IZIRA 7 - Qullaawa Maxaafa

IZIRA YERUSAALAME DAYI

¹ Lowo diri gedensaanni, Faarisi moote Arxekisiisi gashshooti yannara, Izira yinannihu mittu manchi no. Ilamasi qeesootu qari Aarooni geeshsha kiirriro, Izira Seerayaho, Seeraya Azaariyaasiho, Azaariyaasi Hiliqiyaasiho,

² Hiliqiyaasi Shaluumiho, Shaluumi Saadooqiho,

³ Saadooqi Ahixoobiho, Ahixoobi Amaariyaho, Amaariya Azaariyaasiho, Azaariyaasi Merayootiho,

⁴ Merayooti Zeraiyaho, Zeraiya Uuziho, Uuzi Buuqiho,

⁵ Buuqi Abiishuho, Abiishu Finihaasiho, Finihaasi Aliaazaariho Aliaazaari Aarooniho.

⁶ Kuni Izira Baabilooninni kae Yerusaalame dayi. Isi Israeelete Magani Kaaliiqi Musera uyino seera seekke egennino rosiisaanchooti. Maganisi Kaaliiqi anga ledosi noo daafira, xa'mi'rinore baala moote fajjinosi.

⁷ Hattono mitu mitu Israeelooti, Qeesootu, Leewaawootu, Faarsaano, xullicho agartannorinna Qullaawu Mini soqqamaano ledo moote Arxekisiisi gashshihunni lamalki diro Yerusaalame daggu.

⁸ Izira Arxekisiisi moohihunni lamalki diro ontikki aganira Yerusaalame iilli.

⁹ Dancha Maganisi anga ledosi noo daafira, dirunni umi aganira mitikki barra Baabilooninni kae, ontikki aganira umi barra Yerusaalame iilli.

¹⁰ Izira Kaaliiqi seera buuxatenninna yinoonnire wonshanni, Israeeleteno wodhonna seera rosiisanni umosi co'o asse uyinoho.

MOOTE ARXEKISIISI IZIRARA BORROTE SOKKA UYI

¹¹ Kaaliiqi Israeelete uyino seeranna hajajo seekke egenninohura, qeesichahonna rosiisaanchoho Izirara moote Arxekisiisi uyinoti borrote sokka affino,

¹² «Mootoollate moote Arxekisiisiwiinni, gordu Magani seeri rosiisaanchi ate qeesichu Izirara, keeru iillohe.

¹³ «Qeesootunna Leewaawootu aana, gashshooti'ya giddo hee'rannohunna ledokki Yerusaalame ha'rara hasi'ranno Israeelichi baalu, ha'ra dandaanno gede tenne hajajo oommo.

¹⁴ Angakki noo seeri Maganikkihu garinni, Yihudunna Yerusaalamete ikkito buuxatto gede aninna lamalunku amaalaasine'ya sonkoommohe.

¹⁵ Ha'ratto woyiteno, aninna amaalaasine'ya Minesi Yerusaalame assi'rinohura Israeelete Maganira uyinoommo birranna culka haadhe ha'ri.

¹⁶ Hattono Baabilooni awuraajji baalunkunni afi'ratto birranna culka baala, Israeelenna qeesootinsa Yerusaalamete noohura Maganinsa Minira baxxe uyitanno fushshaate baala haadhe ha'ri.

¹⁷ «Kunni woxinni middo, jajjabbanna manaadda ge'reewu gocca, gidu fushshaatenna agattote fushshaate hira habbooti. Konne baalanka massite Yerusaalamete Magani'ne Mine kakkalote darga massitine kakkalle.

¹⁸ Hakkiinni gatanno birranna culka, Magani'ne fajjo garinni heddinoonni gede asse.

¹⁹ Maganikki Mini hajora yine uyinoonnihe uduunne baala, Yerusaalamete Maganu albira haadhe shiqishi.

²⁰ Maganikki Minira hasi'rattore baala kunni mootete mini miinji aaninni adhattora dandaatto.

²¹ «Qoleno gobbate gashshaanora, Efiraaxisi Awuraajji Galchimihura woxe amaddanno gashshaano baala, Gordu Magani seeri rosiisaanchi qeesichu Izira xa'mannonsare baala keeshshiishshukkinni uyitannosi gede ani moote Arxekisiisi hajajoommo.

²² 3,400 kiilo ikkanno birra, 10,000 kiilo qamade, 2,000 litire zayite, 2,000 litire woyinete xajjenna hasiissanno geeshshi maxine uuyyesi.

²³ Anenna ooso'ya aana hanqu dirrannokki gede, Gordu Magani hajajannore baala, Minisira keeshshinikkinni uyinona.

²⁴ Qoleno qeesoota, Leewaawoota, faarsaano, agaraasine, Qullaawu Mini soqqamaano woy woloota Maganu Mini loosaasine mitto giwireno xa'mitinoontensa.

²⁵ «Izira, atino Maganikki uyinohe ogimma garinni, Efiraaxisira Awuraajji Galchimihura hee'ranno manni baalunkura, gashshaanonna coye affannore worinsa. Insano Maganikki seera egentinore ikka hasiissannonsa; egenninokkihu hee'riro ati umikki rosiisi.

²⁶ Maganikki seeriranna mootekki seerira hajajamannokkiha shinanni; woy gobbatenni fushshine hunnanni; woy jajjisi adhamanno; woy isi usuramanno» yitannote.

IZIRA MAGANO GALATI

²⁷ Izira qole, «Yerusaalamete noohu Kaaliiqi Mini kunni garinni ayirranno gede, konne coye mootete wodanira worinohu annuwanke Magani Kaaliiqi galatamo.

²⁸ Qoleno Magani'ya eltonni mootete, amaalaasinesinna roorrootu baalu albaanni baxille afi'roommo. Magani'ya anga ledo'ya noo daafira, Israeelete roorroota ledo'ya hadhanno gede gamba assate wolqa afi'roommo» yee Kaaliiqa galati.