IYYAASU 2 - Qullaawa Maxaafa

IYYAASU IYYAARKO DOOYYITANNORE SOYI

¹ Hakkunni gedensaanni, Newe beetti Iyyaasu baatete haqqe batidhinowiinni Shixiimi yinanni qachinni 2 dooyyaano fushshe soyi. Insano, Kana"aani gobba sa'e roore anga Iyyaarkote Katama maaxante dooyyite higganno gede hajajinsa. Katama iillitu yannara, Reaabi yinanni gunnitte minira galtara e'u.

² Iyyaarkote moote Israeeletenni sonkoonni manni hakko hashsha hattenne gobba dooyyara einota macciishshi.

³ Reaabiwa sokka soye, «Minikkira eino manni baatto baalanta dooyyara dayinohona fushshite uyi» yiise.

^4-6 Iseno, «Mini'yara mannu ea halaaleho. Ikkollana, hiikkiinni dagginoreetiro diafoomma. Katamu huxxi waalchi cufamara albaanni arrishsho e'anna fulte hadhino; hiikkiira hadhannorono diafoomma. Ikkirono, rakkine hordoffiniro, amaddinara dandiitinanni» yite dawartu. Ise kayinni balaxxe lamenka dooyyaano minese noo qaaxi aanira giddisiisse, shalaalate nadalla giddo maaxxinonsa.

⁷ Mootete soqqamaano katamunni fulte hadhu. Katamu waalchino cufami. Soqqamaanosino dooyyitannore hassanni Yordaanoosi Waa fullanniwa massitanno doogo higge hadhu. Hassannori fulte hadhanni heedheennanni katamu waalchi cufami.

⁸ Dooyyaano goxxara albaanni mancho qaaxu iimira giddite,

⁹ «Kaaliiqi tenne baatto uyino'neta afoomma; ki'ne waajjino daafira gobbate noohu baalu daaqino.

¹⁰ Gibitsetenni fultine Duumo Baara tayissine sa'ini yannara, Kaaliiqi albi'nenni waa asse mooshshino garanna ki'neno Yordaanoosira soojjaatoonni co'o assitine guddinire 2 Amooraawete mootoolla Sewooninna Aagi assitinoonnita macciishshinoommo.

¹¹ Konne coye macciishshinummo yannara, wodaninke daaqino. Ki'ne waajjinoommo daafira, goontenke baala ba'ino. Kaaliiqi Magani'ne gordunna baattote Maganooti.

¹² Xaano ani ki'nera danchare assumma'nente gede, mini'ya manna baotewiinni gatisatenni danchare assitinannie gede xaarre"e. Kunnirano ammansiisanno malaate uuyye"e.

¹³ Anna'yanna ama'ya, labballo roduuwa'ya, meya roduuwa'yanna maatensa baalantanni gatissinanni gede xaarre"e. Ninke ba'neemmo gede assitinoontenke» yitunsa.

¹⁴ Insano, «Xaarroommohe qaale wonsha hoongummoro, Maganu reyotenni qorichishonke. Ninke assinoommore baala ayerano kula hoogittaro, Kaaliiqi tenne baatto ninkera sayise aannonke yannara, atera dancha coye assineemmo gede xaarreemmohe» yite dawartuse.

¹⁵ Reaabi heedhanno mini, katamunnihu kinchu huxxinni xaade minaminoho. Kunnira, konne lamenka mancho masikootete widoonni rarraansoonni siiwo cu'midhe eela higge dirritanno gede assitunsa.

¹⁶ Qolteno, «Kaa"a gaarrate widira higgine hadhe; hakkuyi ka'a kayinni, mootete soqqamaanonni xaaddinanni. Hakkiichono insa higgate 3 barri geeshsha maaxantine agarre. Hakkunni gedensaanni, doogo'ne ha'ra dandiitinanni» yite amaaltunsa.

¹⁷ Insano, «Xaarsiisoottanke; yoottatano macciishshinoommo.

¹⁸ Xa ati togo assi: Ninke baatto'ne horrineemmo yannara, tenne duumu heqichinni meqeerrinoonni siiwo ninke dirrisitta masikoote aana usuri. Annikkinna amakki, roduuwakkinna annikki fiixi baalunkuno mitteenni gamba yitine minekki ofoltine agarre.

¹⁹ Ayino mininni fule reyiro, so'ro umisita ikkitanno; ninkeno dixa'mammeemmo. Ate ledo mine noohura ayerano gawajjo iillituro kayinni, xa'mammeemmori ninkeeti.

²⁰ Ikkollana, konne assineemmo coye woleho kulittaro, xa'mokki garinni xaarroommo xaarora digiddaambeemmo» yituse.

²¹ Iseno, kunni coyira sumuu yite insa ha'rissu. Insa hadhuhu gedensaanni, meqeerrinoonnita duumu heqichi siiwo masikootete aana usurtu.

²² Dooyyitannorino, gaarrate iimira fulte maaxantu. Mootete soqqamaanono 3 barra wo'ma gobbate aana dooggate hasse hooggu. Kunni daafira, galagalte Iyyaarko higgu.

²³ Hakkunni gedensaanni, lamunku dooyyaano gaarrate aaninni dirrite waa fulte, Iyyaasuwa galagalte higgu. Ikkino coye baalankano kulte,

²⁴ «Hakkiicho heedhannori baalunku ninke waajjite hembeelantanni no. Kunnira, Kaaliiqi gobba baala ninkera uyinonke gede huluullo dinonke» yii.