ISAYAASI 2 - Qullaawa Maxaafa

HEGERE KEERE

¹ Amootsi beettira Isayaasira Yihudu gobbanna Yerusaalamete Katami daafira Maganu kulinosi sokka aante noote:

² Goofimarchu yannara, Kaaliiqihu Qullaawu Mini noo Ilaali, wole ilaalla baalatenni roore leellanno. Gaarra baalantenni roore luphi yee leellanno; gosa baala hakkiichira hadhanno.

³ Kunnira lowo manni, «Seeru Tsiyooninni, Kaaliiqi qaalino Yerusaalametenni fulannona, amme Kaaliiqi Ilaala fullona. Qullaawu Yaiqoobi Magani Minira ha'nona; isino hedinore kulannonke; ninkeno isi doogo hinge ha'neemmo» yaanno.

⁴ Isi lowo gosara gibbo hoolanno; kunnira bisensa maarashaho, urdensa haantote soorritanno. Gashshootu gashshootu aana ola dikayisanno; hakkunni gedensaanni olaho qixxaawannohu dihee'ranno.

⁵ Ki'ne Yaiqoobi sirchi amme, Kaaliiqi aannonke caabbichi giddo hee'nona.

HETTISAMA GATTANNO

⁶ Magano! Yaiqoobi sircho ikkinoha mannakki horonta agurootto; soojjaati gosa layidhanno coyinna Filisxeemete kiili baatto wo'mino. Mannuno maganiweelo gosa ledo elle amadino.

⁷ Baattonsara birrunna culku wo'mino daafira jiro jirote aana kadhitino; gobbansara faradu wo'mino; faradi gaarensarano kiiro dino.

⁸ Kunni aanano baattonsara kaphu maganna wo'mitino; insano angansanni seekkidhino misilera kumbuultanno.

⁹ Kunninni kainohunni baalanka saalunna shollinyu amadannonsa. Kaaliiqa ballo, saonsa agurtooti!

¹⁰ Kaaliiqi hanqiwiinninna waajjishannohu xirchisiwiinni gatate kinchu qarrira, godahonna balete giddo maaxantanno.

¹¹ Haxawarrootu ille baatto la'annohunna boonaleeyye umo heeshshi yitanno barri daanno; hatte yannara Kaaliiqi callu ayirranno.

¹² «Ani wolqaataamoho» yee naaxxannoha baala hatte yannara Olantote Mootichi Kaaliiqi shollishanno.

¹³ Isi jajjabba daguwa Libaanoosinni, odaheno Baasaaninni hunanno.

¹⁴ Jajjabba Ilaallanna gaarra hirikki asse taashshanno.

¹⁵ Katamma agarranniha seeddaanna kinchu huxxanna olu qiisho baala heeshshi assanno.

¹⁶ Lowo geeshsha biifaddanna jajjabba markabba nafa egemmantanno gede assanno.

¹⁷ Haxawarrootu baatto la'anno; boonaleeyye umo heeshshi yitanno; Kaaliiqi callu ayirranno.

¹⁸ Kaphu maganna co'o yite ba'anno.

¹⁹ Kaaliiqi baatto shafara daanno waro, hanqisinninna waajjishannohu xirchisiwiinni kinchu godiranna balete maaxantara wo'naaltanno.

²⁰ Magansidhara seekkidhinota birrunna culku misilla futahehonna rarraattete tugganni hadhanno.

²¹ Kaaliiqi baatto shafara daanno waro hanqisinninna waajjishannohu xirchisiwiinni gatate kinchu qarrira, godahonna balete giddo maaxantanno.

²² Mannu wolqa hexxa agurre! Baalunku reyannohona, maminni kaa'le afannoyya?