ISAYAASI 53 - Qullaawa Maxaafa

¹ Mannu, «Ninke coyi'neemmore ayi ammananno? Kaaliiqi wolqano ayera leeltino?

² Kaaliiqi soqqamaanchi albasiinni, moola baattora mu'rino haqqichi rumushshi gedeeho. Illetenni la"ate xummenna gaamaarre diafi'rino; mootete gede la'ne banxanni dani dinosi.

³ Mannu mishinosihonna giwinosiho; xissonna qarru amadinosi. Mannu mishe alba shawwu yiinosi; ninkeno diayirrinsoommosi.

⁴ «Halaalinta ninke dhibba isi doyisse adhino; xissonkeno isi duqqino. Ninke kayinni Maganu hanqe qorichishinosihu gede assine kiirroommosi.

⁵ Isi qasaminohu kayinni saonke daafiraati; ganaminohu ninke assinoommo sarxiraati. Ninke gantoommohu isi qorichishameennaati; hurroommohuno isi madi'reennaati.

⁶ Ninke wo'munku ge'reewu gede billaalline ba'noommo; baalunku umi uminke doogo hinge ha'noommo; Kaaliiqi kayinni ninke sao isi aana worino.

⁷ «Iso gadadunna qarru amadinosi; ikkeennano cuqqi curuqqi diyiino. Gorrinara haa'ne ha'nanni wilii'lichinna, orda hanxanni ge'rechi gede, afoo fa'nannokkiha sammi yiino.

⁸ Qarrinse halaaleno beeshshine haa'ne ha'noonnisi; manninke cubbi daafira yeenna shinoonnisita, ilamate giddonni coyi'rannohu nooni?

⁹ Mitte bunsheno assikkinni, afiisinnino sao coyi'rikkinni, cubbaataammu ledo kiirroonnisi; dureeyyete ledo madaarroonnisi» yii.

¹⁰ Kaaliiqi, «Ikkirono xissannosi gedenna qarramanno gede assoommohu aneeti; lubbosi sao agursiisate kakkalo assino. Dirisi seedeenna laalchosi illetenni la"anno; ani hedoommorino isi widoonni hige wo'manno.

¹¹ Keeraanchu soqqamaanchi'ya lubbosi qarrantuhu gedensaanni, heeshshote xawaabba lae hagiidhanno. Egennosinnino lowo manna keereensanno; saonsano duqqanno.

¹² Lubbosi reyote sayise uyino; bunshe assitannori ledo kiirroonnisi. Ikkeennano lowo manni cubbo duqqino; sao assitinori daafira araara eanno; jajjabbu ledo dilaalasi eemmosi; wolqaataammu ledo horro beeqqanno» yii.