ISAYAASI 50 - Qullaawa Maxaafa

ISRAEELETE CUBBONNA KAALIIQI SOQQAMAANCHI HAJAJAMA

¹ Kaaliiqi, «Galtesi fushshe hunanno manchi gede, ani ki'ne manna'ya fushshe hunoommoha lawi'ne? Hatto ikkiro fushshe ha'risa'ya kultanno taje hiikko nooyya? Mannu oososi borojjimmate hirannohu gede, anino ki'ne qafadote hire aguroommoha lawi'ne? Ki'ne qafadantinoonnihu cubbi'nenniiti; darantinoonnihuno assitinoonni saonniiti.

² Dayummo woyite ki'ne dargaho mayira hooggini? Woshshummo yannara yee yaannohu mayira hoogi? Ani gatisa didandeemmoho? Gatisate wolqa dinoeni? Ani rufummoro baaru moolanno; ha'ranno waa moola baattora soorreemmo; qulxu'mu waa hooge ree bowanno gede asseemmo.

³ Gorduwa xiddu uddano gede, kolishsho asseemmo» yii.

⁴ Wolqa hoogginore jawaachisheemmo gede, Mootichu Kaaliiqi coyi'reemmore kulinoe; soodimaroho baqqi yee, rosiisannore macciishsheemmo gede assannoe.

⁵ Mootichu Kaaliiqi wodanu macca faninoe; anino haxawarre isiwiinni difafoommo.

⁶ Gantannoerira badhe'ya oommo; ereeda'ya cirtannorira baqqaalla'ya qoloommo; xontannoerinna malxifattannoeriwiinni alba shawwu diyoommo.

⁷ Mootichu Kaaliiqi kaa'lannoe daafira disholleemmo; alba'ya dhinqu kinchi gedeeha assoommo; saalfateemmokkitano afoommo.

⁸ Keereensannoehu mule'ya no; yekkeerannoehu ayetiyya? Nooha ikkiro hanni shiqe garossieyya!

⁹ Ha'lannoehu Mootichu Kaaliiqaati; yekkeerannoehu ayeti? Yekkeertannoeri bile ittino imaani gede ikkite gooffanno.

¹⁰ Ki'ne giddo Kaaliiqa waajjannohunna, isi soqqamaanchi yaannore macciishshannohu ayeti? Tunsichoho hee'rannohu xawaabba afi'rinokkihu, Kaaliiqa addaxxo; Maganosi irki'ro.

¹¹ Woleho giira qassinannirinna bushshitinanniri, qassinoonnitinna bushshitinoonni giira qolte ki'ne ittanno; konne qorichano Kaaliiqi anganni adhitinanni.