ISAYAASI 1 - Qullaawa Maxaafa

¹ Ani Isayaasi Amootsi beettooti. Tini sokka Ooziya, Iyoaataami, Akaazinna Hiziqiyaasi Yihudaho mookku waro, Yihudunna Yerusaalamete daafira kulloonniete.

MAGANU MANNASI RUFI

² Kaaliiqi, «Gordonna baatto, macciishshe! Seekke lossi'roommoti ooso'ya anera gara gibbinoe.

³ Handu nafa ceinoha annasi afino; harrichuno maddarannosiha egennino. Israeelete kayinni hattenne diegennino; manni'ya wodancha diafi'rino» yii.

⁴ Ki'ne cubbaataame gosara, sao batidhino'ne dagara, bunshe loossinanni ilamara, ragimale heeshsho heedhinannirira aanne'e! Ki'ne ane Kaaliiqa Israeelete Qullaawa gibbine, badhe wodhitinoonnie.

⁵ Bunshete aana bunshe leddinanni lende qorichinshanni'ne gede mayira ikkitinanni? Manninati'ne baalu dhiwamaancho ikkino; wodani'neno daaqino.

⁶ Kunninni kainohunni umunni lekkate geeshsha fayyimma dino'ne; bisi'ne darshe, madanna malaa calla ikkino; mada'neno xaginseenna dihurtannote.

⁷ Kuneeti gobba'ne ona ikkitino; katamma'neno giirante gooffino; loosidhinanni bayichono ille'ne la'anna allaggu wole gobba manni adhanno; baalanka coye gudde baatto'ne noori nookkita assitanno.

⁸ Yerusaalame diinu gaangeessino katami gedeete; huxxunna agaraanchu nookki woyinenna baaquli gede ikkite gattanno.

⁹ Olantote Mootichi Kaaliiqi taraare gatisa hoogoommero, Yerusaalame Soddoomunna Gomooru katamma gede ikkite hooggino.

¹⁰ Ki'ne gashshaanonna Yerusaalamete manni baalu Soddoomunna Gomooru manni gedeereeti. Ani Kaaliiqi Magani'ne yeemmore wodana assitine macciishshe:

¹¹ Kakkalo'ne batinyi anera ma"assannoe? Xaa geeshsha shiqishshinoonniehu ge'rechu goci, shilqote kakkalonna misino booti coomi cee'mishshinoe. Woraamu, ge'reewunna meu gocca mundee dihagiirsiissinoe.

¹² Magansidhinara Qullaawu Mini'yara dagginanni yannara, konne darga kadde ayi yii'ne?

¹³ Kunni ka'a togoota haafu kakkalo shiqishshinoonte. Giirtinanni hixaani diqachishannoho. Aganu Leellanno Ayyaani, Fooliishshote Barrinna Ayyaanaame Gambo'ne cubbi'nenni gara ba'ino daafira caaqqi yeeno dilaeemmo.

¹⁴ Aganu Leellannotanna wole ayyaanna'ne giwoommo; duhu gede ikkite ayirritannoe daafira daafuroommo.

¹⁵ «Anga'ne huuccattote anewa qoltine fantinirono caaqqi yee dilaeemmo'ne. Anga'ne mundeetenni karsantinota ikkitinohura, aye geeshshano huuccidhineenna dimacciishsheemmo'ne.

¹⁶ Haayishshidhine keeraabbe. Busha looso'ne baala albi'yanni hoolle. Sao assa agurre.

¹⁷ Danchare assa rosse. Halaalu dawannokki gede agarre; annanna ama hooggino oosoranna galte shii'rino meentira coyi'rammensa; gadadaammano kaa'lensa» yii.

¹⁸ Qoleno Kaaliiqi, «Amme hanni mala hansona! Cubbi'ne duumo xiille ikkirono ani hayishshe bullaame kaade gede asseemmo'ne. Mundeete gede duu'mirono suqqinoonni fuutti gede xabbinanni gede asseemmo'ne.

¹⁹ Maahoyye yitine hajajantiniero, baatto uyitanno atoote ittinanni.

²⁰ Gibbinironna haxawarritiniro kayinni bise ittanno'ne. «Konne coye coyi'roommohu ani Kaaliiqaati» yii.

CUBBU WO'MINO KATAMA

²¹ Ammanamino katami hiitto foora mancho gedeeha ikki! Albaanni halaalu wo'minohonna keeraano heedhannowaati; xa kayinni manna shitannori giddo wo'mitinoha ikkino.

²² Yerusaalame, bashsho birru gedee ayirradooti; xa kayinni mullare ikkootta; ati alba woyinete xajje gedee xumaati; xa kayinni waa calla ikkootta.

²³ Albisootikki hajajantannokkirenna mooraanote jaalla ikkitino; baalunku gubbonna afansha hasidhannoreeti. Annanna ama shiidhino oosoha halaalensa diagartanno; galte shii'rino meenti ku'lono dimacciishshitanno.

²⁴ Kunnira ani Wolqaataamu Israeelete Gashshaanchi Olantote Mootichi Kaaliiqi, «Ki'ne diinna'ya rabbisi'reemmo'ne. Hakkunni gedensaanni ane aana qarra dikalaqqinanni.

²⁵ Hanqunnita anga'ya ki'ne aana kayiseemmo; buwannohu hanqi'yanni batte'ne baala aani'nenni hooleemmo.

²⁶ Yerusaalame, albiri gedee gashshaanonna amaalaasine kayiseemmohe. Hakkunni gedensaanni, ‹Keeraanchoho; ammanama noosi katamaati› yinannihe» yii.

²⁷ Ani Kaaliiqi halaalaancho ikkoommo daafira Yerusaalamenna giddose heedhannore cubbonsa aagintaabbannore gatiseemmo.

²⁸ Cubbaataammanna haxawarroota kayinni mitteenni cancaneemmo; ane agurannohu baalu ba"anno.

²⁹ Kaphu maganna magansi'rate yitine doodhitinoonni haqqenni kainohunni saalfattinanni.

³⁰ Goofimarchoho, daro giggiltino odakkonna waa hoogino gati gedeere ikkitinanni.

³¹ Giira cide ittannohu gede, «Ninke wolqaataammaho» yitannore cubbinsanni kainohunni ayino hoolara dandaannokki bao amaddannonsa.