IYYOOBI 2 - Qullaawa Maxaafa

SHEEXAANU IYYOOBI LAYINKIMEESHSHO JIFI

¹ Xaano wole barra galagalte Maganu sokkaasine Kaaliiqi albira daggu. Sheexaanuno daye ledonsa Kaaliiqi albaanni uurri.

² Kaaliiqi Sheexaane, «Maminni dayitto?» yee xa'misi. Sheexaanuno, «Ka'anna kawa ha'ranni baatto baala doyommo» yii.

³ Kaaliiqino Sheexaane, «Halaalinta soqqamaancho'ya Iyyoobi wodana assite laittoni? Baattote aana isi gedeehu keeraanchunna suwashshu, bushu coyi baalunkuwiinni fafe ane ayirrisanno manchi dino. Beebbatenni huneemmosi gede xixxiiwittoerono, isi xaa geeshsha guutella no» yiisi.

⁴ Sheexaanu qole, « ‹Manchoho umosi roorinori dino› yinoonninte gede, manchu noosire baala lubbosira yee aanno.

⁵ Xa angakki diriirsite miqqasinna mannimmasi gawajjoottoro kayinni, ati la'anna xonannohe» yiisi.

⁶ Kaaliiqino Sheexaane, «Maahoyyena, lubbosi calla agurranna hasi'rittota assi» yiisi.

⁷ Sheexaanuno Kaaliiqi albinni fule ha're, Iyyoobi umisi qoonchinni kayise lekkasi hoowi geeshsha jaddote mada madiissisi.

⁸ Iyyoobino biso duuqqara bacce adhe, buluulu aana ofolli.

⁹ Ayiddaamasino, «Xaa geeshsha guuttella nootto? Magano xonte direyatto?» yitusi.

¹⁰ Isi kayinni, «Ati hawanyu meenti gede coyi'ritta. Maganu anganni danchare adhinoommonte gede, bushareno diadhineemmo?» yiise. Kunni baalunkunni Iyyoobi Maganoho sao dicoyi'rino.

SASU IYYOOBI JAALLA LA'ASIRA DAGGU

¹¹ Sasunku Iyyoobi jaalla Temaani yinanni katamihu Elfaazi, Shuha yinanni gobbahu Beldaadi, Naima yinanni gobbahu Soofaari konne iillinosiha busha coye baala macciishshite, deisiissasiranna sheshifachishshasira gobba gobbansanni ka'e mimmitonsa haadhe daggu.

¹² Fafowa heedhe la'anno woyite, isimma badate didandiitino. Qoonqonsano naggi assite wi'litu; mittu mittunku dadillunni uddanonsa dartu; uminsa iimira qolte buko fincidhu.

¹³ Lamala barranna lamala hashshano isi ledo uulla ofoltu. Qarrisi saima ikkinota affino daafira, insa giddonni mittu nafa cuqqi yiinohu dino.