HOOSEI 11 - Qullaawa Maxaafa

KAALIIQI MANNASI ISRAEELE BUSHIRONO BAXANNO

¹ Kaaliiqi, «Israeele qaaqqimma noo yannara baxoommose. Baxeemmoha beetto'ya, Gibitsetenni fulanno gede woshshoommosi.

² Kayinnilla manna'ya Israeele, anewa gamba yaanno gede woshshummo deerrinni, roorenka anewiinni fafino. Ba"aalira kakkalo shiqishatenninna, misillasirano hixaana giira diagurtino.

³ Angansa amade, lekkatenni qaaffanno gede rosiisoommonsahu aneeti. Insa kayinni ani towateemmonsata diaffino.

⁴ Shaqqillunninna lowo baxillinni, anewa gamba assoommonsa. Qambara haxonsa aaninni hoole, ani umi'ya heeshshi yee itisoommonsa.

⁵ «Insa kayinni anewa gamba yaa gibbinohura galagalte Gibitse higganno. Asoori moote anga galtannoreno ikkitanno.

⁶ Katammansa diinu bagadunni gawajjanno; katammansa cufannano hiiqqaqqanno; busha amalensano doonsanno.

⁷ Manni'ya anewiinni fafate murici'rino daafira, kadamate qambara hogombeenna iima hige raaranno. Ikkeennano hakkonne qambara haxonsa aaninni kayise hoolansara ayino didandaanno.

⁸ «Israeele! Ate hiitto asse agureemmohe? Hiitto asseno sayise eemmohe? Adaamanna Tseboyimi assummo gede, hiitto huneemmohe? Ate lowo geeshsha baxeemmohe daafira, konne baala assammora wodani'ya diaannoe.

⁹ Kunnira, hanqi'ya qoomama diabbeemmo; layinkimeeshsho Israeele dihuneemmo. Hatto asseemmokkihu, ani Maganoho ikkinnina manna ikkoommokki daafiraati. Qullaawu ani ki'ne giddo hee'reemmo; tenne ki'newa hanqi'yanni didayemmo.

¹⁰ «Ani doobbiichimma ittaneemmo yannara, manni'ya Israeele hoode'ya hadhanno; galchiminni huxidhanni anewa dagganno.

¹¹ Ceate gede Gibitsetenni, lembooli gede Asoorinni buubbanni dagganno. Galagalche mininsara qoleemmonsa. Konne coye coyi'reemmohu ani Maganinsa Kaaliiqaati» yii.

ISRAEELETENNA YIHUDU MANNI AANA YINOONNI YOO

¹² Kaaliiqi, «Israeelete manni kaphunninna dogatenni gaangeessinoe. Yihudu ammanamoommohuranna qullaawa ikkoommohura anera maahoyye giwinoe.