KALAQAMA 13 - Qullaawa Maxaafa

ABIRAAMINNA LOOXI BABBAXXITU

¹ Abiraami galtesinna noosi jajja baalanka adhe Gibitsetenni fule Negebi ha'ri; Looxino ledosi ha'ri.

² Abiraami saada, birranna culka afi'ratenni lowo geeshsha dureessa manchooti.

³ Negebinni kae, dargunni darga sa"anni Beeteli mari; Beetelinna Gayi mereero noo darga iilli; kuni dargi kunni albaanni dukka'ne ofollinowaatinna,

⁴ kakkalote darga seekkinowaati. Hakkiichono Kaaliiqiha qullaawa su'ma gane magansi'ri.

⁵ Abiraami ledo ha'ranni noohura Looxira ge'reewu, meu, lalu, dukkanna, umisi maatenna soqqamaasine noosi.

⁶ Abiraamiranna Looxira lowoti saadate hoshsha noonsahuranna hosiisidhanno dargi ruukkinonsahura mitteenni heedhara didandiitino.

⁷ Kunninni kainohunni Abiraami allaalaasinenna Looxi allaalaasine mereero gibbo kalaqantu; hatte yannara hattenne gobbara heedhannori Kana"aanootahonna Ferizootaho.

⁸ Hakkunni gedensaanni Abiraami Looxira, «Ninke roduuwaho; anenna ate mereero, allaalaasine'yanna allaalaasinekki mereero gibbo ka"a dihasiissanno.

⁹ Kunni daafira, badamme hee'nummoro woyyanno; baattotenni hasi'ritto widiido doodhi; ati gura widiido adhittoro, ani qiniitira hige ha'reemmo; ati qiniiti widiido adhittoro, ani gura widira hige ha'reemmo» yiisi.

¹⁰ Looxi la"anno woyite, Yordaanoosi Lagi gaangaawira noo gobba baala wayi wo'minota ikkase afi; Kaaliiqi Soddoomanna Gomoora hunara albaanni, Zooaari geeshsha, gobba Kaaliiqi Gannate gede Gibitsete Laga labbannote.

¹¹ Kunnira, Looxi Yordaanoosi gaangaawira noo gobba baala doodhe, soojjaatira hige ha'ri; kunni garinni mimmitinsawiinni baxxitu.

¹² Abiraami Kana"aani Baattora hee'ri; Looxi kayinni lagaho noo katamma mereero hee'ri; Soddooma iilla geeshsha dukkanasi dargunni darga soorri.

¹³ Soddoomu manni kayinni lowo geeshsha bushahonna Kaaliiqi giwanno coye assannoho.

ABIRAAMI KEBIROONI HA'RI

¹⁴ Looxi baxxihu gedensaanni Kaaliiqi Abiraamira, «Nootto darga heedhe aliyyeranna wodiidira, soojjaatiranna galchimira higge lai.

¹⁵ La"atto gobba baala ateranna sirchikkira geedonnita asse eemmohe.

¹⁶ Sirchokki baattote shaafi gede asse batiseemmo; baattote shaafa kiira dandaannohu hee'riro, ate sirchono kiira dandiinanni.

¹⁷ Xa ka'e atera eemmohe baatto aana ka'anna kawa ha'rante, seendillesenna hala'linyesi lai» yiisi.

¹⁸ Abiraami dukkannasi diige, Kebirooni qullaawanniwa Memire odahewa mare hee'ri; hakkiichono Kaaliiqira kakkalote darga seekki.