ISAYAASI 27 - Qullaawa Maxaafa

¹ Hatte yannara Kaaliiqi kaajjado, jawanna wolqaataame bisesinni shalaalannohanna xaaxamannoha Lewaataani yinanni hamashsho qorichishanno; baaru giddo ga'ranno dhudhuufa shaanno.

ISRAEELETE WOLAPHO

² Hakka waro, jajja fushshanno gati woyinete kaashshihu daafira faarse.

³ Ani Kaaliiqi agareemmosi; waano yannatenni hayikkiseemmosi. Mittuno gawajjannosikki gede, hashshanna barra towateemmosi.

⁴ Layinkimeeshsho woyine'ya kaashshi dargira dihanqeemmo; hakkiicho mu're kaashsho hunanno utanna kokko'le, buqqise co'o asse giire huneemmo.

⁵ Woyinete dargi addaxxe anewa dayiro, anera fiixa ikkanno; ane ledo keere hee'ranno.

⁶ Dagganno yannara Yaiqoobi sirchi Israeele, woyinete haqqicho gede rumushsho assidhanno; daraarte laaltanno; laaloseno baatto wo'mitanno.

⁷ Kaaliiqi Israeelete manninni roore diinansa qorichishino; diininsahu geeshshi mannino direyinonsa.

⁸ Baabiloonira qafadante hadhanno gede asse qorichishinonsa; wolqaataame Soojjaati bubbe assitannohu gede asse kayise huninonsa.

⁹ Kunnira, Yaiqoobi ooso Israeele cubbinsara maaro afidhannohu, dagannita kakkalote kinna daakke bullee assite, hixaana giirranni uduunneno ikko Asheera mokkollo hoolturooti.

¹⁰ Qiinshoonni katami diigame mullicho halallitte gobba lawanno; saada hossannowa ikkanno daafira, siittu haqqa sholoole itanno.

¹¹ Haqqichote sinna mooltuhu gedensaanni hiiqqaqqante ubbanno; meentuno daye giirate adhanno. Wodancha nookki manna kalaqaanchu Magani dimararanno; horonta dimaarannonsa.

¹² Loosi'rino manchi gide galawuwiinni badannonte gede, hakko barra Kaaliiqi, Efiraaxisi Wayinni kayise Gibitsete danni geeshsha nooha mannasi Israeele, mittu mittunkunni gamba assanno.

¹³ Hatte yannara jawa xurumba ufuunfanni. Asoorinna Gibitsete gobba darame ha're hee'rannohu Israeelete manni galagale hige, Yerusaalamete Qullaawu Ilaali aana Kaaliiqa magansi'ranno.