IBIRAAWOOTA 13 - Qullaawa Maxaafa

MAGANO HAGIIRSIISSANNO SOQQANSHO

¹ Wo'manka woyite rodiimmate baxillinni heedhe.

² Wosina adha habbinoonte. Mitu mitu affukkinni sokkaasine wosinchimma adhitino.

³ Ledonsa usuraminohu gede ikkitine, usurantinore qaagge! Ledonsa qarra adhitinoonnihu gede ikkitine, qarrantinore qaagge.

⁴ Adhanna adhama baalunku ayirrisannota ikkito; ayiddaanninna ayiddaama mimmitoho ammananto. Baashaabbannoriranna foortannorira Maganu busha yoo yaanno.

⁵ Woxu baxille qorophe; noo'nehu ikko'ne! Maganu, «Horo diagureemmohe; dicallachisheemmohe» yiino.

⁶ Kunnira hawaqi'ne, «Kaaliiqi kaa'laancho'yaatina diwaajjeemmo. Mannu ma assannoe?» yineemmo.

⁷ Alba balaxxe Maganu qaale kultino'nere sooreeyye'ne habbinoonte. Heeshshonsanna reyonsa la'inanni amma'natenni insa labbe.

⁸ Yesuusi Kiristoosi be'rono techono hegere geeshsha isoontilla.

⁹ Wosi'ninoha addi addi roso halaalu doogonni wirri assanno'ne gede wortine agurtinoonte; wodaninke kaajjannohu eltotenniiti ikkinnina, sagalete seera agadhatenni di"ikkino. Sagalete seera agadhanno manni lexxannori dino.

¹⁰ Ninkera, Qullaawu Dukkani giddo soqqantannori aanisinni adhite ittara fajjinanninsakkihu kakkalote dargi noonke.

¹¹ Ayihudennihu qeesootu roorrichi cubbo agursiisate kakkalora saadate mundee haa're Qullaawu Holgira eanno; maala kayinni qachu gobbaanni giirranni.

¹² Yesuusino manna umisi mundeenni keereensate katamaho gobbaanni qarra adhino.

¹³ Ninkeno qachunni fulle isiwa marre, shollinyesi beeqqino.

¹⁴ Ninke albillitte daara noo katama agadhine hee'noommo ikkinnina, geedote ikkanno katami tenne gobbara dinonke.

¹⁵ Kunnira, Yesuusi Kiristoosi widoonni qolle wo'ma woyite galatu kakkalo Maganoho shiqinsho. Tini kakkalo suumenkenni, «Isi Mootichankeeti» yine uyineemmote.

¹⁶ Dancha coye assanna afidhinoonnire woleho beeha habbinoonte. Magano hagiirsiissannoti hattoo kakkalooti.

¹⁷ Gashshite noo'nerira hajajantinanni, yitanno'ne gede ikke. Insa xa'mantanno daafira, ki'ne lubbora yite diinaggaabbanno. Ki'ne hajajantininsaro insa loosonsa hagiidhete loossanno. Hatto ikka hoogiro kayinni, dadillaamma ikkitanno; kuni ki'nera dancha di"ikkino.

¹⁸ Ninkera Magano huuccenke. Fayyaaleessu tii"i noonketa dihuluullammeemmo; wo'mante yannara dancha coye assate halchinoommo.

¹⁹ Roore ani ki'newa rahe higeemmo gede, Magano huuccitinaera duu're ku'leemmo'ne.

GOOFIMARCHU HUUCCATTONNA KEERE

²⁰ Maganu Mootichanke Yesuusa reyotenni kayisino. Isi jawa ge'reewu Allaalaancho ikkinohu, hegere gondooro sumundoonnitenni kakkalamino mundee widoonni higeeti.

²¹ Hedinore wonshate guuta manna ikkitinanni gede, Keeru Magani dancha coye baala qodhisiiso'ne. Hagiirsiisannosire Yesuusi Kiristoosinni ninke widoonni qole asso. Yesuusi Kiristoosira hegere geeshsha ayirrinyu iillosi! Hamii'ni!

²² Roduuwa'ya, tini borreessoommo'ne sokka harancho ikkitino daafira, tenne seejjo cincatenni seekkitine buuxxinanni gede huucci'reemmo'ne.

²³ Rodiinke Ximootewoosi usuru mininni fulinota affinara hasi'reemmo. Isi rahe dayiro, ledosi daye laeemmo'ne.

²⁴ Gashshite noo'nerira baalahonna qullaawu manni baalaho keere iillishshe"e! Xaaliyu gobbanni daggino ammanaasine keere dhaantino'ne.

²⁵ Maganu elto ki'ne baalunku ledo heedho. Hamii'ni!