IZIRA 4 - Qullaawa Maxaafa

QULLAAWU MINI MINAMANNOKKI GEDE KA'INO HETTO

¹ Yihudunna Biiniyaami baarigaarra, qafadotewiinni higginori Israeelete Magani Kaaliiqi Mine mintanni noota macciishshite,

² Zerubaabeeliwanna gosate sooreeyyewa dagge, «Ninkeno ki'nente gede Magano'ne magansi'neemmoreeti. Asoori moote Asiraadooni kawiira abbinkenkunni kayinse isira kakkallanni hee'noommo. Kunni daafira looso kaa'lineemmo'ne» yitunsa.

³ Zerubaabeeli, Iyyaasunna wolootu Israeelete gosa sooreeyye kayinni, «Maganinke Mine mintinara ninke ledo xaadu dino'ne. Faarisi moote Qiroosi hajajinonke garinni Israeelete Maganira Kaaliiqira Qullaawa Mine minneemmori ninkeetilla» yite dawartunsa.

⁴ Hakkunni gedensaanni, hatte gobbara heedhannori, Yihudu mannira hexxo mursiissanni mineno mintannokki gede waajjishiishshunsa.

⁵ Qiroosinna Daariyoosi gashshooti loosaasinera muishsha aatenni looso wonaalleessitu.

XERKISIISINNA ARXEKISIISI YANNARA KA'INO HETTO

⁶ Xerkisiisi gashshootira umo, Yihudahonna Yerusaalamete hee'ranno manna baarigaarransa borrotenni yekkeertunsa.

⁷ Bishilaami, Mitiredaati, Xaabieelinna miillasi, Faarisi gashshe noohuwa Arxekisiisiwa borreessidhinota borrote sokka iillishidhu. Sokkano, Sooriyu afiinni borreessinoonnite.

⁸ Gobba gashshinohu Rehuuminna borreessaanchisi Simisayi Yerusaalamete daafira moote Arxekisiisira,

⁹ «Borreessinoommori, gashshaanchu Rehuumi, borreessaanchu Simisayi Tiripoliisi, Faarisi, Ereki, Baabilooni hattono, Suusaho Elamaawoota gashshitinori miillanke,

¹⁰ qoleno jawunna wolqisu Asinaafeeri qaensanni hoole Samaariyu Katamiranna Efiraaxisi Awuraajji Galchimihura heedhanno gede assinori ledooti» yitu.

¹¹ Sokkinositi borrote sokka kunninni aante noote: Moote Arxekisii,

¹² Atewiinni ninkewa daggino Ayihudooti Yerusaalame marte bunshe wo'mitinohunna addi-fulu manni hee'ranno katama galagalchite mintanni no. Huxxano galagalchite huxxite gudate rakke noota kune afi.

¹³ Kuni katami minamironna huxxisino galagale dhaawamiro, mitto giwireno uyitannokkitanna mootete mini miinjino xeannota afi.

¹⁴ Xaano ikkiro mootete mini coyi xissiisannonkeha ikkino daafiranna mootete ayirrinyi kisamanna sammi yee la"a hasiissinokki daafira, konne coye afattora sonkoommo.

¹⁵ Kunnira, annikki mine noota borrote taje lai; tajete giddono kuni katami addi-fula ikkinota, mootoollasinna gashshaanosi qarrissannota ikkitinota afatto. Alba diinge hunnoonnihuno kunni daafiraati.

¹⁶ Kuni katami galagale minamannohanna huxxasino galagalchine huxxinanniha ikkiro, Efiraaxisi Awuraajji Galchimihunni mitturino angakki gatannokkita afi yitu.

¹⁷ Mooteno daware, «Gashshaanchu Rehuumira, borreessaanchu Simisayira, Samaariyahonna Efiraaxisi Awuraajji Galchimihura heedhannorira miilla'nera, keeru ledo heero'ne.

¹⁸ «Sokkinoonnie sokka alba'yaanni nabbambe tirroonnie.

¹⁹ Ani hajajeenna borrono fonqolle la'noonni. La'noonni gede ikkiro, kuni katami hundunni kayise wole mootoolla qarrisinohanna haxawarra ikkinota anfoonni.

²⁰ Hakkiinnino sa'e, Yerusaalamete Katamira Efiraaxisi Awuraajja Galchimiha gashshitinore baala, giwire baatisiissannori wolqaataamma mootoolla heedhinoho.

²¹ Kunnira, ani lede hajajo aammo geeshsha galagalchite mintannokki gede kullensa.

²² Konne coye lashshi assitinannikki gede qorophe. Hakkunni gedensaanni qiniite'ya hunannohu dihee'ranno» yee sokka soyi.

²³ Moote Arxekisiisi sokka iilliteenna Rehuumi, borreessaanchisi Simisayinna miillansa albaanni nabbambi. Hakkawoyintenni Yerusaalamete noo Ayihudootiwa rakke marte, katama huxxa agurtanno gede giddeessitunsa.

²⁴ Kunnira, Yerusaalamete minnannihu Maganu Mini Faarisi moote Daariyoosi gashshihunni layinki diri geeshsha minama uurri.