HOOSEI 1 - Qullaawa Maxaafa

¹ Ooziya, Iyoaataami, Akaazinna Hiziqiyaasi Yihudaho hoode hoodete mookku yannara, Yoaasi beetti Iyorbiaamino Israeelete moohe hee'reenna Kaaliiqi Bieeri beetti Hooseira kulinosi himani kunninni aane nooho.

HOOSEI GALTENNA OOSOSI LAWISHIISHSHA

² Kaaliiqi Hoosei widoonni qole mannisira qaalesi kula hanafi woyite Hooseira, «Manni'ya ane Kaaliiqiwiinni baxxe ceeggifachiishannoha foorrete looso loosanni no. Atino hadhe ammanantinokki mancho adhi; iseno ise gedeeta foora ooso iltohena» yiisi.

³ Hooseino ha're Dibilayimi beetto Gomeeri adhi. Iseno godobbe labbaa beetto iltusi.

^4-5 Hakkunni gedensaanni Kaaliiqi Hooseira, «Yehunna ilamasi Iyiziraeelete shitino manni daafira, minisi manna qorichisheemmo yanna difaffino. Israeelete gashshoote hakko gawa'lanno gede asseemmo. Hatte yannara Israeelete olanto Iyiziraeeli lagichira cancaneemmo. Kunni daafira beettikkira su'ma, Iyiziraeeli yite fushshi» yiisi.

⁶ Gomeeri layinkimeeshsho godobbe meya beetto iltu. Kaaliiqino Hooseira, «Israeelete mannira kunni ka'a baxille'ya dileellisheemmonsa; diinomaareemmonsa. Kunni daafira beettokkira su'ma, Loruhaama yite fushshi.

⁷ Yihudu manna kayinni marareemmo. Ani Maganinsa Kaaliiqi gatiseemmonsa; gatiseemmonsahuno olunni di"ikkino. Bisetenni, digaanunni, maxxunni, woy faradunna faradaasinetenni di"ikkino» yii.

⁸ Gomeeri qaaqqosera unuuna hooltuhu gedensaanni galagalte godobbe labbaa beetto iltu.

⁹ Kaaliiqi Hooseira, «Kunni ka'a Israeelete manni aneha di"ikkanno; anino insa Magano di"ikkeemmo. Kunni daafira beettikkira su'ma, Loaami yite fushshi» yiisi.

ISRAEELETE MANNI GOBBANSA HIGANNO GEDE KULLOONNI HIMANA

¹⁰ Israeelete manni batinyi kiirrara woy bikkinara dandiinannikkihu baaru shaafi geeshshiha ikkanno. Kaaliiqi, «Manna'ya di"ikkitinoonni» yiinsarono, hakko heedheennanni, «Heeshshote Magani ooso» yinanninsa yanna dagganno.

¹¹ Hatte yannara Yihudunna Israeelete manni gamba yee mitto ikke, gashshannoha mitto albisa doodhanno. Galagale hige umisi baatto aana jirotenni lophe hee'ranno. Kuni barri Iyiziraeelira jawa barra ikkanno.