IYYOOBI 5 - Qullaawa Maxaafa

¹ «Iyyoobi, xa hanni woshshi! Dawarannohehu nooni? Kaa'lote hiikko sokkaasinchikkiwa higatto?

² Hawanya mancho hanqisi shaannosi; shota mancho dhiibbesi huntannosi.

³ Hawanyu manchi qawaaxxi're nooha afoommo; ikkollana, hedeweelcho minisi rumami.

⁴ Oososi harshammo diafidhanno; yoote dargano kadantanno; ha'lannonsahuno dihee'ranno.

⁵ Hawanyu gamba assi'rinoha, hudi'rinohu itanno; utu giddo laalinoha nafa diaguranno; jirosi goo'rinohu yogoranno.

⁶ Mitiimma bushshu giddonni difultanno; qarruno baattote giddonni dimu'ranno.

⁷ Xoxinu giirate aaninni ka"annonte gede, mannuno hatto qarraho ilamino.

⁸ «Ani ate ikkoommoro Maganunniwa higeemmo; qarra'yano isira hasaapheemmo.

⁹ Isi hende anfannikkiha jawa coyenna, kiirre dandiinannikki maalale assanno.

¹⁰ Baattote xeena aanno; loosi'noonnirirano waa soyanno.

¹¹ Heeshshi yitinore gotti assanno; wi'litannore hagiirsiisanno.

¹² Xagaraammu mala diige, hedonsa wo'mitannokki gede assanno.

¹³ Hayyoole xagarronsanni amadanno; shokkaddu malano galchanno.

¹⁴ Barru tunsannonsa; hashshi gede barru taalootira, ka'anna kawa raataabbanno.

¹⁵ Maganu buxicho bushuullu afiinni, gadadaamo wolqaataamu anganni gatisanno.

¹⁶ Gadadaamoho hexxo aanno; bushuullu afoo kayinni cufanno.

¹⁷ «Wo'manka Dandaanno Magani seejjannosi manchi ba'raa'rinoho; kunnira, isi rufa mishshooti.

¹⁸ Isi madiissanno; isinni gaga gananno. Angasi hiiqqitanno; angasi hursitanno.

¹⁹ Leyu bushu coyi giddonni gatisannohe; lamalu bushu coyi giddonni mitturino dikisannohe.

²⁰ Hudete yannara reyattokki gede agarannohe; olu giddono lubbokki gatisannohe.

²¹ Arrawu bagadinni gatatto; bao daggurono diwaajjatto.

²² Baonna hude bashshi diassatto; dubbu moyichono diwaajjatto.

²³ Loosi'ratto baatto giddo kinna diheedhanno; dubbu moyichino dikisannohe.

²⁴ Minikki giddo keerunni hee'ratto; saadakki towaxxatto yannara, keere noota afi'ratto.

²⁵ Sirchikki batinye ikkanno; ilakki baattote hayisso gede batidhanno.

²⁶ Laala geeshsha gate keeshshanno gidi gede, atino lowo diro hee'ratto; reyatto geeshsha jawaatte hee'ratto.

²⁷ Iyyoobi, konne coye hansummota hanse buunxoommo; kuni coyino halaalehona, adhittoro woyyate» yiisi.