IYYOOBI 18 - Qullaawa Maxaafa

BELDAADIHA LAYINKI HASAAWA

¹ Beldaadi qole,

² «Coyekki uurrisattohu mamooteeti? Hanni galfati; hakkunni gedensaanni hasaambeemmona.

³ Danqa saada gede assite kiirittonke? Gowwoota assite mayira la"attonke?

⁴ Hanqikkinni umokkilla gawajjootto; atenni kainohunni baatto mulla gattannoni? Ate hagiirsiisara yee, Maganu kinna darginni kayisannoni?

⁵ «Bushu manchi caabbichi xoanno; giirasino dibubbanno.

⁶ Minisi tunsanno; caabbichisino xoanno.

⁷ Albi gede halashshe qaafe diafanno; busha hedosi sarraaqqe tuggannosi.

⁸ Ha'ranno doogo, massite woshshaadote giddo tuggannosi.

⁹ Gindesi woshshaado amaddanno; hakkiichinnino milli yaannokki gede assitannosi.

¹⁰ Ha'ranno doogora worroonni woshshaado, afikkinni kaxxe amadamanno.

¹¹ Masillu doyisse amadannosi; mariwa baala hoode ha'rannosi.

¹² Hudetenni kainohunni wolqasi ba'anno; qarru fiixa ikkannosi.

¹³ Manninatesi baala dhibbu amadanno; angasinna lekkasi ite gudanno.

¹⁴ Hee'rannohunni danchu minisinni fule, busha reyo reyanno.

¹⁵ Fiixasi ikkinohu mittuno hakkiicho dihee'ranno; hakkonne dhibba hunate minisira giira qansanni.

¹⁶ Woriidinni rumushshisi moolanno; iimiidinni sinnasi qoortanno.

¹⁷ Baattote aana horonta qaangannikkiha ikkanno; su'masi kayisannohuno dihee'ranno.

¹⁸ Hee'nanni gobba xawaabbunnitenni fule ha'ranno; xawaabbu noowiinni tunsichu giddora shorramanno.

¹⁹ Gosasi mereero isi ila diheedhanno; minesino gatannohu dihee'ranno.

²⁰ Soojjaatinni galchimi geeshsha noo manni, konne coye macciishshe masanno.

²¹ Bushu manni gawalo hattoote; Maganu daafira, haja afidhinokkiri hatto ikkitanno» yii.