ISAYAASI 7 - Qullaawa Maxaafa

MOOTE AKAAZIRA KULLOONNI SOKKA

¹ Ooziya beetti Iyoaataami ilinohu Akaazi Yihudaho moohi yannara, Sooriyu moote Retsiininna Israeelete moote Remaaliya beetti Faaquhe ola kayissara hasidhe Yerusaalame daggu; ikkollana qeela didandiitino.

² Yihudu mootenna mannisi, Sooriyu Israeelete jaaloominota macciishshite, bubbe shashshaffino haqqi gede ikkite hembeelantu.

³ Kaaliiqi Isayaasira, «Atinna beettikki Shiaari-Yashuubi martine moote Akaazi ledo xaadde; isono imaana hayishshitannoriwa massitanno doogo aana aliidi kofame mule affinanni.

⁴ Xaadatto woyite, ‹Deantooti; wodanaa'mi; massooti; waajjitooti› yite xo'anni noo giira wiliile gedeere 2 mootoolla Retsiininna Remaaliya waajjannokki gede kulisi.

⁵ Sooriyu gosa Israeelete moote ledo afoo xaadde gano gante,

⁶ ‹Yihuda qanse, lamewa darre Xaabieeli beetti gashshannonsa gede assino› » yitanni no.

⁷ Ikkirono Mootichu Kaaliiqi, « ‹Malinsa darga digananno; hedonsano diwo'mitanno.

⁸ Mayira yiniro, Sooriyu umi Demaasiqotella; Demaasiqote umino mootensa Retsiiniiti; Israeeleno 65 diri giddo diigante billa biinxa fultanno.

⁹ Israeelete umino Samaariyaholla; mootensano Faaquheetilla. « ‹Amma'natenni kaajjitine uurra hoogginiro, horonta diheedhinanni yiino› » yoommo.

¹⁰ Kaaliiqi lede Akaazira,

¹¹ «Jeennaatu giddonnino ikko gordu iiminni mitto malaate eemmohe gede ane Kaaliiqa Maganokki huucci'ri» yiisi.

¹² Akaazi kayinni, «Malaate uyie yeeno dihuucci'reemmo; Kaaliiqano dijifeemmo» yii.

¹³ Isayaasino, «Ki'ne moote Daawiti ilama, macciishshe! Manna caacceessa'ne ajjeenna, Magano'ya hifachiishshini?

¹⁴ Kunnira, Mootichu umisi malaate aanno'ne; kuneeti seemo godobbe labbaa beetto iltanno. Su'mano, ‹Amaanueeli› yite fushshitannosi.

¹⁵ Isi bushanna dancha bade afanno yannara adonna malawo saga'lanno.

¹⁶ Kayinnilla qaaqqu bushanna dancha bade afanno yanna daggara albaanni waajjatto mootoolla lamenteti gobbansa diigante ona ikkitanno.

¹⁷ Israeele Yihuduwiinni baxxituhunni kayise anfe egenninoonnikki qarri ate, mannikkinna mootete mini annikkihu aana daanno. Kaaliiqino Sooriyu moote ki'ne gawajjanno gede soyanno» yii.

¹⁸ Hatte yannara Kaaliiqi xeertote gobbanni Abbayi Wayi qaccenni Gibitsete manna teennu hoshsha gede, Asoorootano bayirtino diishsho gede asse fiiqattotenni woshshanno.

¹⁹ Insano shaa'maltanni fulte halalla xeichaho, kinnate qarrira, utu giddonna lalu hosannowa dagge tuuddanno.

²⁰ Hatte yannara, Kaaliiqi Efiraaxisi Wayi widiidinni kirunni haa're abbanno milaacenni Asoori mootenni umo'ne, ereeda'nenna bisi'nera noo danancho baala meedanno.

²¹ Hatte yannara mittu manchira mitte addenna lame meicho calla heedhusirono, lubbotenni hee'ra dandaanno.

²² Tini saada uyitanno adonni hasi'rinore baala afi'ranno. Kunni garinni baattote aana gate noo manni baalu malawonna ado saga'lanno.

²³ Hatte yannara 1,000 kinchu birra fushshanno yine hendoonnihu 1,000 woyinete kaashsho kaansanni dargi utanna qu'muudo calla fushshanno.

²⁴ Baatto baalate utunna qu'muudo calla fultanno daafira, mannu maxxanna worbicho adhe ugaaxete fulanno.

²⁵ Alba loonse gide winxanni gaari baalaho utunna qu'muudo fulteenna waajje ayeno hakkiichira marannokki daafira, lalunna ge'reewu callu hosannowa ikkanno.