ISAYAASI 66 - Qullaawa Maxaafa

KAALIIQI YAANNO YOONNA AANNO HEXXO

¹ Kaaliiqi, «Gordu ayirrinyu barcima'yaati; baattono lekka'yanni kaxxeemmowaati. Anera mintinannie mini hiittoohoyya? Fooliishshi'reemmo dargino hiittooho?

² Konne baala kalaqoommohu aneeti; kuni baalunku aneho. Ani kayinni umosi heeshshi assinohuwa, masanno wodana afi'rinohuwanna, qaale'ya huxi're waajjannohu widira hige laeemmo.

³ Anera booto kakkaltannoeri manna shitannoreeti; ge'rechu wilii'licho kakkaltannori woshichu haxo qiqqishshannoreeti. Gidu fushshaate abbitannoeri manchaamete mundee shiqishshannoreeti; hixaana giirtannoeri kaphu maganna magansidhannoreeti. Uminsa doogo hadhanno; hattenne assitino battenni hagiidhitanno.

⁴ Ani woshshummo yannara yee yaa gibbe, coyi'rummo woyiteno macciishsha gibbe, busha coye assa doodhitino daafira, waajjishannoha busha coye aanansa dirriseemmo» yii.

⁵ Ki'ne waajjitinannisirinna hajajantinannisiri, Kaaliiqi yaannore macciishshe: «Ki'ne ammanantinoonnire ikkitinoonni daafira, gamu manni'ne ki'ne giwe, ledo'ne xaadara dihasi'ranno. ‹Hagiidhitinanna la'neemmona, hanni Kaaliiqi lowimmasinni gatiso'ne› yitanni qacifattanno'ne. Ikkollana insa uminsa irraabbe gattanno.

⁶ Kaaliiqi gibbannosire qorichishanna, katamahonna Qullaawu Mini giddo raare macciishshe!

⁷ «Qullaawu Katami'ya, gamaa'mitukkinni iltanno mancho gedeeho.

⁸ Togoo coye afenna macciishshe egenninohu nooni? Mitto barra ilantino gosa nooni? Tsiyooni kayinni gamaa'mitanni keeshshitukkinni iltanno.

⁹ Iltanno yanna iillitannose gede assoommota ila hooleemmoni? Godobbanno gede assoommotera otootto cufeemmoni? Konne coye coyi'roommohu ani Kaaliiqaati» yii.

¹⁰ Yerusaalame baxxinanniri tashshi yoo'ne! Ise daafira wi'litinanniri ledose hagiidhe!

¹¹ Amasi unuuna qane duuwe hagiidhanno qaaqqi gede, ki'neno Yerusaalamete jironni qawaaxxidhinanni.

¹² Kaaliiqi, «Gooffannokki jiro eemmo'ne; dagate jirono xo'annokki buicho gede asse lolaaseemmo'ne; ama giwoodisera hanqaffe qansitanni lossidhanno qaaqqi gedeere ikkitinanni.

¹³ Ama qaaqqose dogisiisidhannohu gede, anino ki'ne Yerusaalamete hagiidhitinanni heedhinanni gede asseemmo'ne.

¹⁴ Kuni coyi ikkanna affinanni yannara hagiidhitinanni; Kaaliiqi ki'ne latise jawaantenna fayyimma aanno'ne. Hakkunni gedensaanni hajajantannoere kaa'leemmotanna, baarigaarra'yara kayinni hanqeemmota affinanni» yii.

¹⁵ Kune Kaaliiqi wolqaataamu hanqisinni baarigaarrasi rabbisi'raranna, wala yitanno giiranni rufara daanno; faradi gaaresino hombobolattete gede buubbanno.

¹⁶ Kaaliiqi, manna baala giiratenninna bagadunni qorichishanno; lowo manna shee gudanno.

¹⁷ Kaaliiqi, «Manchaame, yemahenna wole batte ikkinore ittannori baalu insa giddonni mitto ha'runsite gatira hadhe magansi'rate, insanaa badde keereensidhannori baalu mitteenni gooffanno.

¹⁸ Anino loosonsanna hedonsa afoommo daafira, gosa baala gamba assammora dayemmo; gamba yite dagganno woyite ayirrinye'ya affanno.

¹⁹ Qorichishoommonsahu ane ikkoommotano affanno. «Ikkollana, insa giddonni shiima manna gatise, ane ewelumma egentinokkiriwanna ayirrinye'ya affinokkiriwa addi addi gosawa: Terseesi, Liibiya, olte sodhannokki gosawa Liidiya, Tubaalinna Giriike soyemmo. Tenne gosara ane ayirrinye kultanno.

²⁰ Insa roduuwa'ne baala gobba gobbantenni farado, faradi gaare, gaare, gaangootanna gaala gulufisiisse anera afanshu gede assite Qullaawu Ilaali'yawa Yerusaalame haadhe abbitannoe. Insa haadhe abbitanno Israeelooti gidu fushshaate lagaawinokki uduunnichira worre anera Qullaawu Minira haa'ne abbinannihu gede assite uyitannoe.

²¹ Anino insa giddonni gama qeesenna Leewaawoota asseemmo. Konne coye coyi'roommohu ani Kaaliiqaati.

²² «Ani Kaaliiqi kuleemmo'neri: Kalaqeemmori haaru gorduwanna haaro baatto ane wolqanni kaajjite heedhannonte gede, sirchi'nenna su'mi'neno ane wolqanni kaajje hee'ranno.

²³ Mittu Agani Leellihunni kayise daanno Agani geeshshanna, mittu Fooliishshote Barrinni kayise daanno Barri Fooliishshonnihu geeshsha Haaro Yerusaalamera magansidhaera dagganno.

²⁴ Fulte hadhanno woyite anera hajajama gibbe reyitinori reeshsha la'anno. Hakkore ittanno da'muulla direyitanno; ittannonsa giirano dixo'anno; laihu baalu shagaggi'rannonsa» yii.