IYYOOBI 32 - Qullaawa Maxaafa

EELIHU HASAAWA

¹ Iyyoobi, «Ani keeraancho manchooti» yee coyensa adha giwinohura, sasunku mannooti isira dawaro qola gibbu.

² Iyyoobi Maganunni roore umosi keeraancho assinohura, Raami sircho ikkinohu Buuzi gobbahu Barakeeli beetti Eelihu lowo geeshsha hanqi.

³ Eelihu Iyyoobira calla ikkikkinni, sasunku Iyyoobi jaallarano hanqino. Hanqinohuno, Iyyoobi sao assino yituro nafa, garunni qoltinosikkihuraati.

⁴ Eelihu maa'ne ikkinohura baalunku coyidhe gudda geeshsha badosira coyi'rara cince agare no.

⁵ Sasunku manchi Iyyoobira duushshitanno dawaro qola dandiitinokkita afe lowo geeshsha hanqi.

⁶ Kunnira Eelihu coyi'ranni, «Ani ilamatenni ki'nera maa'neho; ki'ne kayinni geerraho; kunnira, hedoommore coyi'ra waajjoommo.

⁷ ‹Geerru wolootaho hayyo rosiissanno› yee, hedoommo daafira, ani sammi yoommo.

⁸ Ikkollana, mannaho egenno aannohu, Wo'manka Dandaanno Magani ayyaanaati.

⁹ Manna egennaamo assitannoti geedhimma di"ikkitino; halaalaancho coye buuxate diru batinyi dikaa'lanno.

¹⁰ Kunnira, ani hedoommore kuleemmo'nena, ki'neno macciishshe"e.

¹¹ «Kuneeti ani ki'ne coyidhini yannara, cince macciishshoommo. Coyidhinanni hayyo hasidhinanna, sammi yee agaroommo.

¹² Seekke macciishsheemmo woyite, ki'ne giddonni mittuno, Iyyoobira so'rosi ammanchiishinohu dino.

¹³ Iyyoobira maltino dawaro qolara dandaannohu, Maganoho ikkinnina manna di"ikkino. Ki'ne egenno noonke yitine mulla adawadhitinoonte.

¹⁴ Iyyoobi ane lae dicoyi'rino; ane lae coyi'ra hoogirono, ani ki'ne assitini gede asse diqoleemmosi.

¹⁵ «Iyyoobi, insara coyidhannori afiinni bainonsa daafira, atera dawartannore diafidhino.

¹⁶ Insa coyidhannore hoogge sammi yite uurritino daafira, anino sammi yee laoyya?

¹⁷ Dee'ni! Anino ane widita coyi'reemmo; leeltinoetano kuleemmohe.

¹⁸ Coyi'reemmo coyi wo'me nooe daafira, kunni ka'a sammi yee diafeemmo.

¹⁹ Coyi'rate fajjinanniekkiha ikkiro, giddo'ya noo coyi,

²⁰ fooleessa fushshinoonnikki uduunnichi gede ikke dhooharaatina, xa coyi'reemmona agurre"e!

²¹ Kunni coyira, ayerano digolameemmo; ayeno diguwiseemmo.

²² Manna guwinsanni gara diegennoommo; hatto assummoro kalaqaanchi'ya rahe qorichishannoe.