IYYOOBI 1 - Qullaawa Maxaafa

SHEEXAANU IYYOOBI JIFI

¹ Uutsi yinanni gobbara mittu Iyyoobi yinanni manchi no. Iyyoobi bunshetewiinni fafe Magano waajjannohonna sao nookki keeraanchooti.

² Isi 7 labballonna 3 seenne ilino.

³ Afi'rino jirono 7,000 ge'reewooti, 3,000 gaalaati, 500 handate waaxaati, 500 harreeti; qolteno lowo soqqamaano noosi. Hatte yannara, jirotenninna jawaantetenni isi geeshsha ikkanno manchi soojjaati gobbara dino.

⁴ Iyyoobi ooso labballiti mimmitunniwa bado ga'nite jila ji'lite, sasenta seenne roduuwansa insawa woshshite, ledonsa ittanninna agganni hagiidhitanno.

⁵ Jilu yanna sa'uhu gedensaanni, Iyyoobi barru barrunkunni soodo gute kae, mittu mittunku oososi su'minni shilqote kakkalo shiqishanno. Hatto assannohuno, «Miteekkite ooso'ya duubbe Kaaliiqa wodaninsanni xontinoha ikkanno» yee waajjinohura insa keereensateeti. Iyyoobi konne coye agurikkinni wo'manka woyite assanno.

⁶ Mitto barra, gordu sokkaasine Kaaliiqi albira shiqqu yannara, Sheexaanuno ledonsa shiqi.

⁷ Kaaliiqi Sheexaane, «Maminni dayitto?» yee xa'misi. Sheexaanuno, «Ka'anna kawa ha'ranni baatto baala doyommo» yee dawarisi.

⁸ Kaaliiqino Sheexaaneho, «Halaalinta soqqamaancho'ya Iyyoobi wodana assite laittoni? Isi gede keeraanchunna suwashshu, bushu coyi baalunkuwiinni fafe ane ayirrisanno manchi wolu dinona» yiisi.

⁹ Sheexaanuno Kaaliiqira, «Isi atewiinni mittore afi'ra hoogoommero ayirrisannoheha lawihe?

¹⁰ Isi ate ayirrisannohu isira, maatesiranna noosi jiro baalate huxxa ikkoottosihuraati. Qoleno, assi'rire baala maassi'roottosihuranna saadasino qalante baatto wo'mitino daafiraati.

¹¹ Angakki diriirsite afi'rinore baala haadhe hooloottoro, halaalinta ati la'anna xonannohe» yiisi.

¹² Kaaliiqino Sheexaaneho, «Hanni maahoyyena noosire baala hasi'rittota assi. Iyyoobi aana kayinni mittoreno assitooti» yiisi. Sheexaanuno Kaaliiqi albinni fule ha'ri.

IYYOOBI OOSONNA JIROSI BAALA GOOFFU

¹³ Mitto barra Iyyoobi ooso bayiru rodiinsa mine ittanninna agganni no.

¹⁴ Hakko barra mittu soqqamaanchi Iyyoobiwa dodanni daye, «Ninke handa hawuurranni hee'neenna, mulenke harre hayisso ittanni no.

¹⁵ Saabaawootu hedeweelcho bala tugge, saada adhite hadhino. Soqqamaanokki baalanta shite guddino. Ani calli'ya gate fule kulammohera dayommo» yiisi.

¹⁶ Isi coyi'ranni hee'reenna wolu daye, «Maganu giira gordunni dirrite, ge'reewonna allaalaasine itte guddino. Ani calli'ya gate fule kulammohera dayommo» yiisi.

¹⁷ Hakkuno coyi'ranni hee'reenna wolu daye, «Keledootu 3 gaamo ikkite dagge bala tugge, gaalla adhite hadhino. Soqqamaanokkino shite guddino. Ani calli'ya gate fule kulammohera dayommo» yiisi.

¹⁸ Kunino coyi'ranni hee'reenna wolu daye, «Oosokki labballunna seennu bayiru rodiinsa mine ittanninna agganni heedheenna,

¹⁹ hombobolatte mulluugichunni ka'e dagge, minunnita shoolenta madde ganteenna, minu aanaho uwe oosokki baalanta shiino. Ani calli'ya gate fule kulammohera dayommo» yiisi.

²⁰ Iyyoobino kae, dadillunni uddanosi dari; umo meexxe uulla gombisame Magano ayirrisanni,

²¹ «Ama'ya godowinni mullu fuloommo; reemmo woyiteno mullichulla ha'reemmo. Kaaliiqi uyino; Isinni qole adhino; Kaaliiqi su'mi galataminoha ikko» yii.

²² Tenne baalante giddoonni Iyyoobi sao diassino. Maganono dibushiishino.