ISAYAASI 51 - Qullaawa Maxaafa

YERUSAALAME JAWAACHISHANNO QAALE

¹ Kaaliiqi, «Anenna gatisaanchimma'ya hasidhinanniri macciishshe! Fance haa'noonni'ne kinchonna, umme fushshinoonni'ne bale qaagge!

² Anna'ne Abirihaaminna iltino'neta Saara qaagge! Abirihaami woshshummosi waro mittichosiiti; ikkollana kune maassi're sirchosi batisoommo.

³ «Ani Yerusaalame diggi asseemmose; diigammeseno lae marareemmose. Halallimmase Edenete gedeeta, moolleseno Gannatete gedeeta asseemmo; hagiirrenna qawaaxxo eemmose; giddose galatu faarso macciishshinanni.

⁴ «Manna'ya macciishshe! Macca'ne ane widira qolle! Seeru anewiinni fulanno; yoo'yano daga baalate caabbicho ikkitanno.

⁵ Rahe daye gatiseemmo'ne; ani qeeleemmo barri iillino; wolqa'yanni daga baala gashsheemmo. Giddichuwate heedhanno gosa, gatisammonsara ane agadhitanno; wolqa'yano hexxitanno.

⁶ Ille'nenni iima higgine gordo, uulla qoltine baatto la'e! Gorduwa wiliilete gede billaallite ba'anno. Baattono uddanote gede akkaltanno; aanase heedhannori baalu bookkete gede ikkite gooffanno; ane gatisaanchimma kayinni hegerete; gatisa'yarano gawalo dino.

⁷ «Ki'ne halaalaancho coye egentinoonnirinna, seera'ya wodani'nera wodhitinoonniri, ani yeemmota macciishshe"e! Mannu mishanno'ne woyite waajjitinoonte; xonneenna'neno massinoonte.

⁸ Insa bile ittino uddano gede ikkite gooffanno; halaalaanchimma'ya kayinni hegerete; gatisaanchimma'yano ilamate ilamara sa'annote» yii.

⁹ Kaaliiqa ballo kai! Ka'e wolqakki leellishi! Albi ilamara assittonte gede kainke! Reaabi murmuroottohu ateeti.

¹⁰ Gatisoottonsari giddoonni higge sa'anno gede, lowo baara mooshshite, giddosiinni doogo fushshoottohu ateeti.

¹¹ Ati Kaaliiqi gatisoottonsari faarsitanni Yerusaalame higganno; hegere hagiirre haraqidhanno. Hagiirrenna hisanyoote afidhanno; yaaddonna dadillu insawiinni xooqanno.

¹² Kaaliiqi, «Wodana'ne diggi asseemmohu aneeti; hayissote gede rahe moolannohanna, reyara noo manna mayira waajjitinanniyya?

¹³ Baatto xintoommohanna gorduwa diriirsoommoha, kalaqaancho'ne ane Kaaliiqa habbinoonni. Gudda'nera ka'inoriha kaajjaddu hanqo waajjitinoonni; kunni ka'a insa hanqi assanno'neri dino.

¹⁴ Usuranyootuno rahotenni tidhantanno; usurantino bale giddo heedhe direyitanno; ittanno sagaleno dihoogganno.

¹⁵ Dambalu luulanno gede baara shafeemmohu, Magani'ne Kaaliiqi aneeti; su'mi'yano Olantote Mootichi Kaaliiqaati.

¹⁶ Gorduwa diriirsoommohunna baatto xintoommohu aneeti. Tsiyoonino, ‹Ati manna'yaati› yeemmo; qaale'ya afiikkira woroommo; ateno anga'ya caalinni goloommo» yii.

KAALIIQIHA HANQU FINIINCHO

¹⁷ Gaggassannoha hanqu finiincho, Kaaliiqi anganni adhite cingiishshi'roottati Yerusaalame, Baqqi yii; ka'e uurri!

¹⁸ Ilootta ooso giddonni, massagannohehu horonta dino. Lossi'rootta ooso giddonni, anga amade haa're ha'rannohehu mittuno dino.

¹⁹ Lame ero qarri daannohe; baonna goofo, hudenna bagadu amadannohe. Ledokki manchitannohu nooni? Sheshifachishannohehuno ayeti?

²⁰ Oosokki woshshaado amaddino bullichi gede, shaqqite madde baalate ubbino. Kaaliiqi hanqinna, Maganikki rufa dirrite amaddannonsa.

²¹ Kunnira ati dimbisannore agittakkinni, qarru dimbisinoheti macciishshi.

²² Ha'lannohehu Magani'ne Mootichu Kaaliiqi, «Dimbino manchi gede gaggassannoha, qarru finiincho angakkinni haa're hooleemmo. Kunni ka'a, hanqi'ya finiincho cingiishshi'ratta gede diasseemmohe.

²³ Xaate konne finiincho ate anganni hoole, ‹Aanakkiinni ha'neemmona barxa yii› yitanni qarrissannoherira eemmo. Atino aanakkiinni hadhanno gede badhekki, baattotenna doogote gede worootta» yii.