ISAYAASI 9 - Qullaawa Maxaafa

ALBILLITTETE DAARA NOO MOOTE

¹ Ikkirono xa qarru giddo noore kunni ka'a mitiimma diamaddannonsa. Alba Zaabilooninna Nifitaalemi baatto shollite keeshshitino. Albillittete kayinni Yordaanoosira widoonni nooti daga heedhannoti Galiilu baatto ayirrinye haraqidhanno.

² Tunsote hee'ranno manni lowo xawaabba lai; reyote caali gobbara heedhannorira, caabbichu fuli.

³ Kaaliiqa, mannakki halashshootto; hagiirreno batisoottonsa. Mannikki ati assootto coyinni, gide gudhannohunna, horre abbi'rinore beeqqanno manni gede ikke hagiidhanno.

⁴ Midiyaamoota qeelitto yanna gede, xaano mannikki aana duunamino qambaranna, gadadissannonsarita siwiilu siqqo hiiqqootto.

⁵ Horritannori wodhitanno koattenna, mundeetenni burduuqaminohu imaaninsa baalu, haqqete gede giiramanno.

⁶ Kuneeti qaaqqu ilaminonke! Labbaa beettono uyinoonninke! Isino gashshaancho ikkanno; su'masino, «Dhaggete Amaalaancho, Wolqaataamo Magano, Hegere Anna, Keeru Roorricha» yinanni.

⁷ Wolqasira gawalo dino; gashshootisira hegere keeri wo'mino. Isino Daawiti mootimma amade, taashshe halaalunni gashshanno. Olantote Mootichi Kaaliiqi laala, konne coye assitanno.

KAALIIQI ISRAEELETE MANNA QORICHISHANNO

⁸ Kaaliiqi Yaiqoobi sircho Israeelete gosa, daara noonsa qoricha kule qorophisiisi.

⁹ Israeelete manninna Samaariyu Katamira heedhannori baalu konne coye Kaaliiqi assinota affino. Ikkollana boo'natenninna hettisamatenni,

¹⁰ «Xuubetenni seekkinoonni huxxi uwino; ninke kayinni galagalchine boncoonni kinnanni huxxi'neemmo. Odahete tuuqqano hiiqqaqqantino; ninke kayinni dargaho fila daguwa uurrisi'neemmo» yitanno.

¹¹ Kaaliiqi kayinni Tsiyooni Ilaalira insa aana bala tuganno diina kayisanno.

¹² Isino soojjaatinni Sooriyoota, galchiminni Filisxeemoota soye egemmitannonsa gede assi. Kunni baalu giddoonni hanqisi kayinni diqiidino. Angasi insa qorichishate ka'inowiinni dihiggino.

¹³ Qorichisheennansano Israeelete manni diaagintaawino; Olantote Mooticha Kaaliiqano dihasi'rino.

¹⁴ Kunnira, mitto barra Kaaliiqi umonna farro ikkitinorenna saattu sinanna shomboqqo ikkitinore Israeeletewiinni muranno.

¹⁵ Umoho yinanniri geerrahonna roorrootansaati; farroho yinannirino kapho rosiissanno himanaanooti.

¹⁶ Konne manna massaggannori baalu so'risiissannoreeti; mannuno doogotenni fule raataawino.

¹⁷ Kunnira, Mootichu wedellansa qorichishanno; galte shii'rino meentonna annanna ama afidhinokki ooso dimararanno; baalunku Kaaliiqira badhe wodhino. Afiinsanni fulanno coyi baalu xagarrote. Insa qorichishate angasi ka'inowiinni dihiggino; tenne giddoonnino hanqisi diqiidino.

¹⁸ Bunshensa giirate gede ittanno; dubboho qansoonni giira wiliile gede iima higge tunnuuqqanno.

¹⁹ Olantote Mootichi Kaaliiqi hanqino; hanqisino baatto baalate giirate gede buwanni no. Mannu giirranni haqqe gede ikkanno; rodoosi nafa gatisannohu dihee'ranno.

²⁰ Mitto widoonni afidhure baala ittanno; ikkeennano hude shitannonsa daafira reyitanno. Kunnira, uminsa ooso maala nafa ittanno.

²¹ Minaasenna Efireemi ilama mimmito gawajjitanno; mitteenni gamba yite Yihudaho gaaddanno. Kunni baalunni Kaaliiqi hanqi diqiidanno; insa qorichishate angasi ka'inowiinni dihiggino.