ISAYAASI 30 - Qullaawa Maxaafa

GIBITSETE LEDO ASSINANNIHA HAAFU GONDOORO

¹ Kaaliiqi, «Haxawarra oosora aanne'e! Ane doogo agurte uminsa doogo hadhanno. Ane hedora gobbaanni gondooro e'anni, cubbu aana cubbo lexxitanno.

² Ane hedo xa'mite affukkinni kaa'lote Gibitse hadhanno; Gibitsete moote ha'lannonsa gede, iso hexxitanno.

³ Ikkollana Gibitsete moote hale assi'ra saalaho tugganno; Gibitse hexxa shollinye abbitanno.

⁴ Gashshaanonsa Tsoaaninna Haneesi katamma geeshsha iilliturono,

⁵ saalanna irraawa agurranna, wolere mittoreno kaa'litannokki gosawa ha'ra shollinyeho» yii.

⁶ Wodiidi Halallira noo saada dubbunnite daafira ani Kaaliiqi yeemmo coyi aane nooho: Sonkoonni manni doobbiyu hee'rannowa, harfaamu hamasinna lawa lawa yaanni buuwanno dhudhuufi hee'rannota, busha gobba giddoonni higge hadhanno. Afanshunniha ayirrado uduunne harrensaranna gaallansara hogophite, mittoreno kaa'litannonsakki gobba hadhanno.

⁷ Gibitse uyitanno kaa'lo haafaho; kunnira Gibitse, kaa'lannokki moyichooti yoommo.

ISRAEELE YINOONNITA MACCIISHSHA GIBBU

⁸ Kaaliiqi ikkitonsa gara dagganno ilama affanno gede borreesse worammora kulinoe.

⁹ Insa wo'manka woyite kaphitanni Kaaliiqira badhe wodhite hexxinannikkire ikkitino.

¹⁰ Maganu soqqamaanonna himanaano, «Kaaliiqi yiinore kultinoontenke; halaaleno dudubbinoontenke. Kapho nafa ikkiro, ninke halchinoommore calla macciishshinammora hasi'neemmo.

¹¹ Doogotenni ho'lenke; ha'neemmo doogora guficho ikkitinoontenke; ninke Israeelete Qullaawa ikkino Maganire macciishsha dihasi'neemmo» yitanno.

¹² Kunnira Israeelete Qullaawa ikkino Magani, «Ani kuleemmore mishshinoonni daafira, beebbanna xagarro hexxitinoonni.

¹³ Kunnira sao'ne, dhodhoohe hedeweelcho uwara rahinohu, seedu kinchu huxxi gede assitanno'ne.

¹⁴ Hiiqqaqqamihu gedensaanni, giira haa'nanni geeshshiha, woy shumeette winxanni geeshshi baccicho nafa, adhinannikki gede ikkino uduunnicho labbinannire ikkitinanni» yii.

¹⁵ Israeelete Qullaawa ikkinohu Mootichu Kaaliiqi, «Higgine sammi yitine ane calla hexxitiniro, jawaantenna gato afidhinanni. «Ki'ne kayinni, ‹Gimboommo.

¹⁶ Diininkewiinni lekka iibbadu faradinni xoonqe fulleemmo› yitinanni. Ikkollana shorritanno'neri ki'ne roore doddannoreeti.

¹⁷ Diini'neha mitto affinanni woyite, kumu xooqqinanni. Diinunniti onte gaaddo ki'ne baalanka shorrite guddeenna, ilaalu aana qansoonni baandiri callu gatanno» yii.

¹⁸ Tenne giddoonni kayinni, Kaaliiqi maara'nera qixxaawe no. Kaaliiqi taashshanno Magano ikkino daafira, mararino'ne; kunnira Kaaliiqa hexxitannori ba'raadhinoreeti.

KAALIIQI MANNASI MAASSI'RANNO

¹⁹ Ki'ne Yerusaalamete manni, xaate kunni ka'a diwi'litinanni; Kaaliiqi shaqqado ikkino daafira kaa'lanno'ne gede huuccidhinanni yannara macciishshe dawaranno'ne.

²⁰ Qarru giddoonni higgine sa'inanni gede assi'nero nafa, ledo'ne hee're isinni rosiisanno'ne. Hakkunni gedensaanni iso hasidhinanni didaafurtinanni.

²¹ Doogo sodhine gurara woy qiniitira higgine hadhinirino badhe'neenni, «Doogo tenneetina ise higgine hadhe!» yaanno qaale macciishshitinanni.

²² Birranna culka xallinoonnita maganna'ne, «Ninkewiinni faffe!» yitine ishinu gede oltine huntinanni.

²³ Wixidhinanni jajja lossa'neranna lowo gide laashsha'nera Kaaliiqi xeena dirrisanno'ne; saada'ne hossannota hala'lado hayisso gobba aanno'ne.

²⁴ Hawuudhitinanniti handa'nenna harre'ne maxine worre karsiinsoonni kura ittanno.

²⁵ Diini'nera goofo iillitanno yannara, jajjabba ilaallanninna gaarratenni bu'a lolakkanno'ne.

²⁶ Kaaliiqi madiissinoha mannasi hursanno waro, aganu arrishshote gede xawanno; arrishshono albinni roore 7 ero xabbanno. Xawaabbiseno 7 barri xawaabbi geeshsha ikkanno.

KAALIIQI ASOORI QORICHISHANNO

²⁷ Kune, Kaaliiqiti wolqasinna xirchisi xeertote leellanno. Buwanunna wiliile hanqisi malaateeti; qaalisi ittanno giiraati.

²⁸ Foolisino wo'me kokke iillino wayi gedeeho; gashshoote baala woowanchote wore woowansanno; insano, afiinsara bixaala qase hunanno.

²⁹ Ki'ne Maganu manni kayinni, qullaawa ayyaana ayirrisidhinanni hashshi gede faarsitinanni. Israeelete golo ikkino Kaaliiqi Minira ha'ranno yannara, suusulle ufuufanni faarsanno manni gede ikkitine hagiidhitinanni.

³⁰ Kaaliiqi mannu baalu ayirrado huurosi macciishshanno gede assanno; wolqaataamu qorichisi buwanno hanqinna ittanno giira, wishote, baradatenna kaadete ledo dirranno gede assanno.

³¹ Kaaliiqi Asooroota huurosinni masisanno; mootimmate siqqosinni gananno.

³² Kaaliiqi insa gananno kiironni, mannisi kayinni dibbenna bagana gananni qeexaa'lanno; Asooroota Kaaliiqi umisi qasanno.

³³ Lowo dirira albaanni, Asoori moote giirrannihu, giirate dargi qixxaawe no. Hakko hala'ladonna diime ikkino dargano, lowo haqqe duunnoonni; haqqeno ruqanu gedeehu Kaaliiqi fooli itanno.