IYYOOBI 35 - Qullaawa Maxaafa

¹ Eelihu lede coyi'ranni,

² «Ati, ‹Ani Maganu albaanni fayyaaleessaho› yootto; halaalintanni hatto yaakki atera garahoni?

³ ‹Ani cubbo loosummoro, Maganoho maricho xeiseemmo? Fayyaaleessa ikka'yanni, ani maricho lexxeemmo?› yaakki garahoni?

⁴ Xa ani ateranna ate ledo noo jaallakkira, dawaro qoleemmo'ne.

⁵ «Iima higge gordo lai; gomichu atewiinni mageeshshi geeshsha fafinoro lai!

⁶ Cubbo loosakki Magano gawajjitannosini? Lowo sao assakki Maganoho huntannosiri nooni?

⁷ Ati keeraancho ikkittoro Maganoho maricho ledatto? Isi atewiinni mittorichono dihasi'ranno.

⁸ Ate bunshe wole manna qarrissanno; dancha loosattoha ikkiro manna kaa'latto.

⁹ «Mannu qarru bati'rinsaro raaranno; kaa'lo afi'rateno woxaratanno.

¹⁰ Ikkollana, qarru yannara kaa'lannonsahuwanna, tunsichu giddo heedheenna hexxo aannonsahuwa, kalaqaanchu Maganinsawa higa dibaxxanno.

¹¹ Saadatenninna ceatenni roorse egennaamma assinonkehuwa, Maganunniwa higa dibaxxanno.

¹² Boonaleeyyenna bushuulle ikkitinohura, Maganu raarensa dihidhanno.

¹³ Halaalintanni Maganu haafunnita raarensa caaqqi yee dila"anno; Wo'manka Dandaanno Magani dimacciishshannonsa.

¹⁴ «Iyyoobi, ati, ‹Ani Magano la"a didandeemmo; haja'ya isi anga noo daafira, ani iso agadheemmo› yaatto.

¹⁵ Maganu mannaho hanqannokkihanna, mannu cubbi daafira qarramannokkiha lawihe?

¹⁶ Coyi'rattori baalu haafaho; afoottori nookkiha mulla coyi'ratto» yiisi.