ISAYAASI 33 - Qullaawa Maxaafa

KAA'LO AFI'RATE HUUCCI'NOONNI HUUCCATTO

¹ Ayino huninsakkinni huntannorira, ayino xagarinsakkinni xagartannorira, diinnankera aanne'e! Insa huntannohunna xagartanno barri saeenna, insa uminsa ba'anno barri daanno.

² Kaaliiqa, mararinke! Ninke ate hexxineemmo. Barru baala agarinke! Qarru yannarano wodinke!

³ Banqote gede xadhitannota ate huuro macciishshanno woyite, mannu daramanno. Ninke daafira olamattora ka"atto yannara, daga billaallitanno.

⁴ Jajjansa baala hunte xooqqeenna, mannu kanchafaru gede saamanno.

⁵ Kaaliiqi wo'munkura aliidiho; iima gordoho hee'ranno; Tsiyooni keeraanchimmanna halaale wonshanno.

⁶ Techo geeshsha hee'rankera kaiminke isooti; mannaho gato, hayyonna egenno aanno; Kaaliiqa waajja ninkera lowo jirooti.

⁷ Bareedda kaa'lote raartanno; araaraho sonkoonniri hururante wi'litanno.

⁸ Hala'lado doogga ona ikkitanno; doogote ha'rannohu dihee'ranno. E'noonni gondoori diigamino; namoomu baino; kunninni kainohunni ayirrinsannihu mittuno dihee'ranno.

⁹ Baatto moolte, mulla darga ikkitanno; Libaanoosi Dubbino moole, shaqqadu Saarooni Lagichino molo baatto ikkanno. Baasaaninna Qermeloosi Ilaallara noo haqqe, daro giggiltanno.

KAALIIQI GIBBANNOSIRE QOROPHISIISI

¹⁰ Kaaliiqi daga baalate, «Xa ani mitto coye assammora kaeemmo; ayirrinye'yanna wolqa'ya leellisheemmo'ne.

¹¹ Galawa godobbine kura iltinanni; ittanno'ne giira ki'ne umi'ne bushshidhinanni.

¹² Murmurre giirate tungoonni uti gede, giirantine buluulo ikkitinanni.

¹³ Ki'ne xeertote heedhinoonniri assoommore macciishshe! Mule heedhinoonniri wolqa'ya affe!» yii.

¹⁴ Tsiyooni heedhanno cubbaataammi waajjitanno; maganiweelo gosano qece yite huxidhanno. Insano, «Xo'annokki giira Kaaliiqi hanqite ledo, hee'ra dandaannohu ayeti» yitanno.

¹⁵ Halaalenna taalo coyi'rannohu, hanaaqu jiro baxannokkihu, gubbo itannokkihu, manna shaate malira xaadannokkihu, busha coye la"a giwannohu,

¹⁶ hattoo manchi keere hee'ranno; jawu kinchi qiisho ikkeennasi, itanno sagalenna aganno waano hoogikkinni hee'ranno.

ALBILLITTENNIHA AYIRRADO DIRO

¹⁷ Mitto barra, baatto qaccetenni qaccete geeshsha gashshanno mooteha, gaacheenasinna xummesi la'inanni.

¹⁸ Wodani'nenni albi qarra qaagginanni, «Roorrichu hiikko no? Giwire gamba assannohu mama no? Agarranni shae roorrichi hiikko no?» yitine xa'mitinanni.

¹⁹ Coyidhannore anfannikkire, yitannori leellannokkire, boonaleeyye gosa kunni ka'a ille'nenni diaffinanni.

²⁰ Amma'note Ayyaanna ayirrisi'neemmowa, Tsiyooni Katama la'e! Keere hee'nanni dukkana Yerusaalame la'e! Ciffase horontanni dibuqqisanatanno; siibbaseno ditatta'anno; Yerusaalameno darginni milli diyitanno.

²¹ Diininke yowolonna markaawe hadhannokkiwa, daadanno wayinna jajjabba xashshuwa gama, Kaaliiqi ayirrinyisinni ninke ledo hee'ranno.

²² Coyenke afannohu Kaaliiqaati; gallanni seera kulannonkehu mootenke isooti; gatisannonkehuno isooti.

²³ Manni'ne diilallo golanno shari shoshshoggeenna, ha'ra hooggino markaawe gede ikkino. Jajja'ne baala gudhinanni; naaffinori nafa dagge saantanno.

²⁴ Tsiyooni hee'ranno manni giddo, «Dhiwamoommo» yaannoha dianfanni. Hakkiicho hee'ranno mannira baalaho, cubbonsa agurranninsa.