchuno umo heeshshi yee Kaaliiqira kumbuule,

²⁷ «Mooticha'ya ammanamasinninna bagamannokki baxillisinni towatinohu mootichi'ya Abirihaami Magani Kaaliiqi galatamo» yii.

²⁸ Beettono doddanni marte, amaseranna amase ledo noorira konne coye kultu.

²⁹ Ribiqara Laaba yinanni rodii noose; isino Abirihaami soqqamaanchi noowa wayi balewa dodanni mari.

³⁰ Laaba manchunniwa marinohu rodoosi wodhitino butichanna gume afinohuraatinna manchu yiinosere macciishshino daafiraati; maranno woyite manchu wayi bale mule gaallasiwa uurre no.

³¹ Laabano, «Ati Kaaliiqi maassi'rinohehu amo minira ha'nona; konne gobba mayira uurratto? Mine ateranna gaallakkirano qixxaawino dargi no» yiisi.

³² Manchuno ledosi minira ha'ri; Laabano gaallasira hogowo tire, galawanna birqoosha shiqishi; Abirihaami soqqamaanchiranna ledosi noorira lekka hayishshidhanno waa uyinsa.

³³ Sagale haa'ne abbinita manchu, «Dayommo haja hasaawummokkinni di"iteemmo» yii. Laabano, «Maahoyyena hasaawissiyya» yiisi.

³⁴ Manchuno, «Ani Abirihaami soqqamaanchooti;

³⁵ Kaaliiqi mooticha'ya lowo geeshsha maassi're ayirrado assinosi; ge'reewonna lalo, birra, culka, meyanna labbaa borojje, gaalanna harre baala uyinosi.

³⁶ Mootichi'ya galte Saara geedhimmate yannara isira labbaa beetto iltinosi; isino noosire baalanka kunni beettira ragisiisino.

³⁷ Mootichi'ya aneno, ‹Ani hee'reemmotenni Kana"aanootu gobbanni beetti'yara seenne haadhootina,

³⁸ ilamoommo gobba fiixi'yawa hadhe seenne hakkiinni haa'risi› yee xaarsiisinoe.

³⁹ Anino, ‹Miteekke hatte gobba seenni kawiira daa giwiro hiissoyya?› yoommo.

⁴⁰ Isi qole, ‹Ledosi qaafeemmohu Kaaliiqi sokkaasinchosi ledokki soyanno; maratto hajano qineessannohe; atino anni'ya ilama giddonninna fiixi'ya mereerinni beetti'yara seenne haa'risi.

⁴¹ Ati fiixi'yawa hadheenna insa seenne aa gibbuhero calla xaarotenni gatatto› yiinoe.

⁴² «Anino techo wayi balewa daye, ‹Mootichi'ya Abirihaami Magano Kaaliiqa! Haja'ya qineessie;

⁴³ waa hinkii'litara dagganno beetto waa hayikkisie› yeenna,

⁴⁴ ‹Atino agi; gaallakkino tooheemma› yitannoti Kaaliiqi mootichi'ya beettira qixxeessinota ikkito» yee huucci'roommo.

⁴⁵ «Anino huuccatto'ya gudummokkinni, Ribiqa gambayicho adhite daggino; wayi balewa dagge waa hinkii'lite ka'eenna ani, ‹Hanni ballo waa hayikkisie› yoommo.

⁴⁶ «Iseno rakke gambayicho badhesenni dirrisse, ‹Atino agi; gaallakkirano hayikkiseemma› yitinoe. Anino agoommo; gaalla'yarano hayikkissino.

⁴⁷ «Hakkunni gedensaanni, ‹Ati ayete?› yee xa'moommose; iseno, ‹Ani Beetueeli beettooti; Beetueelino Milka Naakoorira iltinoho› yitino. Anino maccasera buticha, angaserano gume woroommo.

⁴⁸ «Hakkunni gedensaanni mootichi'ya beettira galte ikkitanno beetto afi'reemmowa mootichi'ya rodii minira haa're massinoe Kaaliiqira heeshshi yee kumbuuloommo; mootichi'ya Abirihaami Magano Kaaliiqa galaxxoommo.

⁴⁹ Xa ki'ne mootichi'yara eltinannironna hoogginanniro kulle"e; ‹Dee'ni› yitiniro kayinni ikkeemmota ma'leemmo» yii.

⁵⁰ Laabanna Beetueeli, «Kuni coyi Kaaliiqiwiinni dayinoha ikkino daafira, kawiinni sa'ne yine anfeemmori dino.

⁵¹ Ribiqa kuneetina adhite ha'ri; Kaaliiqi coyi'rinonte gede mootichikki beettira galte ikkitona» yitusi.

⁵² Abirihaami soqqamaanchi yitinota macciishshe, baattote aana heeshshi yee Kaaliiqira kumbuuli.

⁵³ Qoleno birrunna culku irra imaanano fushshe Ribiqara uyise; rodiiseranna amaserano ayirrado uduunne uyinsa.

⁵⁴ Hakkunni gedensaanni Abirihaami soqqamaanchinna ledosi noori sagale itte agge hakko galtu. Abirihaami soqqamaanchino soodo gute kae, «Xaate mootichi'yawa ha'reemmona fajje"e» yiinsa.

⁵⁵ Rodiisenna amase, «Beetto 10 barri geeshshano ikkiro ninkewa keeshshitona; hakkunni gedensaanni ledokki hadhannona» yitusi.

⁵⁶ Soqqamaanchuno, «Kaaliiqi haja'ya wonshinoena keeshshiishshinoonte"e; rahe mootichi'yawa ha'reemmona agurre"e» yiinsa.

⁵⁷ Insano, «Hanni agarixa, beetto woshshine yitannore anfeemmona» yitu.

⁵⁸ Iseno woshshite, «Kunni manchi ledo ha'ra baxattani?» yite xa'mituse. Iseno, «Ee ha'reemma» yite dawartu.

⁵⁹ Insano Ribiqa awuutte lossitinose mancho ledo worte Abirihaami soqqamaanchinna ledosi manni ledo hadhanno gede assituse.

⁶⁰ Ribiqano, «Ati rodoonke, lowo kumi manni ama ikki; ati ilatta sirchino diinnansa katamma ragi'ro» yite maassidhuse.

⁶¹ Hakkunni gedensaanni Ribiqa soqqamannose meenti ledo hadhara ka'u; gaalla gulufe Abirihaami soqqamaanchi ledo ha'ri; soqqamaanchuno kunni garinni Ribiqa haa're ha'ri.

⁶² Hatte yannara Yisihaaqi Bieeri Lahayi Rooi woy La"annoehu Heeshshote Magani yinanni buewa halalla Negebi mare no.

⁶³ Isino hawarro yannara wodanunni malanni xawoho ka'anna kawa ha'ramanni hee're, wido qole la"anno woyite, gaalla dagganni noota afi.

⁶⁴ Ribiqano widira qolte la'e Yisihaaqi affu; gaalu aaninni dirrite,

⁶⁵ «Kuu"u xawoho ninkewa hige daanni noohu ayeti?» yite Abirihaami soqqamaancho xa'mitu. Isino, «Mooticha'yaati» yee dawarise. Ribiqano rakke uddanotenni umo guggu'litu.

⁶⁶ Soqqamaanchuno baalanka coye Yisihaaqira kulisi.

⁶⁷ Yisihaaqino Ribiqa haa're amasi Saara dukkani giddora massi'ri; iseno adhe galtesi assi'ri; Yisihaaqi Ribiqa baxise; amasi reyora manchitino manchitano hawi.