IBIRAAWOOTA 6 - Qullaawa Maxaafa

¹ Xa Kiristoosi daafira uyinoonniha umi roso agurre, wo'ma ikkino rosiwa sa'no. Tidhinokki loosiwiinni agurre hinge, aagintaambe Maganunniwa hinge amma'nonke galagalle xinti'no.

² Hattonni cuuamannire anga aanaho worannire, reyotenni ka"annirenna hegere yoore galagalle rosiisa dihasiisannonke.

³ Alba hinge ha'ne Maganu fajjinkero konne assineemmo.

⁴ Magano agurino manna hiitto assine aagintaawanniwa qola dandiinanni? Kuni manni albaanni xawaabbu xawinonsareeti; gordu eltono adhite, Qullaawa Ayyaanano beeqqitinoreeti.

⁵ Maganu qaali dancha ikkinota adhite, albillittete daggannota gashshootu wolqano rossinoreeti.

⁶ Kunni baalu gedensaanni amma'nansawiinni shalaqquro, insa uminsa Maganu Beetto galagalte sutte xawoho shollishshinona insa aagintaawanniwa abba didandiinanni.

⁷ Lowo yanna ise aana dirranno xeena agganno baatto, kaashsho kaasi'ranno manchira guma uyitanno daafira Maganu maassi'rannose.

⁸ Utanna kokko'le fushshituro kayinni, mittoreno dikaa'litanno; rumamateno gamba yitanno. Goofimarchiseno giiramate.

⁹ Ki'ne baxantinoonniri! Togo yine coyi'nummorono, ki'nera gato abbanno'ne coyi aana heedhinoonnita anfoommo.

¹⁰ Maganu halaalaancho yoo yaannoho; looso'nenna albano ikko xaano qullaawa manna kaa'latenni leellishshinoonnisi baxille dihawanno.

¹¹ Ki'ne mittu mittunku hexxotenni agadhitinoonni coye angara adhate, goofimarchu geeshsha diinaggaabbine heedhinara halchineemmo.

¹² Amma'natenninna cincatenni kaajjite Maganu hedinonsa coye ragi'ranno manna labbinanni gede ikkinnina, cee'maleeyye ikkitinannita dihalchineemmo.

MAGANU AANNO HEXXO HAWAQI'NANNITE

¹³ Maganu Abirihaamira hexxo uyi yannara, xaarate iso roorinohu wolu nookki daafira,

¹⁴ «Halaalintanni maassi'reemmohe; sirchokkino batiseemmo» yee su'misinni xaarino.

¹⁵ Abirihaamino cince agadhihu gedensaanni, Maganu uyinosi hexxo afi'rino.

¹⁶ Mannu xaaranno woyite roorinohu su'minni xaaranno. Coyensano xaarotenni dhaaphite mereeronsa noo moronsho baala hooltanno.

¹⁷ Maganuno murtesi soorrantannokkita ikkitinota egensiisara hasi're, hexxote ragi'raasinera hexxo xaarotenni dhaawinonsa.

¹⁸ Soorramannokkihanna Maganuno kapha dandaannokkire lamenka hexxosinna xaarosi uyinonke. Kunni lamunku coyi widoonni albankeenni noo hexxo seekkine cu'mi'rate dandiineemmo gede, golo ikkannonkehu widira hinge xoonqoommori ninke lowo jawaante afi'neemmo.

¹⁹ Tini hexxo heeshshonkera milli miqqi yaannokkihu addaxxinanni mokkollichi gedeete. Isino gole hoolannoricho sae Qullaawu Minira eanno.

²⁰ Kunni Qullaawu Minira Yesuusi Melketsedeqi gede kakkalaanchimmate hegereha Qeesootu Qara ikke, ninke daafira balaxe eino.