IYYOOBI 36 - Qullaawa Maxaafa

¹ Eelihu lede,

² «Maganu afoo ikke kuleemmoheri lowo coyi nooena, shiima yanna cincite macciishshie.

³ Kalaqinoe Magani keeraancho ikkinota huwachishammohera, egenno'ya mageeshshitero leellisheemmohe.

⁴ Kuleemmoheri giddo mittu kaphino dino; kuni albakkiinni noohu wo'ma egenno afi'rinoho.

⁵ «Maganu wolqaataamoho; ikkirono, ayeno dimishanno; Maganu egenninokki coyi mittuno dino.

⁶ Isi bushu manni lubbotenni hee'ranno gede diassanno; gadadaammaho halaale coyi'ranno.

⁷ Maganu keeraano towatannonsa; mootete gedee gashshaano assannonsa; hegerera ayirrite heedhanno gede assannonsa.

⁸ Mannu cagaagetenni usurinsaro, woy assitino barshi iillinsaro kayinni,

⁹ hakkawoyite Maganu cubbo loossinotanna, boo'nitinota kulannonsa.

¹⁰ Qorophishiishshasi macciishshitanno gede assannonsa; bunshensawiinni higganno gede hajajannonsa.

¹¹ Maganu yiinota macciishshituronna soqqantusiro, gatino dironsa keerunninna jirotenni heedhanno.

¹² Isi yiinota macciishsha gibburo kayinni, bagadu shaannonsa; afa hoongensanni heedhe ba'anno.

¹³ «Maganiweelu mannira kayinni, wodanaho hanqu dihooganno; ganannonsa woyite nafa, kaa'lansara dihasidhanno.

¹⁴ Anje heedhenni reyitanno; shollaataame reyo reyitanno.

¹⁵ Maganu manna qarrunni rosiisanno; iillitanno shetto widoonni qole gatisanno.

¹⁶ Maganu ate, qarru giddonni fushshannohe; keerunni hee'ratto gedeno assannohe; minekki dancha sagale wo'mitanno.

¹⁷ «Ati kayinni, bushuulleho malino qoricha, adhitanni nootto.

¹⁸ Jiro doggannohekki gedenna, gubbuno so'risiisannohekki gede qorophi.

¹⁹ Jirokkinna jawaantekki baala, qarru giddonni fushshitannoheha lawannoheni?

²⁰ Mannu minisinni xoqolamanno hashshi daara halchitooti.

²¹ Kuni qarri baalu iillinohehu, bunshetewiinni agaraheraatina, bunshete giddora galagalte higattokki gede qorophi!

²² «Maganu wolqara gawalo nookkita egenni; isi gedee rosiisaanchino dino.

²³ Maganoho assannore kulannosihu nooni? ‹Busha looso loosootto› yaannosihu hee'rannoni?

²⁴ Loosanno loosi baalaho galantannisi; atino galatattosira hasiisanno.

²⁵ Maganu looso mannu baalu la"anno; ikkollana, fafe hee're la"anno daafira dibuuxanno.

²⁶ «Maganu jawimma mageeshshitero, afa dandaannohu nookkita egenni; dirisi mageeshshihoro afinohu dino.

²⁷ Maganu waa baattotenni iimira qole fushshanno; gordu aanano xeenu widira qole soorranno.

²⁸ Xeenu gomichu giddonni fule, mannaho barada ikke dirranno gede assanno.

²⁹ Ikkollana, Maganu gomicho asse doyissanno garanna, hee'rannowa gordoho, beleqo asse gugisanno gara afinohu dino.

³⁰ Banqote bilicceessa gordu giddoonni qole soyanno; baaru diime kayinni tunsitino gedeenni heedhanno.

³¹ Maganu manna gashshannohunna, itannota lowo sagale qixxeessannohu kunni garinniiti.

³² Banqo angasinni amadanno; gantara hasi'rinori widira qole hajajannose.

³³ Mannaho belequ, wisho daggannota kulanno; saadano tenne egentino.