IZIRA 5 - Qullaawa Maxaafa

TENTINAYI DAARIYOOSIRA SOYINO SOKKA

¹ Hatte yannara, himanaanchu Hagenna Iddo beetti himanaanchu Zakkaariyaasi, Yihudahonna Yerusaalamete heedhanno Ayihudera, Israeelete Magani kulinonsa garinni himana kultunsa.

² Konne himana macciishshituhu gedensaanni, Selaatiyaali beetti Zerubaabeelinna Iyotsedeqi beetti Iyyaasu Yerusaalamete nooha Maganunniha Qullaawa Mine galagalchite minate ka'u. Kaa'litannonsari lamunku Maganu himanaano ledonsa no.

³ Hatte yannara, Efiraaxisira galchimaanni hee'rannohu Tentinayi, Seteribuzinayi, miillansanna roorrootu Yerusaalame dagge, «Konne mine minatenna huxxano huxxate ayi fajji'ne» yite xa'mitunsa.

⁴ Qolteno, «Ki'ne ledo Qullaawa Mine mintanni noori ayeooti» yitunsa.

⁵ Maganu Ayihudete roorroota towatanni noonsa daafira, Daariyoosira soqqitino sokka dawaro higga geeshsha Faarisi roorrooti mine mina dihooltinonsa.

⁶ Gashshaanchu Tentinayi, Seteribuzinayinna miillansa, Moote Daariyoosira sokkino sokka,

⁷ «Moote Daariyoosi, ateranna gashshootikkira keeru ikko.

⁸ «Lowo Maganihu Qullaawu Mini noowa Yihuda marroommota kullammohera hasi'noommo. Mannu Qullaawa Mine jajjabba kinnanninna du'muulle mokkollonni minanni no. Loosono xiinxalle rahotenni loosanni no.

⁹ «Ninkeno roorroota, ‹Konne Qullaawa Mine galagalchitine mintinanni gedenna qineessitinanni gede fajjino'nehu ayeti?› yine xa'minoommo.

¹⁰ Atera egensiinseemmo gede roorrootinsa su'mano xa'mineenna,

¹¹ «Insano, ‹Ninke gordunna baattote Magani soqqamaanooti. Galagalchine minneemmohu Qullaawu Mini, lowo dirira albaanni wolqaataamu Israeelete moote mine qineessinoho.

¹² « ‹Kayinnilla, akaakkanke Gordu Magano hanqissinohura, Baabilooni mootera Keledichaho Nabukadanatsoorira sayise uyinonsa. Isino konne Qullaawa Mine diige hune manna Baabiloonira qafade haa're ha'rino.

¹³ Ikkollana, Qiroosi Baabilooni gobbara moohi diro, konne Maganu Mine galagalchine minneemmo gede hajajino.

¹⁴ Nabukadanatsoori Yerusaalametenni Qullaawu Mininni fushshe haa're ha're Baabilooni mootete mine masse worinoha culkunninna birrunni seekkinoonni uduunne qolinonke. Konne uduunne Sheshibatsaari yinanni gashshaanchi widoonni qole uyinonke.

¹⁵ Sheshibatsaarino, konne uduunne haa're Yerusaalame masse Qullaawa Mine woranno gede ee, Maganu Minino albi darga minamanno gede moote Qiroosi hajajino.

¹⁶ Sheshibatsaarino daye, Yerusaalamete Qullaawa Mine safino. Hakko barrinni kayinse techo geeshsha minnanni hee'noonni; ikkollana xaa geeshsha digoofino› yitinonke.

¹⁷ «Xaano ati maahoyye yiittonkeronna, kuni Maganu Mini Yerusaalamete minamanno gede moote Qiroosi hajajinota buuxate, Baabilooni mootete mine worroonni taje fanne la'nanni gede assi. Hakkunni gedensaanni, ikkona yootto coye soyinke» yitannote.