ISAYAASI 45 - Qullaawa Maxaafa

KAALIIQI QIROOSIRA SOYINO SOKKA

¹ Kaaliiqi Qiroosi doodhi; daga gashshanno gede wori; mootoolla mulqanno gede soyinosi. Mittu nafa gatikkinni, katammate waalchuwa baala fanannosi. Kaaliiqi Qiroosira,

² «Ani albakkiinni ha'ranni, ilaalla diige taalo darga asseemmohe; camotenni seekkinoonni cufanna hiiqqaqqeemmo; siwiilu waawannano cancaneemmo.

³ Tunsote maaxante heedhanno jiro eemmohe; hakkunni gedensaanni, su'mikkinni woshshoommohehu, Israeelete Magani Kaaliiqi ane ikkoommota afatto.

⁴ Doodhoommore manna'ya Israeele kaa'latto gede, ati ane egenna hoogittoro nafa su'mikkinni woshsheemmohe; ayirrado su'mano eemmohe.

⁵ «Ani Kaaliiqaati; ane agurranna wolu magani dino; ati ane egenna hoogittoro nafa wolqa eemmohe.

⁶ Hatto asseemmohuno, soojjaatinni galchimi geeshsha noo gosa, ani callu Kaaliiqa ikkoommotanna, ane agurranna wolu nookkita affanno gedeeti.

⁷ Tunsichonna xawaabba kalaqeemmo; gadadonna qawaaxxo abbeemmo. Konne baala asseemmohu ani Kaaliiqaati.

⁸ Ki'ne gorduwa, keeraanchimma xeenu gede iiminni dirrisse! Gomichuno kikkiifona. Baattono fa'nanto; gatonna keeraanchimma lophito. Konne baala asseemmohu ani Kaaliiqaati» yii.

KAALIIQI KALAQAMAHO ANNAHO

⁹ Kaaliiqi, «Loosaasinchu ledo hettisamannohura aanne'e! Doru uduunnichi ganannoha, ‹Ma assitanni nootto? Ogimma dinohe!› yee afannoni?

¹⁰ Woy beettu annasinna amasi, ‹Togooha mayira iltinie?› yee xa'mannoni?

¹¹ Qullaawu Israeelete Magani, kalaqaanchu Kaaliiqi, ‹Ooso'ya daafira xa'mitinaeranna, looseemmore kultinaera dandiitinannini?

¹² Baatto kalaqe, mannano aanase hee'ranno gede assoommohu aneeti; gordo anga'yanni diriirse, aanaho beeddahe diroommohu aneeti.

¹³ Qiroosi keeraancho looso loosanno gedenna, hedo'ya wonshanno gede kayisoommo; doogono qineesseemmosi. Katama'ya Yerusaalame galagalche minanno; qafadame nooha manna'yano tiranno; konne assannohuno uyinannisiri hee'reenna di"ikkino. Konne coye coyi'roommohu ani Olantote Mootichaati› » yii.

¹⁴ Kaaliiqi Israeelete, «Gibitsennitinna Itiyophiyu jiro ateta ikkitanno; hojjaameeyye Saaba manni daye ki'nera borojje ikkanno; anga uyite, ‹Maganu ki'newalla no; iso agurranna wolu magani dino› yitanno» yii.

¹⁵ Gatisaancho Israeelete Magano! Ati atenee mannaho maaxootto.

¹⁶ Magansi'nanni misilla seekkitannori baalu saalfattanno; irraabbanno; baalunku mitteenni shollitanno.

¹⁷ Ki'ne Israeele kayinni hegere gatisaanchimma Kaaliiqi aanno'netenni gattinanni; hegerera saalunna shollinyu diamadanno'ne.

¹⁸ Gorduwa kalaqinohu Kaaliiqaati; baatto seekke kalaqinohunna xintinohu isooti; kalaqinosehu fano heedhara ikkikkinni, mannu hee'ranno gedeeti. Isino, «Ani Kaaliiqaati; ane agurranna wolu Magani dino.

¹⁹ Maaxe tunsichu giddo dicoyi'roommo; Yaiqoobi sirchira, ‹Hasidhe"e› yoommohu mulla haafa di"ikkino; ani Kaaliiqi halaale coyi'reemmo; taalo coye lallawe kuleemmo.

²⁰ «Addi addi gobbara billaallitinoonniwiinni higginoonniri baalu, gamba yitine amme! Haqqu maganna duqqite doyitannorinna, gatissannokki misilla huuccidhannori egenno diafidhinoreeti.

²¹ Daggine coye'ne yoote darga hasaaphe; hanni coye affinori amaalantona. Alba balaxe coyi'roommohu, Ani Kaaliiqaati. Ane agurranna keeraanchunna gatisaanchu Magani wolu dino.

²² «Ane agurranna wolu magani nookki daafira, baattote qacce geeshsha heedhinoonniri baalu, anewa daggine gato afidhe.

²³ Umi'yanni xaare soorrantannokkita halaalu hexxo eemmo; kunnira guluchu baalu anera guluphanno; arrawu baaluno ane su'minni xaaranno.

²⁴ Mannuno, ‹Keeraanchimmanna wolqa Kaaliiqiwa no› yee coyi'ranno; gibbannoeri baalu anewa dagge saalfattanno.

²⁵ Israeelete sircho ikkinohu baalu, ane Kaaliiqinni qeellenna ayirrinye afi'ranno» yii.