ISAYAASI 46 - Qullaawa Maxaafa

BAABILOONI MAGANNA SHOLLITU

¹ Beelinna Nebo yinanniri Baabilooni maganna heeshshi yitanno; misillansa saadate badhera hogombanni; harreno hogowu ayirreenna daafurtanno.

² Baabilooni maganna hoo'la dandiitinokki daafira, alba higge gombisante ubbu; qafadante hadhu; insara hakkiichi gawalo ikki.

³ Kaaliiqi mannisira, «Ama'ne godowira heedhineenna duhoommo'nerinna, kaa'loommo'neri Yaiqoobi ooso macciishshe"e.

⁴ Geedhitine awuubbina geeshsha, duheemmo'nehu aneeti; ani kalaqoommo'ne; qoleno towateemmo'ne; kaa'leemmo'ne; gatiseemmo'ne.

⁵ «Ane aye ledo taashshitinannie? Aye ledo mitto assitine kiirtinannie?

⁶ Mitu ogoronsa fante culka lolaassanno; birrano keenaasinchoho keentanno. Magansi'nanni misile seekkannonsa gede, siwiila tumannohura woxe uyitanno; seekkinoonni magannara kumbuultanni magansidhanno.

⁷ Haadhe qoteho duqqitannonsa; misillano worroonniwa mitto bayicho uurrite heedhanno; noo darginni milli diyitanno. Qarrante huuccidheenna dawaro diqoltannonsa; mittu qarrinnino gatisse diaffanno.

⁸ «Ki'ne cubbaataammu, konne coye habbinoonte! Wodani'nera wodhe.

⁹ Bi're hundinni kayise ikkino coye qaagge; ani callu Maganoho; ane agurranna wolu magani dino; ane gedeeha wole dianfanni.

¹⁰ Ikkanno coye baala balaxe kuloommo; ikkara nooreno alba asse coyi'roommo; ani ikkanno yoommori ikkanno; anino hedoommore asseemmo.

¹¹ Soojjaatinni hawulukannoha allamurchu gedee mancho soyemmo; isino ani hedoommore wonshanno. Anino coyi'roommore asseemmo; hedoommoreno wonsheemmo.

¹² «Ki'ne keeraanchimmatewiinni xeertidhinoonniri, hettisamaano macciishshe!

¹³ Keeraanchimma'ya abbanni noommo; barruno dixeerti'rino; gatisaanchimma'yano difaffino. Yerusaalameno gatiseemmo; Israeeleteno ayirrinye'ya uddisiiseemmo» yiino.