KALAQAMA 19 - Qullaawa Maxaafa

SODDOOMU CUBBO

¹ Lamenti sokkaasine hatte hawarro Soddooma e'u; Looxino Soddoomu Katami waalchira ofolle no. Isino insa afe haa'ransara kai; alba hige gombisame keere haa'ri.

² Qoleno, «Mootoolle'ya ballo! Ane borojjichi'ne minira ka'e; lekkano hayishshineenna'ne galtine, ga'a soodo guttine doogo'ne hadhinannina» yiinsa. Insano, «Dee'ni, konne gudumaaleholla galleemmo» yitu.

³ Isi kayinni lowo geeshsha huuccinonsa daafira, ledosi minisira hadhu; isino dancha sagale worsiisinsa; shiishinokki timano gasiiseennansa ittu.

⁴ Wosinu goxikkinni hee'reenna hakko katami manni, aju akkali gatikkinni baalunku daye Looxi mine gaangeessi.

⁵ Looxino woshshe, «Wona hawarro minikkira dayi manni hiikki? Insa ledo gonxeemmona gobbara fushshinke» yitusi.

⁶ Looxi kayinni insawa nafarira fule, waalcho gobbaanni cufi.

⁷ Insarano, «Manna'ya ballo! Konne busha coye assitinoonte.

⁸ Kune labbaahunni xaade egenninokkiri 2 seenni nooena, insa gobbara fushsheenna'ne, baxxinita assidhe; mini'yara eino wosini aana kayinni mittoreno assitinoontena agurre» yiinsa.

⁹ Insano, «Ka'a higi!» yitusi. Qolteno, «Ati diwole gobbanni dayottoho? Assineemmore ati kulattonke? Giwittoro insa aana assinammora hendoommohunni roore, ate aana busha coye assineemmo» yitusi. Kunni garinni Looxi xiibbe tugge waalcho hiiqqitara ka'u.

¹⁰ Mine noori lamunku wosini hiixatte Looxi goshooshshe insawa minira eessite waalcho cuffu.

¹¹ Hakkunni gedensaanni, gobbaanni noo manna aja akkala baalanka ille ballisseenna waalchu noowa hasse hooggu.

LOOXI SODDOOMA AGURE FULI

^12-13 Lamunku wosini Looxira, «Konne atera ooso, seennu, balluwu woy wolu fiixi nooheni? Konne katama hunnammoraatina, fiixu noohero rakke fushshi'ri. Kunni manni bunshenni kainohunni raaranno manni raare batidhinota Kaaliiqi macciishshe, Soddooma hunnammora soyinonke» yitusi.

¹⁴ Looxino fule seennesi huuccidhinore, «Kaaliiqi konne katama hunaraatina, ka'e rakkine kawiinni fulle» yee kulinsa. Insara kayinni haariimanni nooha lawinonsa.

¹⁵ Duu'mo saaqquta sokkaasine Looxi, «Katamu ba"anno woyite ledo ba"attokki gede kai; ayiddaamakkinna lamenta seennekki haadhe fuli» yite mudditusi.

¹⁶ Isi kayinni keeshsheenna, Kaaliiqi mararinosi daafira sokkaasine iso, galtesinna lamenta seennesi anga amadde katamu gobbaanni fushshitanno gede assi.

¹⁷ Haadhe xawo fushshitunsahu gedensaanni mittichu, «Umokki gatisi; badhera higge la'ooti; kunni lagichirano uurritooti; ba"attokki gede ilaalu widira higge xooqi» yiisi.

¹⁸ Looxino, «Mootoolle'ya ballo! Hatto assitinoonte"e.

¹⁹ Ane soqqamaancho'ne baxxine lubbo'ya gatisate lowo galata assitinoonnie; ikkollana bao daggannoe yee waajjoommo daafira hakko ilaaliwa xooqe gata didandeemmo.

²⁰ Kuneeti kuni katami xooqe fulate mule no; isino shiima katamaati; lubbo'ya gatisi'reemmo gede hakkiira xooqeemmona agurre"e; isi shiima katamaati» yiinsa.

²¹ Mittu sokkaasinchi, «Maahoyye yoottota haa'roommo; konne ati yaatto katama dihuneemmo.

²² Rakke hakkiira fulte ha'ri; hakkiichira iillatto geeshsha mittorichono diasseemmo» yiisi. Kunnira, hakko katami su'ma Zooaari yini.

SODDOOMUNNA GOMOORU BAO

²³ Looxi Zooaari iillita arrishsho fultu.

²⁴ Kaaliiqi Soddoomunna Gomooru aana gordunni giiranna ruqano dirrisi.

²⁵ Hatte katamma, hakko lagichira noore baala, katammate heedhannorenna baattote mu'ra baalanka gudi.

²⁶ Looxi galteno badhera higge la'e, maxinete sooddicha ikkite gattu.

²⁷ Abirihaamino soodo gute kae, Kaaliiqi ledo hasaawi darga mari.

²⁸ Soddoomunna Gomoora gobbara noo lagicha woro qole la"anno woyite, hattenne gobba baalantera wiliile dolunnite gede ikkite ka'anna lai.

²⁹ Maganu Looxi hee'rannota lagaho noo katamma huni yannara Abirihaami qaagi. Kunnira Looxi hattenne bao mereerinni haa're fushshisi.

MOAABOOTUNNA AMOONOOTU SIRCHI DAYINO GARA

³⁰ Looxi Zooaari hee'ra waajjinohura hakkiinni fule, seennisi ledo gaaru aana noo godi giddo hee'ri.

³¹ Mitto barra bayiriiditi maa'nete, «Anninkeno geedhino; sircho sa'neemmo gedeno adhannonkehu labbaahu gobbate aana dinona,

³² amo anninkera woyinete xajje hayikkinse, ledosi gonxe isinni sircho sa'nona» yitu.

³³ Hakko hashshanni anninsara woyinete xajje hayikkise dimbisisi; bayiriiditi e'e annise ledo goxxu; isi kayinni goxxannanna ka'anna diafino.

³⁴ Layinki barrano bayiriiditi maa'nete, «Ankarro ani anni'ya ledo goxoomma; techo hashshano woyinete xajje hayikkinseenna, atino e'e ledosi goxi; kunni garinni sircho sa'neemmo» yituse.

³⁵ Layinki hashshano anninsara lede woyinete xajje hayikkise dimbisisi; maa'niiditino e'e ledosi goxxu; ise goxxannanna ka'annano diafino.

³⁶ Kunni garinni lamenti seenni anninsara Looxira godowi.

³⁷ Bayira labbaa beetto iltu; su'mano Moaabi yite fushshitusi; isi techo geeshsha Moaabootu annaati.

³⁸ Maa'neno qolte labbaa beetto iltu; su'mano Beeni-Aami yite fushshitusi. Isino techo geeshsha Amoonootu annaati.