ISAYAASI 39 - Qullaawa Maxaafa

BAABILOONINNI DAGGINO SOKKAANO

¹ Hatte yannara Baabilooni moote Balaadaani beetti Merodaaki-Balaadaani Hiziqiyaasi dhiwame hurinota macciishshe, afanshu ledo borrote sokka soyisi.

² Hiziqiyaasino sonkoonni manna danchu albinni haa'rinsa. Mootete mine noo jajja baala: Birra, culka, qimamma, shitto, olu bagadonna maanxoonni uduunne baala leellishinsa. Mootete minenna gashshootisi giddo noo jiro mitteno gattukkinni leellishi.

³ Hatte yannara ani Isayaasi moote Hiziqiyaasiwa daye, «Kuni manni maminni dayinoho? Ma kulihe?» yee xa'moommo. Hiziqiyaasino, «Insa xeertotenni Baabilooni gobbanni daggino» yee dawarinoe.

⁴ Anino, «Mootete mine ma la'u?» yee xa'moommo. Isino daware, «Baalankare la'ino; uduunnu mine noori giddonni leellishoommonsakkiri dino» yii.

⁵ Anino Hiziqiyaasira, «Olantote Mootichi Kaaliiqi:

⁶ Akaakkakki techo geeshsha duuntinoti mootete mine noo jiro baala mitturino gatikkinni mucuqqi yite Baabilooni hadhanno yanna dagganno.

⁷ Oosokki giddonni gamu qafadante hadhe Baabilooni mootete mine mureeyye ikkite soqqantanno» yee kuloommosi.

⁸ Hiziqiyaasino, ani noommo geeshsha keerella ikkannona yee hedino daafira, «Kaaliiqi soyennahe dagge kuloottoe coyi danchaho» yii.