ISAYAASI 26 - Qullaawa Maxaafa

KAALIIQI MANNISIRA QEELLE AANNO

¹ Hakka waro Yihudu baattora kunninni aante noo faarso faarsinanni: Kataminke jawaataho; Maganu huxxanna gatote qiisho seekkinosi.

² Halaale loosannohu ammanamino manni eona, katamu waalcho fanne.

³ Kaaliiqa, ate hexxatenni kaajjite heedhannorira, wo'ma keere aattonsa.

⁴ Mootichu Kaaliiqi hegere golootina, geedote geeshsha iso addaxxe.

⁵ Isi boonaleeyye shollishanno; iimaanni higinoha katamansa diiganno; diige bushshu ledo karsiisanno.

⁶ Gadadante heedhinori aanasiinni higge hadhanno; buxaneno lekkansanni kakkaddanno.

⁷ Keeraanote doogo suwashshote; ati suwashshu Magani doogonsa taashshatto.

⁸ Mooticha, seerakki agadhinanni ate hexxineemmo; wodaninke halchono ate ayirrisate.

⁹ Ati baattote aana noorira yoo yaatto waro, mannu taashshinanni gara bade afanno. Lubbo'ya hashsha ate sinsinnaabbanno; giddo'ya noo ayyaanino ate quqquxamanno.

¹⁰ Elo assiteennansano bushu manni danchare loosa dirosanno; keeraanchimma wo'mitino gobbara nafa hee're, bunshe loosa diaguranno; ate lowimma nafa dibuuxanno.

¹¹ Kaaliiqa, angakki bushuulle qorichishate ka'e no; insa kayinni diaffino; mannikkira mageeshshi laala noohero affe waajjito; insa diinnakkira qixxeessootto giira itto.

¹² Kaaliiqa, keere oottonkehu ateeti; loosonkeno ati qineessoottonke.

¹³ Kaaliiqa Maganonke, wole lowo mootoolla gashshitinonke; ninke kayinni ate calla ayirrinseemmo.

¹⁴ Xa insa reyitino; kunni ka'a lubbotenni diheedhanno; ati qorichishsheenna ba'ino. Layinkimeeshsho dika'anno; qaagannonsahuno dihee'ranno.

¹⁵ Kaaliiqa, manna batisootto; ati manna batisootto; Baattono halashshootto. atino ayirrinye adhootto.

¹⁶ Kaaliiqa, qarrantu yannara atewa daggino; seejjittonsa waro hashaashshe huuccidhino.

¹⁷ Kaaliiqa, godowinni noo mancho game amaddeenna, shette xiixantannohu gede, ninkeno ate albaanni hatto ikkinoommo.

¹⁸ Godowinni noo meenti gede game amaddinonke; ikkollana illoommori mitturino dino. Ninke baattote mitte qeelleno diabbinoommo; lendoommorino dino.

¹⁹ Mannikki reyinohu kae heeshshonniha ikkanno; reeshshinsano ka"anno. Ki'ne bushshu giddo heedhinanniri, ka'ine hagiirru faarso faarse! Soodo loju baatto qufisannohu gede, Kaaliiqino reyite keeshshitinore kayise, lubbotenni heedhanno gede assanno.

KAALIIQI YOONNA QAFADOTENNI HIGA

²⁰ Manna'ya, mini'nera e'ine cufana cufidhe; hanqu sa"a geeshsha shiima yanna maaxamme.

²¹ Baattote aana noo gosa cubbinsa daafira qorichishate, Kaaliiqi gordoho noowiinni kae daanni no. Hatte yannara, manna shite baattote giddo maaxantinori reqecci yitanno. Baattono du'nantino mundee xawo fushshitanno; reyitinoreno dimaaxxanno.