IZIRA 6 - Qullaawa Maxaafa

DAARIYOOSI LALLAWA

¹ Hakkunni gedensaanni, Daariyoosi Baabilooni uduunnu mine noota borrote taje hansanni gede hajaji.

² Ikkollana Baabilooni ikkikkinni Medooni awuraajjira Ahimita yinanni katamira mitte borreessinoonnita gogu xaaxo anfi. Giddo borreessinoonniri,

³ «Qiroosi moohi diro, Yerusaalamete Maganu Mini minamanno gedenna, hakkiirano fushshaatenna kakkalono shiqinshanni gede hajajino. Minuno, hojja 60 cigile, hala'linye 60 cigile ikkona.

⁴ Huxxano, 3 doyicho kinnara umoho haqqu dawaayyicho amandanni huxxinona. Woxeno mootete mini miinjinni kayinse uyinona.

⁵ Hattono Nabukadanatsoori Yerusaalametenni Qullaawu Mininni fushshe Baabiloonira haa're ha'rinohu Maganu minihu culkunnihunna birru uduunni, Yerusaalame hige Maganu mine basesira ofollona» yaanno.

⁶ Daariyoosino, «Xaano galchimi ragaanni gashshite noottohu ati Tentinayi, Seteribuzinayinna ki'ne hakkunni awuraajjira heedhinoonniri miillansa baalu martine Qullaawa Mine mina uurrissinoonte.

⁷ Konne Maganu Mine Ayihudete gashshaanchinna sooreeyyensa albi darga galagalchite mintona kissinoontensa.

⁸ «Qolteno Ayihudete sooreeyye konne Maganu Mine galagalchite mintanno woyite, ki'ne loosu uurrannokki gede Efiraaxisira galchimi awuraajjinni gamba assinoonni giwiri aaninni mineho hasiisanno woxe techonni kayissine uuyyensa.

⁹ Kunni aanano, Yerusaalamete heedhanno qeesooti hasidhanno deerrinni Gordu Maganira shilqote kakkalo ikkitanno middo, ge'reewunnita manaaddanna jajjabba gocca, hattonni qamade, maxine, woyinete xajjenna zayite barru barrunkunni uuyyensa.

¹⁰ Konne assitannohu gordu Maganira tashshi assitanno kakkalo shiqishateetinna aneranna ooso'ya heeshshora huuccitanno gedeeti.

¹¹ «Qoleno tenne hajajo ayirrisannokkihu hee'riro, minisi tuuqo haa'ne isi aana sunte, bunshesira minisi ishine tunganniwa ikkona.

¹² Tenne hajajo diigate woy Yerusaalamete nooha Qullaawa Mine hunate hedanno moote woy manna baala hakkiicho magansi'nasira doodhino Magani hunosi. Ani Daariyoosi tenne hajajo seekkine wonshinanni gede hajajoommo» yitanno sokka soyi.

QULLAAWU MINI MAASSO

¹³ Hakkunni gedensaanni, Efiraaxisi Awuraajja Galchimiha gashshinohu Tentinayi, Seteribuzinayinna miillansa moote Daariyoosi hajajino hajajo seekkite wonshitu.

¹⁴ Ayihudete sooreeyyeno himanaanchu Hagenna Iddo beetti Zakkaariyaasi jawaachishshannansa looso xiibbu. Qullaawa Mineno, Israeelete Magani yiino garinni Faarisi mootoolla Qiroosi, Daariyoosinna Arxekisiisi hajajonni minte guddu.

¹⁵ Qullaawu Minino Daariyoosi moohihunni leelki diro Adaari Aganira sayikki barra miname goofi.

¹⁶ Hakkunni gedensaanni, Israeelete manni, qeesootu, Leewaawootunna gattino qafadamaano Maganu Miniha maassote ayyaana hagiirrunni ayirrissu.

¹⁷ Minu maassora 100 middo, 200 ge'reewu goccanna 400 aja ge'reewu gocca uyitu. Israeele cubbo agursiisate kakkalora 12 meu gocca mitte mittente Israeelete ga're su'minni shiqishshu.

¹⁸ Muse Maxaafira borreessinoonni garinni, Yerusaalamete Kaaliiqi Mini soqqanshora qeesootanna Leewaawoota gari garinsanni wortu.

MARARROTE AYYAANA

¹⁹ Qafadotenni higginori umi aganira tonaa shoolki barra Mararrote Ayyaana ayirrissu.

²⁰ Qeesootunna Leewaawootu umonsa keereensidhe, baalunku seeru garinni keeraa'mitu. Leewaawootuno Mararrote Ayyaanira ge'reewu gocca, qafadotenni higginorira roduuwinsa qeesootahonna uminsara gorridhu.

²¹ Kakkalono, qafadotenni higgino Israeelootinna Israeelete Magano Kaaliiqa magansi'rate hakko heedhanno daga battewiinni baxxitinori ledo mitteenni ittu.

²² Kaaliiqi hagiirsiisinonsa daafira, Timu Ayyaana 7 barra hagiirrunni ayirrissu. Hatto assitinohu Kaaliiqi Asoori moote wodana shaqqishe, Maganinsa Mine mina kaa'lannonsa gede assinohuraati.