HIZIQEELI 31 - Qullaawa Maxaafa

GIBITSETE MOOTE DAGUCHOTE GEDE IKKE MURAMANNO

¹ Qafadammummohunni tonaa mitikki diro, sayikki agani eihunni umi barra Kaaliiqi,

² «Koo manchi beetto, Gibitsete mooteranna mannu baalunkura, ‹Ati hiittoo wolqaataamooti! Mayinni taashshohe?

³ Ati biifadda caalu sinna afidhino haqqicho, hojja gordo iillitino dagucho Libaanoosite gedeeho.

⁴ Hakkiichono latise lossanno wayi no; wayibbano rumuddakki hundinni fultino. Haqqe fultannowa baala burqitanno wayibba agganno; dubboho noo haqqe baalantera gorsa qoltino.

⁵ Tini haqqicho dancha qolloonni waa afidhinohura, hojja wole haqqe baalatenni roore ikkitu; sinnaseno du'muullenna hojjaameeyye ikkitu.

⁶ Addi addi cea sinnase aana minna mi'nitu; dubbu moyichino oosonsa caalisera woroonni qali; jajjabbu gashshooti baalu caalisera woroonni fooliishshi'rino.

⁷ Haqqicho hojja seedde, jajjabba sinna afidhinota ikkitinohura, lowo geeshsha biiffinote; rumuddaseno baattote woroonni noo wayi giddora ha'rissino.

⁸ Ani Kaaliiqi kaasoommo haqqe gannatennite giddo nafa, ise ledo taaltanno dagucho dino. Isete geeshshi sinna noosehu hoonchu haqqino dino; ise ledo taaltannoti daraame haqqicho mitteno dino. Kaaliiqi kaasino haqqe giddo nafa, ise gede biiffino haqqicho dianfanni.

⁹ Ani Gibitse lowo sinnanni biifise kalaqoommose; ani Kaaliiqi kaasoommo haqqe gannatenniti, hinaassannose gede assoommose› yiino yite kulinsa» yiie.

¹⁰ Mootichu Kaaliiqi, «Xa kayinni, lophite gordo iillitu deerrinni, boo'na amaddinose haqqicho hattenne aana ani Mootichu Kaaliiqi asseemmore kuleemmohe.

¹¹ Ani allaggichu gashshaanchi anga facci asse agureemmose. Hakku allaggichu gashshaanchino bunshesera qoricha aannose.

¹² Marartannokki allaggi haqqicho murte agurtanno; umisenna sinnase baala murmurante gobbate aana noo ilaallaranna laggara ubbe gattanno. Hundase caa'litanno daga baala hakkiinni agurte hadhanno.

¹³ Cea dagge ubbino haqqicho aana ofoltanno; moyichuno sinnase aana ha'ramanno.

¹⁴ Aye gedeno waa agganni lophite kunni garinni hojja gordo iillitannoti, hattoo haqqicho kunni ka'a horonta diheedhanno. Mannaho iillitanno reyo insarano iillitanno; jeennaate dirritannori ledo karsantanno gede yoo yinoonninsa» yee coy'rie.

¹⁵ Mootichu Kaaliiqi, «Hatti haqqicho murante jeennaate dirritanno yannara, baattote giddo hadhanno wayibba hindiiddote gede aanaseenni lolakkanno gede asseemmo. Wayibba lolakkannokki gede, bu'ano fultannokki gede asseemmo. Hatti haqqicho mooltanno daafira, Libaanoosi Ilaallara tunsicho uddisiiseemmo; dubbu haqqe baala mooltanno gede asseemmo.

¹⁶ Ani hatte haqqicho jeennaate dirritanno gede asseemmo yannara, ubbanno woyite macciishshinanni luuli daga baala masisanno. Edeni haqqe ledo jeennaate dirrituti lowo waa agginoti dancha Libaanoosi haqqe baala ise uwara hagiidhitanno.

¹⁷ Insano, kunni albaanni shinoonniri ledo karsantara, ise ledo mitteenni jeennaate dirritanno. Hundase caa'lite heedhannori baalu dagate mereero billaallitanno.

¹⁸ «Haqqicho Gibitsete mootenna mannisi baalu lawishshaati. Edeni Gennetete noo haqqe giddo nafa hojjanna biinfille ise ikkitannoti dino. Xa kayinni, Edeni Gennetete noo haqqe gede, jeennaate dirritanno. Hakkiichono Maganiweelootu ledonna olunni shinoonniri baalu ledo karsantanno. Ani Mootichu Kaaliiqi konne coye coyi'roommo» yiie.