IZIRA 1 - Qullaawa Maxaafa

QIROOSI AYIHUDE GOBBANSA HIGGANNO GEDE ASSINSA

¹ Himanaanchu Ermiyaasi widoonni qole coyi'rino himani wo'manno gede Kaaliiqi Faarisi moote Qiroosi kakkayisi. Kunni garinni gashshootisi giddo noo manni baalu, isi borreessinanni gede assino lallawa nabbawanno gede soyi.

² Faarisi moote Qiroosi, «Gordu Magani Kaaliiqi gobba gosate gashshaancho assinoe. Qoleno Qullaawa Mine Yihudaho noo katamira Yerusaalamete mineemmosi gede hajajinoe.

³ Maganu manna ikkitinoonnirira baalaho Maganu ledo heero'ne. Ki'neno Yerusaalame hadhine Israeelete Magano Kaaliiqa magansi'nanniha Qullaawa Mine minne.

⁴ Qafadotenni gobbansa higgara hasidhannore baala heedhanno ollii kaa'le birranna culka, wole uduunneno ikko hogowi saada, hattono Yerusaalamete Maganu Minira fushshaate assite uyidhannore baala oonsana» yii.

⁵ Hakkunni gedensaanni, Yihudunna Biiniyaami ga're roorrooti, Leewaawootunna qeesootu Yerusaalamete nooha Kaaliiqi Mine minate Maganu kakkayisinonsari baalu qixxaabbu.

⁶ Olliinsano birru uduunne, culka, sagale, hogowi saada, wole jajjanna fushshaateho ikkannore baala uyinsa.

⁷ Moote Qiroosi, Nabukadanatsoori Yerusaalametenni Maganu Mininni abbe kaphu maganna mine wodhino uduunneno qole uyinsa.

⁸ Uduunne, mootimmasi mine uduunne agarannohu Mitiredaati haa're fushshanno gede asse, Yihudu gashshaanchi Sheshibatsaari anga kiire wori.

^9-10 Uduunnuno: Culkunni seekkinoonniri fushshaate gamba assinanniri 30 saannaati, birrunni seekkinoonniri fushshaate gamba assinanniri 1,000 saannaati, wole 29 uduunneeti, culkunni seekkinoonniri 30 xiltaamma saannaati, birrunni seekkinoonniri 410 xiltaamma saannaati, wole 1,000 addi addi uduunneeti.

¹¹ Sheshibatsaari wolootu qafadamino manni ledo Yerusaalame higi yannara, haa're abbinohu culkunninna birrunni seekkinoonnihunna wolu uduunni mitteenni 5,400.