IBIRAAWOOTA 10 - Qullaawa Maxaafa

KIRISTOOSI WO'MU WOYITIRA MITTE HIGE KAKKALAMINO

¹ Muse Seeri albillitte daara noohu danchu coyi hincilaallooti ikkinnina, halaalaancho coye di"ikkino. Kunnira wo'ma woyite diru dirunkunni kakkalate kakkalo haa're Maganunniwa shiqanno manna horo guuta assansara didandaanno.

² Seeru guuta assa dandoommero, insa kakkalo shiqisha agurtanno. Magansi'rate shiqanno manni layinkimeeshsho lendannikki garinni cubbunni keeraa'manno daafira, cubbu nookkita tiiunni afanno.

³ Hatte kakkalo kayinni diru dirunkunni mannaho cubbo qaagiissitanno.

⁴ Boottatenna meu mundee cubbo huna didandiitanno.

⁵ Kunnira Kiristoosi tenne alame daanni hee're Maganoho, «Kakkalonna fushshaate dihasi'rootto; mannimma kayinni qixxeessoottoe.

⁶ Gudinse giirroonni kakkalonna, cubbo agursiisate kakkalo dihagiirsiissannohe.

⁷ Hatte yannara ani, ‹Magano'ya, qullaawa borro giddo anere borreessinoonninte gede, ati hedoottore wonshammora dayommo› yoommo» yii.

⁸ Umo asse, «Seeru garinni shiqinshanni kakkalonna fushshaate, gudinse giirranni kakkalonna cubbo agursiisate kakkalo dihasi'ratto; kurino dihagiirsiisannohe» yii.

⁹ Qoleno, «Kune, ati hedoottore wonshammora dayommo» yii. Kunni garinni haaro kakkalo dargaho riqiwara yee akkala kakkalo baala hoolino.

¹⁰ Yesuusi Kiristoosi Maganu hedinore wonshara hasi'rino daafira, ninke baalunku isi maalisinni shiqishinotenni lendannikki kakkalonni cubbinkenni keeraa'minoommo.

¹¹ Mittu mittunku qeesichi barru baala uurre hajanjoonnisi woga wonshanno; cubbo huna dandiitannokki kakkalo marro marro hige shiqishanno.

¹² Kiristoosi kayinni lendannikkita cubbo agursiisate kakkalo shiqishihu gedensaanni, Maganu qiniiteenni ofollino.

¹³ Kunni ka'a Maganu diinasi lekkasira woroonni qola geeshsha agare no.

¹⁴ Hatto ikkinohu, hakkore keeraa'mitinore lendannikki kakkalonni hegere geeshsha guuta assinonsa daafiraati.

¹⁵ Qullaawu Ayyaanino kunni coyire umo asse,

¹⁶ «Hakkunni daanno barri gedensaanni, insa ledo e"eemmo gondoori konneeti. Seera'ya giddonsa woreemmo; wodaninsarano borreesseemmo yaanno Mootichu» yee coyi'rihu gedensaanni,

¹⁷ lede, «Cubbonsanna busha loosonsa, kunni ka'a diqaageemmo» yaanno.

¹⁸ Cubbonna busha looso maarrihu gedensaanni, cubbo agursiisate kakkalo hakkunni ka'a dihasiissanno.

MAGANUNNIWA SHIQQI YAA

¹⁹ Kunnira roduuwa'ya, Yesuusi mundee widoonni hinge Qullaawu Holgira waajjinummokkinni ea dandiineemmo.

²⁰ E'neemmohu dukkote widoonni, hatto yaano mannimmasinni faninonketenni haaronna heeshsho ikkitino doogo widoonniiti.

²¹ Maganu Mini giddo roorre afi'rinohu rooru qeesichi noonke.

²² Wodaninke keeraa'manno gede busha tiianke faanseenna, bisonkeno xalalu wayinni hayishsheenna, taalu wodaninninna halaalaancho amma'nanni Maganunniwa shinqo.

²³ Hexxo uyinonkehu ammanaminoha ikkino daafira, xa ammanne farci'neemmo hexxo ka'anna kawa yinummokkinni duu'ne cu'mi'no.

²⁴ Baxille afi'ratenna dancha looso loosate mimmitonke kakkayinso.

²⁵ Mitu mitu agurtunte gede, ronsoommoha xaadonke agurroonke. Roorenka Mootichu daanno barri gamba yiinota qaagginanna, mimmitonke albinni roorsine jawaachinsho.

²⁶ Halaale anfummohu gedensaanni anfanni hee'nenni cubbo loonsummoro, kunni ka'a cubbu daafira shiqinshanninke kakkalo diheedhanno.

²⁷ Xa gatte nooti waajjishshanno yoonna Magano qoxxissannore ittannota wolqaataame giira agadhate.

²⁸ Muse Seera mishinohu, lamu woy sasu manchi naqqassusiro, maaro nookkiha reyanno.

²⁹ Maganu Beetto mishinohu, keereensitinosita gondooru mundee battete gede asse kiirinohura, eltote Ayyaana xoninohura, mageeshshi geeshsha roore qoricha adha ikka!

³⁰ «Rabba anete; bado qoleemmohu aneeti» yiinohu ayetiro anfoommo. Hattonni, «Mootichu mannisi aana yoo yaanno» yaanno.

³¹ Heeshshote Magani anga rabbannite aana uwa lowo geeshsha waajjishshannote.

³² Caabbichu xawi'nehu gedensaanni lowo qarra adhitinanni cincatenni kaajjitine heedhinita hattenne albi yanna qaagge!

³³ Mite mite yannara mannu albaanni xonnoonni'ne; tultaabbinoonni. Mite mite yannarano hattoo qarri iillinonsa manni ledo qarrama doodhitinoonni.

³⁴ Ki'ne gordoho woyyaabbinotinna hegere jiro noo'neta affinoonni daafira, usuranyootu ledo qarrantinoonni. Jajja'neno wolqatenni adhinanna cincitine hagiirrunni sa'inoonni.

³⁵ Kunnira lowo ba'raa'ra afidhinannita jawaante'ne huntine agurtinoonte.

³⁶ Maganu hedinore wonshitine aa'nera hexxo uyino'ne coye afi'rate, cincitine agadha hasiissanno'ne.

³⁷ Hatto yinoonnihu, «Daannohu shiima yanna gedensaanni daanno; dikeeshshanno.

³⁸ Keeraanchu kayinni amma'natenni heeshsho afi'ranno; badhe hige gatannoha kayinni, lubbo'ya dihagiidhitannosi» yine borreessinoonnihuraati.

³⁹ Ninke kayinni amma'nite gattannori widooti ikkinnina, badhe higge shuduuxxitannori wido di"ikkinoommo.