ISAYAASI 58 - Qullaawa Maxaafa

HALAALAANCHO QATUMA

¹ Kaaliiqi, «Qoonqokki naggi assite coyi'ri! Qoonqokki xurumbunnite gede naggi assi! Manni'yara Israeelete assitino bunshenna cubbonsa kuli.

² Insa kayinni barru barrunkunni hasidhannoe; doogo'ya afate halchitanno. Halaale loosino manninna, Maganinsa seera agurtinokkiri gede, halaalaancho yoo xa'midhannoe; ane Maganinsawa shiqqi yaa baxxanno» yii.

³ Mannuno, «Kune ninke ita aga agurroommo; ati kayinni dilaoottonke. Ati la"attokkiha ikkiro, mannimmanke mayira shotinseemmoyya?» yaanno. Kaaliiqi qole, «Ita aga agurtinanni yannara, wodani'ne halcho wonshitinanni; soqqamaano'neno gadadissinanni.

⁴ Ita aga agura'nera gawalo, gibbonna ganansho ikkitino daafira, mimmito'ne marartinikkinni tuntummotenni gantinanni. Kunni garinni qatuntinanni qatuma, huuccatto'ne gordoho macciishshinannikki gede assitanno.

⁵ Ita aga agurtinanni yannara, manninate'ne shotissinanni. Umo'ne shomboqqote gede heeshshi assitinanni; buluulo giggishshidhine, xiddu imaana kadhitine goxxinanni. ‹Ita aga agurroommo› yitinannihu konneeti? Ani kunni gari qatuma baxeemmoha lawanno'neni?

⁶ Ani baxeemmo qatuma gadado hooltinanni gedeeti; halaale dawisa agurtinaraati; qambara hiiqqitine kadantinore fushshitinanni gedeeti.

⁷ Sagale'ne hudidhinori ledo beeqqitinanni gede, galannowa hooginoha mine'ne gashshitinanni gede, kallinoha uddisiissinanni gede, kaa'lo hasi'ranno fiixi'nerano alba shawwu yitinannikki gedeeti.

⁸ Hatto assitiniro caabbichi'ne bakkalchu gede ikke xawanno; hurreno rakke dagganno'ne. Halaalaanchimma'ne alba'neenni hadhanno; Kaaliiqi ayirrinyino badheenni hee're agaranno'ne.

⁹ Kunni garinni heedhine huuccidhiniero, anino huuccatto'ne macciishsheemmo. Kaa'lo hasidhine raartinanni woyite, raare'ne hidheemmo. «Gadadisa'ne agurtiniro, manna arrassanna bunshe coyi'ra uurrissiniro,

¹⁰ hudidhinorira sagale itissiniro, qarrantinore kaa'litiniro, doyisse noo'ne tunsichi xawaabbaho soorramanno'ne. Hashshino'nehu barri gede ikke xawanno'ne.

¹¹ Wo'manka woyite ani albaanni ha'reemmo'ne; moollete gobbara kassi asseemmo'ne; gogi'nera fayyimmanna jawaante eemmo. Waa hayikkinsanni baattonna, moolte egentinokki buicho gedeere ikkitinanni.

¹² Ki'ne manni'ya diigaminore baala galagalchitine uurrissinanni; kunnira, ‹Huxxa galagalche huxxannohonna, diigantino minnano layinkimeeshsho minanno mannaati› yinanni'ne» yii.

FOOLIISHSHOTE BARRA AYIRRISATENNI DAGGANNO MAASSO

¹³ Kaaliiqi, «Fooliishshote Barra umi'ne doogo ha'ra agurtine ayirrissiniro, umi'ne hasatto calla wonshanna haafare coyi'ra agurtiniro, Fooliishshote Barra hagiirrunniha assidhinironna, Qullaawa Barra'ya ayirrissiniro,

¹⁴ ane egenna'nenni hagiirraamma ikkitinanni; gobba baalantera ayirradda asseemmo'ne. Anni'ne Yaiqoobira oommo baattonni fulanno jajjinni, duubbinanni gede asseemmo'ne. Konne coye coyi'roommohu ani Kaaliiqaati» yii.