ISAYAASI 37 - Qullaawa Maxaafa

MOOTE HIZIQIYAASI ISAYAASI MALA XA'MI'RI

¹ Moote Hiziqiyaasi konne coye baalanka macciishshe, dadillunni uddanosi dare, xiddu uddano uddi're Kaaliiqihu Qullaawu Minira ha'ri.

² Isino, mootete mini gashshaancho Eeliyaaqeemi, borreessaancho Shebinanna qeesootu giddonni umo umo ikkitinore ane Isayaasiwa soyi. Insano xiddu uddano uddidhe dagge,

³ «Ninkera tini qarrunna shettote yannaati; ilate yanna iilliteenna niixxe fushshi'ra hooggino mancho gede ikkine hee'noommo.

⁴ Asoori moote Heeshshote Magano xonara roorricha soyino. Maganikki Kaaliiqi konne coye macciishshe xoninoha qorichishannoha ikkanno. Kunnira hanni manninke giddonni gatte lubbotenni heedhannori daafira huuccinke» yitue.

⁵ Anino tenne sokka macciishshe,

⁶ «Kaaliiqi, ‹Asoori moote soyino ooso xontinoe xono daafira waajjitooti.

⁷ Gobbasira dudumbanni duduwinni hembeelaminoha asseemmosi. Hakkiichinnino galagale ha're gurcho reyo reyanno› yiino» yoommonsa.

ASOOROOTU WOLE SEYANYOTE SOKKA SOKKU

⁸ Asoori gaadaanni moote Lakiishinni agure ha're Libina Katamira olamanni noota macciishshe, isino hakkiichira ha'ri.

⁹ Qoleno Itiyophiyu moote Tirihaaqi albisanna dagginoti Gibitsete olanto qassasira gugguuffanni noota Asoorootu macciishshitu. Asoori mooteno konne coye macciishshe, Yihudu moote Hiziqiyaasi,

¹⁰ «Hexxatto magani, ‹Yerusaalame Asoori moote angara die'anno› yaanni dogoonkehe.

¹¹ Asoori mootoolla mitte gobba hunate hasidhuro hiitto assitannoro afootto. Atino hakkiichinni gatattoha lawannoheni?

¹² Akaakka'ya Goozaani, Kaaraaninna Retsefini katamma huntino. Telaasaari heedhannota Edeni gosano guddino. Kuni duuchu ikkanna magannansa giddonni mittuno kaa'lansara didandiino.

¹³ Hamaati, Arfaadi, Sefariwayimi Henainna Iiwa katamma mootoolla hanni mama nooyya?» yitanno sokka soyi.

HIZIQIYAASI HUUCCATTO

^14-15 Moote Hiziqiyaasi sokka haa're nabbawihu gedensaanni, Qullaawu Minira haa're masse Kaaliiqi albaanni wore,

¹⁶ «Olantote Mooticha Israeelete Magano, kirubeelira iimaanni ofolloottohu ateetilla. Gobba baalate gashshootira gashshaanninna Maganu ate callaati. Gordonna baatto kalaqoottohu ateeti.

¹⁷ Magano! Senaakireemi ate Heeshshote Magano xonihe gara lai!

¹⁸ Magano! Asoori mootoolla lowo gashshoote gudde baattonsano mulla assite agurtinota anfoommo.

¹⁹ Maganna ikkitinokkita haqqanna kinna angansanni bocce seekkidhinota tenne gosa misilla Asoorootu giirte huntino.

²⁰ Kaaliiqa Maganonke, ati callu Magano ikkoottota daga baala affanno gede xa Asoorootu anganni gatisinke» yaanni huucci'ri.

ISAYAASI MOOTE HIZIQIYAASIRA SOYINO SOKKA

²¹ Hakkunni gedensaanni ani Isayaasi moote Hiziqiyaasira, «Israeelete Magani Kaaliiqi, ‹Asoori moote Senaakireemi seyateennahe huucci'rootto huuccatto macciishshoommo.

²² Ani Kaaliiqi Senaakireemira, Yerusaalamete manni ate mishe arrassannohe; xooqatto yannarano ajiiffatannohe.

²³ Boo'nitanninna boollaqidhanni seyatittohu ayeti? Xonittoehu ani Israeelete Qullaawaatiwe!

²⁴ Soqqamaanokkira Ane Mooticha xonte sokke, «Faradi gaare'yanni jajjabba Libaanoosi Ilaalla amadoommo; seeddaannanna biifado haqqe daguwunnita karoommo; gaaru aana nooha ulma dubbo eoommo.

²⁵ Manni gobbara bu'a u'me waa agoommo; Gibitsete wayibba olanto'ya lekka mooshshitino» yootto.

²⁶ « ‹Lowo dirira albaanni konne coye hedoommohu ane ikkoommota diafootto? Hedoommo coyi ikkanno gede assoommohuno aneeti. Qiinshoonni katamma diigge duuno qolatto gede wolqa oommohehu aneeti.

²⁷ Manninsara wolqa ba'ino; hexxono ba'eennansa tultaabbino. Soojjaati bubbe mooshshitino daraarchi xawunnihu, aju mu'rinna minu aana mu'ranno ishinchi gede rakke mooltannore ikkitino.

²⁸ « ‹Ani kayinni atere gudise egennoommo; ma assattoronna hiikka ha'rattoro laoommo; anera hanqite kaoottotano afoommo.

²⁹ Anera hanqite wodanikkinni boo'noottota baala macciishshoommo. Kunnira sanokkira qoroora gane afiikkira bixaala wore wirri asse dayitto widira qoleemmohe yoommota kulisi› yiinohe» yee kuloommosi.

³⁰ Hakkunni gedensaanni ani Isayaasi Hiziqiyaasira, «Kunni baalunkura malaate ikkanno coyi no: Konne dironna daannoha winxikkinni laalino gide ittinanni. Sayikki diro kayinni umi'ne gide wixidhine laashshidhinanni; woyineno kaasidhine laalose ittinanni.

³¹ Yihudunni gattino taraare kayinni rumushshu baatto raqqeenna, lophe laalanno haqqi gedeere ikkitanno.

³² Olantote Mootichi Kaaliiqi laalanni Yerusaalamete Katamira Tsiyooni Ilaali aana gattannori heedhanno» yii.

³³ Kaaliiqi Asoori moote daafira, «Isi horonta konne katama dieanno; mitticho maxxa nafa diolanno. Wonqo amaxxitino gaaddono shiqqi diyitanno; bushsha tuulteno digaangeessitanno.

³⁴ Katamu giddora eikkinni dayino doogo hige galagale ha'ranno. Konne coye coyi'roommohu ani Kaaliiqaati.

³⁵ Ayirrinyi'ya daafiranna soqqamaanchi'ya Daawitira oommo hexxo daafira yee konne katama ani umi'ya gargare gatiseemmo» yee coyi'ri.

MOOTE SENAAKIREEMI REYO

³⁶ Hakko hashsha Kaaliiqi sokkaasinchi Asoorootu qacha e"e, 185,000 olanto shii. Israeelete manni soodo goxinowiinni ka"anno woyite base baala diinu reeshshaati.

³⁷ Hakkunni gedensaanni Senaakireemi badhe hige xooqe Nennewe hee'ri.

³⁸ Mitto barra Niserooki yinanni magani kaphunnihu mine magansi'ranni hee'reenna oososi giddonni 2 Adirameleekinna Sharetseri yinanniri bisetenni shitinosi. Insano Araaraati gobba xooqqe ba'u. Isi darga mittichu Asiraadooni yinannihu beettisi moohi.