IBIRAAWOOTA 1 - Qullaawa Maxaafa

MAGANU BEETTISI WIDOONNI QOLE COYI'RINO

¹ Maganu bi're alba addi addi doogonni himanaanote widoonni qole annuwankera batinye hige coyi'rino.

² Xa kayinni kunni goofimarchu barrinni baalankare ragi'ranno gede assinohu Beettisi widoonni qole ninkerano coyi'rinonke. Kalqe baala kalaqinohuno isinniiti.

³ Isi Maganu ayirrinye xawise leellishino; isi ewelummasinni gudise Maganu ledo mittoho. Kalqe baala wolqaataamu qaalisinni irkise amade no. Mannano cubbunni keereensihu gedensaanni, gordoho ayirradu gashshaanchi Maganu qiniiteenni ofollino.

MAGANU BEETTI ALIIDIHO

⁴ Isira uyinoonni su'mi sokkaasinete su'mira aliidiha ikkinonte gede, isino sokkaasinete aliidiho.

⁵ Maganu, «Ati Beetto'yaati, techo iloommohe» woy, «Ani anna ikkeemmosi, isino Beetto'ya ikkanno» yiinohu hiikko sokkaasinchiraati?

⁶ Maganu bayira Beettosi tenne gobba soyara kai yannara, Maganu sokkaasine baala magansidhannosi gede hajajino.

⁷ Sokkaasinesire coyi'ranni, «Sokkaasinesi bubbe, soqqamaanosi giirate buwano assanno» yaanno.

⁸ Beettisire qole, «Magano! Mootimmakki barcimi hegerera hee'rannoho; keeraanchimma gashshootikki siqqichooti.

⁹ Keeraanchimma baxootto; bunshe giwootto; kunnira, Maganu Maganikki, jaallakkinni roorse hagiirru buuro buurinohe» yaanno.

¹⁰ Hattono, «Mooticha! Ati umo assite baatto xintootto; gorduno angakki loosooti.

¹¹ Insa baalunku ba'anno; ati kayinni hee'ratto; insa uddanote gede akkaltanno.

¹² Seemmate gede assite xaaxattonsa; uddanote gede soorrantanno. Ati kayinni hegere geeshsha ateetilla; horontanni disoorramatto; dirikkino digoofanno» yaanno.

¹³ Maganu mitto sokkaasinchono, «Baarigaarrakki lekkakkira woroonni qolammo geeshsha, qiniite'yaanni ofolli!» diyiino.

¹⁴ Sokkaasine maatiyya? Maganoho soqqantannorenna gato ragidhannore kaa'late Maganu soyino ayyaanna di"ikkitino?