IYYOOBI 11 - Qullaawa Maxaafa

SOOFAARIHA UMI HASAAWA

¹ Neimaatichu Soofaari qole,

² «Halaalinta kunni mullichu coyira, dawaro aannohu dinoni? Woy lowo coye coyi'ra, manna keereensitannoni?

³ Naaxxitanna anfe sammi yinanniha lawihe? Haariimatto woyite seejjannohehu nookkiha lawihe?

⁴ Ani yoommotilla garaho yaatto; Maganu albaanni ani keeraanchoho yite hedatto.

⁵ Maganu coyi're halaale kuloommehero, hiittoo danchaati!

⁶ Egennonniha maaxamino coyenna, halaalaancho egenno batinye dana afidhinota kulannoheti ba'ino. Hunakki deerrinni diqorichishinohe.

⁷ «Maganu hayyo, xiinxalla dandaattoni? Woy Wo'manka Dandaanno Maganita, jawimmasi co'o assite afa dandaattoni?

⁸ Gordunni roore iimallitte xeerti'rannona, assite afattori nooni? Jeennaatunni roore wororritte fafannona, afa dandaattoni?

⁹ Hayyosi baattotenni roore seedate; hala'linyiseno baara rooranno.

¹⁰ Maganu usuru minira eesse, yoote shiqishihero ma"assite afatto?

¹¹ Maganu bushu manni loosannore egennino daafira, bunshensa lae sammi yee diaguranno.

¹² Gowwu egennaamo ikkanno waro, gaangonti qaltanno.

¹³ «Wodanakki suwisi'ri; Maganu ledo huuccattotenni xaadi.

¹⁴ Cubbo loosa aguri; minekki sao heedhoonke.

¹⁵ Hatte yannara, halaalinta haxokki gotti yitanno; bashshi assittokkinni hee'ratto.

¹⁶ Qarrakki, sae ha'rino wayi gede hawatto.

¹⁷ Heeshshokki barru taalooti xawaabbinni roore xabbannohe; tunsitinohe yanna soodimari gedeeta ikkitannohe.

¹⁸ Hexxo noohe daafira, yaaddo nookkiha hee'ratto; Maganu agarannohe daafira, keere hee'ratto.

¹⁹ Waajjittokkinni goxxe galatto; lowo manni ate anga la"anno.

²⁰ Bushuullu ille kayinni tunsitanno; higge xooqqannowano diafidhanno; agartannonsati reyo callate» yii.