IYYAASU 4 - Qullaawa Maxaafa

QAAGGOTE KINNA UURRISATE UYINOONNI HAJAJO

¹ Mannu baalu Yordaanoosi fulihu gedensaanni, Kaaliiqi Iyyaasura,

² «Mitte mittente ga'renni, mitto mitto mancho haadhe 12 manna doori.

³ Yordaanoosi Wayi mereero qeesootu uurritu darginni 12 kinna haadhe fultanno gede hajaji. Kinnano haadhe massite techo hawarro galtinanni darga uurrissanno gede kulinsa» yiisi.

⁴ Iyyaasuno doorinore tonaa lamenka manna woshshe,

⁵ «Magani'ne Kaaliiqihu Gondooru Taabootira albaanni sa'ine, Yordaanoosi Wayiwa dirre. Israeelete ga're su'minni mittu mittunku mitto mitto kincho haadhine qoti'nera dukke.

⁶ Tini kinna ikkino coye baalanka Israeelete mannira qulli assitanno qaaggo ikkitanno; dagganno dirrara ooso'neno, ‹Tini kinna mayinnite?› yite xa'mitanno'ne yannara,

⁷ ‹Magani'ne Kaaliiqihu Gondooru Taabooti, Waa fuli yannara Yordaanoosi lolaha agurino. Kunnira, tini kinna konne darga assinoonnire baala hegere geeshsha Israeelete mannira qulli assitanno qaaggooti› yitine kultinanninsa» yii.

⁸ Mannootuno, Iyyaasu hajajinonsa gede assitu; tonaa lamente Israeelete ga're su'minni Yordaanoosi Wayi giddonni 12 kinna haadhe abbite baxxisidhino qachira wortu.

⁹ Iyyaasuno qole, qeesootu Gondooru Taaboota dukke uurritu darga Yordaanoosi Wayi giddo 12 qaaggote kinna uurrisi. Hatti kinna techo geeshsha hakkiicho no.

¹⁰ Mannaho kulanno gede Kaaliiqi Iyyaasu hajajinosi garinni, baalunku coyi ikka geeshsha qeesootu Yordaanoosi Wayi giddo uurrite keeshshitu. Muse Iyyaasura uyino hajajono tenneeti. Mannuno rahe waa tayise fuli.

¹¹ Baalunku fule kaihu gedensaanni, Gondooru Taaboota dukkino qeesooti albaanni sa'e manna massaga hanaffu.

¹² Roobeelinna Gaadi ga're, qolteno Minaase ga're darati giddonni olamate qixxaawino manni Muse hajajinonsa garinni, mannaho alba ikkite fultu.

¹³ Insa giddonni fultinori 40,000 geeshsha ikkitino olanto, Kaaliiqi albaanni dirante Iyyaarko mule noo xawo fultu.

¹⁴ Hakko barra, Kaaliiqi assinohu dhaggete coyi Israeelete manni, Iyyaasu jawa albisa ikkinota wodanchanno gede assinsa. Muse ayirrisinte gede, Iyyaasuno lubbotenni hee'ri yanna baalantera ayirrisisi.

^15-16 Kaaliiqi Iyyaasu, «Gondooru Taaboota dukkino qeesooti Yordaanoosi Wayi giddonni fultanno gede hajaji» yiisi.

¹⁷ Iyyaasuno qeesoota, «Yordaanoosi Wayi giddonni fulle» yiinsa.

¹⁸ Qeesootuno fulte qacce iillitu yannara, wayi albinte gede qaccetenni qaccete geeshsha wo'me lolahi.

¹⁹ Umi agani eihunni tonnikki barra, mannu Yordaanoosi fule, Iyyaarkora soojjaati ragaanni Galgalaho baxxisi'ri.

²⁰ Iyyaasuno Yordaanoosi giddonni fushshinoonnita tonaa lamenta kinna masse Galgalaho kaasi.

²¹ Israeelootahono, «Albillittete ooso'ne, ‹Tini kinna mayinnite?› yite annuwansa xa'mituro,

²² ‹Israeele Yordaanoosi moola baatto aanaanni higge fultino.

²³ Ninke fullammo geeshsha Magani'ne Kaaliiqi Duumo Baara mooshshinte gede ki'ne fultini yannarano Yordaanoosi Waa albi'nenni mooshshino.

²⁴ Kunninni kainohunni baattote aana hee'ranno manni baalu Kaaliiqi wolqa mageeshshi geeshsha jawa ikkitino gede wodanchanno; ki'neno Magano'ne Kaaliiqa ayirrissinanni› yitine kullensa» yiinsa.