HIZIQEELI 29 - Qullaawa Maxaafa

GIBITSETE HIMANNOONNI HIMANA

¹ Qafadammummohunni tonnikki diro, tonnikki aganira tonaa layinki barra Kaaliiqi,

² «Koo manchi beetto, Gibitsete mootera himana kuli. Isiranna Gibitsete gobba baalate qorichu iillannonsata kulisi.

³ Mootichu Kaaliiqi Gibitsete mootera, ‹Ha'ranno Wayi giddo ga'rinoha waajjishanno naacha lawattohura, kuneeti ani hanqunni kaoommohe. Atino, Abbayi ateha ikkinota hedde, konne waano seekkoottohu ate ikkootto gede assite coyi'rootto.

⁴ Ga'rikkira qarawa woreemmo; wayikki giddo noo qulxu'mi bisikkira qa'manno gede asseemmo. Qulxu'muno aanakki qa'me hee'reenna, wayi giddonni goshooshe fushsheemmohe.

⁵ Atenna hakkonne aanakki qa'mino qulxu'me haa're, moola baattora tugeemmo'ne. Reeshshikkino waammikkinni umbowa gatanno; allaattetenna moyichu sagale asseemmohe.

⁶ Hatte yannara, Gibitsete manni baalu, ani Kaaliiqa ikkoommota afanno. Ati Gibitse, Israeele ate kaa'lo amma'nitino; ati kayinni, shomboqqote siqqo gedeete.

⁷ Insa atera irkidhu yannara, ati hiiqqante cigilensa murte, ubbanno gede assootta.

⁸ Kunnira, Ani Mootichu Kaaliiqi, bala tuggannohe bagadaano soyemmo. Insano mannakkinna saadakki baala guddanno.

⁹ Gibitseno mullicho ikkite gattanno. Hatte yannara, ani Kaaliiqa ikkoommota afatta. Atino mootekkino, «Abbayi ninkeho; konne waa seekkinoommorino ninkeeti» yitinoonnihura,

¹⁰ ani atenna umi'yaho yaattahu Abbayi Wayi aana hanqunni kaoommo. Aliyyenni Migidooli kataminni kayise, wodiidoonni Asiwaani katama iilla geeshsha, hakkiinnino sae Itiyophiyu qacce iilla geeshsha, ate Gibitse mullicho asse agureemmo.

¹¹ Mannuno saadano hakkiicho heleqqi diyitanno; 40 diri geeshsha hakkiicho mitturino dihee'ranno.

¹² Gibitse, gobba baalantewiinni baxxitinota moola baatto asseemmose. Gibitsete katamma 40 diri geeshsha diigantinowa gattanno; hatto diigantinoti wole katamma horonta diheedhanno. Ki'ne Gibitsoota darantinanni gede asseemmo. Wolu manni mereero billaallitine heedhinanni gede asseemmo'ne› yiino yite kuli» yii.

¹³ Mootichu Kaaliiqi, «Shoyilluu diri gedensaanni, billaallisoommo gobba baalatenni qole abbeemmo'ne.

¹⁴ Alba heedhinanniwa wodiidi Gibitsera heedhinanni gede agureemmo'ne. Hakkiicho wolqiweelo gashshoote ikkitine heedhinanni.

¹⁵ Hakkiinnino sa'ine, baalunkunni roore wolqiweelo gashshoote ikkitinannihura, layinkimeeshsho woloota gashsha didandiitinanni. Baalunkura woriidire asseemmo'ne daafira, woloota gabbarsiissinara didandiitinanni.

¹⁶ Israeeleno layinkita kaa'lo afi'rate ki'ne dihexxitanno; layinkimeeshsho insa hexxitannokki gede, ki'nera iillino qarrinni jiiltanno. Hatte yannara, Israeele ani Mooticha Kaaliiqa ikkoommota affanno» yii.

MOOTE NABUKADANATSOORI GIBITSE AMADANNO

¹⁷ Qafadammummohunni lemiina lamalki diro, umi aganira umi barra Kaaliiqi,

¹⁸ «Koo manchi beetto, Baabilooni moote Nabukadanatsoori Xiroosira bala tugara kaino. Uminsa luqqa"a geeshshanna qotinsa madi'ra geeshsha, olanto lowo duha dukkanno gede assino. Ikkollana, mooteno olantono kunni baalu daafurinni lexxitinori mitturino dino.

¹⁹ Kunnira, ani Mootichu Kaaliiqi, Gibitsete baatto, Nabukadanatsoorira sayise eemmo; isino olantosi hunkiira ikkanno gede, saame woy horre adhino jajja Gibitsenniha baala adhe ha'ranno.

²⁰ Olanto anera soqqantinohura, Gibitse hunkiisira eemmosi. Ani Mootichu Kaaliiqi konne coye coyi'roommo.

²¹ «Kuni ikkanno yannara, Israeelete manna jawaachisheemmo. Hiziqeeli atino, mannu macciishsha dandaanno darga baalaho, qoonqokki naggi assite coyi'ratto gede asseemmohe. Kunni garinni mannu, ani Kaaliiqa ikkoommota afanno» yee coyi'rie.