HIZIQEELI 33 - Qullaawa Maxaafa

KAALIIQI HIZIQEELI MANNA AGARANNOHA ASSISI

¹ Kaaliiqi,

² «Koo manchi beetto, mitte gobbara ola kayiseemmo yannara ikkanno coye baala mannikkira kulinsa: Insano giddonsanni mitto doorte agaraancho assidhuro,

³ agaraanchuno diinu daanna afiro, mannu baalunku agadhanno gede xurumba ufuufanno.

⁴ Ayino konne qorophishiishsha macciishshe lashshi asse agureenna diinu bala tuge shiisiro so'ro umisite.

⁵ Qorophishiishsha lashshi asse reyinohu umisi so'ronniiti; qorophishiishsha lashshi assa hoogoommero gatannohu baino.

⁶ Kayinnilla, agaraanchu diinu daanna afe hee'renni qorophisiisa hoogiro, diinu daye hakkore cubbaataamma shaanno. Ani kayinni insa reyora iso xa'meemmo.

⁷ «Koo manchi beetto, xa ani ate Israeelete mannira agaraancho assoommohe. Ani eemmohe qorophishiishsha baala insara kula hasiissannohe.

⁸ Bunshe loosannohu halaalinta reyanno yeemmo yannara, ati busha loososi aguranno gede qorophisiisa hoogittoro, hakku manchi cubbisinni reyanno. Reyosira kayinni ati xa'mamatto.

⁹ Bunshe assino mancho higanno gede qorophisiisseenna giwe, bushu loosisinni higikkinni cubbisinni hee're reyiro, ati dixa'mamatto» yee coyi'rie.

CUBBISINNI HIGANNOHU GATANNO

¹⁰ Kaaliiqi, «Koo manchi beetto, Israeelete mannira, ‹Cubbinkenna saonke batidhinohura ba'nammoraati; hiitto ikkine ganteemmo?› yitinoonni.

¹¹ Ani Mootichu Kaaliiqi heeshshote Magano ikka'yanni xaareemmona, cubbaataamu manchi, cubbo loosa agure lubbotenni hee'ranno gede ikkinnina cubbisinni reyanno gede horonta hasi'reemmokkita kulinsa. Kunnira, ‹Israeele, busha looso'ne agurre; reyo mayira hasidhinanni?› yite kulinsa.

¹² «Xaano koo mancho, keeraanchu manchi cubbo loosa hanafiro, alba loosinohu danchu loosi gatisannosikkita Israeelete kulinsa. Bushu manchi bunshe loosa aguriro diqorichishamanno; keeraanchu manchino cubbo loosa hanafiro, albi keeraanchimmasi daafira yine dimaarrannisi.

¹³ Keeraanchu manchi lubbotenni hee'ranno gede, hexxo eemmosi. Kayinnilla, albihu danchu loosisi ikkannosi gede hede cubbo loosa hanafiro, albihu danchu loososi giddonni mitto nafa diqaageemmosi; kunnira, cubbisinni reyanno.

¹⁴ Mittu bunshe assinohu reyara rahinota kule qorophisiiseenna, cubbo loosa agure danchanna taalo coye assiro,

¹⁵ lawishshu gedera, liqoote amadinore qoliro, moorinore annaho qoliro, cubbo loosa agure heeshsho uyitanno hajajo agadhiro, lubbotenni hee'ranno ikkinnina direyanno.

¹⁶ Loosino cubbo baala agureemmosi; danchanna taalo coye assasinni lubbotenni hee'ranno.

¹⁷ «Hiziqeeli, mannikki kayinni, ani asseemmo coyi gara ikkinokki gede asse hedanno; saonka gara ikkitinokkiti insa doogooti.

¹⁸ Keeraanchu manchi dancha loosa agure bunshe loosa hanafiro, bushu loosisinni reyanno.

¹⁹ Bushu manchi cubbo loosa agure taalonna dancha coye assiro, lubbosi gattanno.

²⁰ Ki'ne Israeele kayinni, ani asseemmori gara ikkinokki gede assitine heddinanni. Ikkollana, mitti mitti'nera loosi'ne garinni yoo yeemmo'ne» yee coyi'rie.

YERUSAALAMETE AMADAMANNA ISRAEELETE CUBBO

²¹ Qafadammummohunni tonaa layinki diro, tonnikki agani eihunni ontikki barra, Yerusaalametenni darame dayinohu mittu manchi, katamu amadaminota kulie.

²² Isi ga'a daara techo gede hawarro, jawaata Kaaliiqi wolqa anewa daggu. Layinki soodo hakku manchi dayita, Kaaliiqi afoo'ya faneennae galagale coyi'ra dandoommo.

²³ Kaaliiqi,

²⁴ «Koo manchi beetto, Israeelete gobbara diigantino katammara hee'ranno manni, ‹Abirihaami callichosiiti. Ikkollana baatto baala ragi'rino; ninke kayinni batinyeho; baatto ninkera iqqinoonninkete› yaanno.

²⁵ «Ani Mootichu Kaaliiqi insa daafira yeemmore: Mundeete ledo noo maala ittinanni; kaphu maganna magansidhinanni; mannano shitinanni. Konne baala assitinanni heedhine, hiitto baatto ninkete yitinanni?

²⁶ Bagado'ne hexxitinanni; loosi'ne giwisannoho; baalunku foortinannireeti. Konne assitinanni heedhine, hiitto baatto ninkete yitinanni?

²⁷ «Kunnira, ani Mootichu Kaaliiqi heeshshote Magano ikka'yanni xaareemmona, diigantino katammara hee'ranno manna baala shinanni yee qorophisiisoommota xawisse kulinsa. Katamu gobbaanni hee'ranno moyichira sagale ikkitanno; ilaallatenna goddate maaxante noore dhibbu gudanno.

²⁸ Gobbano mullicho ona asseemmo; adawadhitinanni wolqa baala gooffanno. Israeelete ilaalla, mannu heleqqi yaannokkita waajjishshannota ikkitanno.

²⁹ Cubbinsanni kainohunni, manna qorichishe gobba mullicho ona asseemmo yannara, ani Kaaliiqa ikkoommota affanno» yiie.

HIMANAANCHU SOKKA LEELLISHSHINO GUMA

³⁰ Kaaliiqi, «Koo manchi beetto, mannu katamu huxxi mulenna minnansa xullichira uurre, atere hasaawanni no. Insa insanaawano, ‹Amme Kaaliiqi techo ma coyi'rinoro Hiziqeeli xa'mine buunxona› yitanno.

³¹ Kunnira, manni'ya ati coyi'rattore macciishsharalla gamba yaanno; kayinnilla, kulattonsare baala diwonshanno. Kulatto qaale goowi alita naaddanno; wodaninsara kayinni hafuurre wo'mitino.

³² Ati coyi'ratto qaale wonshitannokki daafira, gingilaate gananni danchu qaalinni baxillu sirba sirbanno sirbaasincho ikkoottonsa.

³³ Ikkollana, ati coyi'ratto qaali addinta wo'manno. Yinoonni coyi wo'meenna affanno yannara kayinni, giddonsa himanaanchu noota buuxxanno» yii.