ISAYAASI 60 - Qullaawa Maxaafa

HAARO YERUSAALAME

¹ Yerusaalame! Caabbichikki dayinona ka'e xawisi'ri; Kaaliiqi ayirrinyino aanakki xawanno.

² Kune tunsichu baatto, beebbu tunsichino daga beeshshe amadanno; Kaaliiqi ayirrinyi kayinni ate aana arrishshote gede xawanno.

³ Daga caabbichikkiwa, mootoollano soodimari xawaabbikkiwa dagganno.

⁴ «Haxo gotti yite qooxeessikkira noo ikkito lai; baalunku gamba yite atewa dagganno. Labballiti oosokki xeertote gobbanni higganno; seennekkino bayi'ne haa'ne abbinanni.

⁵ Atino konne coye la'e hagiidhatta; hagiirru batinyinni kainohunni wodanikki hisatanno. Baaru giddo noo jironna, dagate jajji baalu atewa daanno.

⁶ Midiyaaminninna Efa yinanniwiinni dagganno gaalaasine baatto'ne wo'mitanno. Culkanna hixaana haadhe Saabanni dagginori baalu, Kaaliiqi galata lallabbe kultanno.

⁷ Qeedaari ge'reewinna, Nebayootiti ge'reewu gocca kakkalantara atewa dagganno. Kuri Kaaliiqira tashshi yitanno kakkalo ikkitanno; isino Qullaawa Minesi albinni roore ayirrado assanno.

⁸ «Gomichu gede ikkite hadhanno markabbanna, minisira higanno lembooli gede ikkite buubbannori kuri ayeooti?

⁹ Israeelete Qullaawi Magani'ne Kaaliiqi, ayirrisino'ne daafira isi ayirrinyira yite, Terseesi markabba ooso'ne birrinsanna culkinsa ledo, xeerto gobbanni haadhe abbitanno.

¹⁰ «Ani hanqe qorichishoommohe; xa kayinni marareemmohe. Allaggikki huxxakki huxxitanno; mootoollansa soqqantannohe.

¹¹ Daganna mootoollansa jironsa haadhe abbitannohe daafira, waalchuwakki hashshanna barra dicufantanno.

¹² Atera hajajantannokki gosanna, gashshootu baalu co'o yee ba"anno.

¹³ «Qullaawu Mini'ya noo darga biifisate, Libaanoosi daguwi, asita yinanni haqqanna hoomme dagganno gede asseemmo; lekka'ya kaddino darga ayirrado asseemmo.

¹⁴ Gadadissannoheri ooso atewa dagganno yannara, umo heeshshi yite ayirrissannohe. Mishshinoheri baalu lekkakki hunda guluphitanno; ateno, ‹Israeelete Qullaawa ikkinohunnihu Kaaliiqi Katami Tsiyooni› yitannohe.

¹⁵ «Kunni albaanni gimbeennahenna minsheennahe, mulekkiinni hige sa"annohu nafa nookkiha hee'rootta. Xa kayinni ilama baala hegerera hexxitannohetanna, hagiidhitannoheta asseemmohe.

¹⁶ Oososera unuuna qansitanno ama gede, ate daganna mootoolla towattannohe. Atino ani Kaaliiqi gatisaanchokkinna wodeemmoheha, wolqaataamo Yaiqoobi Magano ikkoommota afatta.

¹⁷ «Camote darga culka, siwiilu darga birra, haqqu darga camo, kinchu darga siwiila abbeemmo. Gashshaanokki gadadissuhekkinni, keerunninna halaalunni gashshitannohe gede asseemmo.

¹⁸ Kunni ka'a gobbakkira qarru raare dimacciishshinanni; dannikkirano baonna diigama diheedhanno. Ani huxxa ikke gargareemmohe; agareemmohe; atino gatisoommohe daafira galatattae.

¹⁹ «Kunni ka'a barrira arrishsho, hashshira aganu dihasiisannohe. Ani Kaaliiqi hegere xawaabba ikkeemmohe; ayirrinyi'yano ate aana xawanno.

²⁰ Ani Kaaliiqi hegere xawaabbakki ikkeemmo daafira, arrishsho horonta dixo'annohe. Aganuno ditunsannohe; qarrikkino hakko gawa'lanno.

²¹ Mannikkino keeraancho ikkanno; baattono hegere geeshsha ragi'ranno; galattannoe gede insa kalaqoommohunna kaasoommohu aneeti.

²² Insa giddonni ajjino ilama kume, wo'munkura maa'ne ikkitinori, wolqaataame gosa ikkitanno; ani Kaaliiqi kuni coyi yannasinni rahe wo'manno gede asseemmo» yii.