HIZIQEELI 20 - Qullaawa Maxaafa

MAGANU FAJJONNA MANNU HAXAWARRIMMA

¹ Qafadammummohunni lamalki diro, ontikki aganira, tonnikki barra, shiimu Israeelete manni albisooti Kaaliiqi hedo xa'me afate anewa daye alba'yaanni ofolli.

² Hatte yannara Kaaliiqi,

³ «Koo manchi beetto, ani Mootichu Kaaliiqi yeemmore kunni mannira, ‹Hedo'ya affinara dagginoonni? Ani heeshshote Magano ikka'yanni xaareemmona, mittoreno xa'mitinaera dieemmo'ne; ani Mootichu Kaaliiqi konne coye coyi'roommo.

⁴ «Koo manchi beetto, kunni mannira yoo yaattora qixxaawoottoni? Hatto ikkiro, annuwansa assitinoha tiyyi'nanni coye baala qaagiissinsa.

⁵ Ani yeemmoreno kulinsa; ani Israeele doorummo yannara gondooro eoommonsa; Gibitsete heedheenna anenee egensiisoommonsa. Qoleno, ‹Ani Kaaliiqi Magano'neeti› yoommonsa.

⁶ Gibitsetenni fushsheemmonsatanna ani doorommonsatewa malawunna ado lolakkannota roore baatto haa're masseemmonsa gede hexxo oommonsahu hakka warooti.

⁷ Baxxannota tiyyi'nannita misillansa huntanno gedenna, ani Kaaliiqi Maganonsa ikkoommohura, Gibitsete maganna kaphunnita magansi'ratenni umonsa batteessitannokki gede kuloommonsa.

⁸ Ikkollana, anera haxawarrite hajajo'ya macciishsha gibbino; tiyyi'nannita misillansano dihuntino; woy Gibitsennita kaphu maganna magansi'ra diagurtino. Kunnira, Gibitsete heedhu yannara, hanqo'ya leellishammonsara hedoommo.

⁹ Ikkollana, ledonsa hee'rannohu wole gobba manni afanna Gibitsetenni fushshammonsara xaaroommo daafiranna su'mi'ya arrassamara hasi'roommokkihura hatto diassoommo.

¹⁰ «Kunnira, Gibitsetenni haa're halallitte gobba fushshummonsa.

¹¹ Agadhanno baalira heeshsho uyitannota hajajo'yanna seera'ya oommonsa.

¹² Qullaawoota asseemmonsahu ane ikkoommota affara, Fooliishshote Barra ayirrisansa anenna insa mereero noo gondoorira malaate ikkitanno gede assoommo.

¹³ Ikkollana, halallitte gobbara heedhenni ane gibbinoe; agadhanno baalira heeshsho uyitannota hajajo'yanna seera'ya huntino. Fooliishshote Barrano batteessitino; hakkiicho halallitte gobbarano hanqo'ya leellishe hunammonsara kaoommo.

¹⁴ Ikkollana, Israeele Gibitsete gobbanni haa're fushshannansa lai manni albaanni su'mi'ya arrassamannota giwoommo daafira hatto diassoommo.

¹⁵ Kunnira, halallitte gobbara heedheenna, oommonsate malawunna ado lolakkannota roore baatto iillisheemmonsakki gede xaaroommo.

¹⁶ Togo yee xaaroommohuno, wodaninsa kaphu magannawa higino daafira, hajajo'ya diigge, seera'ya hunte Fooliishsho'ya Barrano batteessitinohuraati.

¹⁷ «Kuni ikke hee'reennanni mararoommonsa daafira, halallitte baattora digudoommonsa.

¹⁸ Hatteentenni oosonsa, ‹Akaakka'ne kalaqqino seera adhitinoonte; wogansano agadhitinoonte. Woy kaphu magannanni umo'ne batteessitinoonte.

¹⁹ Ani Kaaliiqi Magano'neetina, seera'yanna hajajo'ya agadhe.

²⁰ Ani ki'ne ledo eoommo gondoorira malaate ikkanno'ne gedenna, ani Kaaliiqi Magano'ne ikkoommota qaagiissanno'ne gede Fooliishshote Barra ayirrisse› yee kuloommonsa.

²¹ «Ikkollana, hatti ilamano ane gibbinoe; agadhanno baalira heeshsho aannoha seera'yanna hajajo'ya diayirrissino. Fooliishshote Barrano batteessitino; halallitte baattora heedheenna hanqo'ya insara leellishe baalanka hunammora kaoommo.

²² Ikkollana, Israeele Gibitsetenni fushsha'ya affino gosa su'ma'ya arrassitara hasi'roommokkihura, anenee hooloommo.

²³ Kunnira, halalla moola baattora heedheenna, gobba baalate billaalliseemmonsata xaare kuloommonsa.

²⁴ Togo assoommohuno, hajajo'ya mishshinohura, seera'ya diigginohura, Fooliishshote Barra batteessitinohuranna akaakkansa magansidhinota kaphu maganna magansidhinohuraati.

²⁵ «Qoleno, busha seeranna heeshsho uyitannokki hajajo oommonsa.

²⁶ Uminsata bayira ooso nafa kaphu magannara kakkalte umonsa batteessitanno gede facci asse aguroommonsa. Konne assoommohuno qorichishammonsaranna ani Kaaliiqa ikkoommota leellishammonsaraati.

²⁷ «Kunnira, koo mancho, ani Mootichu Kaaliiqi yeemmore Israeelete kulinsa. Annuwansa ammanama hoogansanni xontinoeti wole xono aante noote:

²⁸ Aammonsara xaaroommo baatto haa're abbummonsa yannara, seeddaanna gaarranna lattino haqqe la'ino; hakkuri aanano kakka'litino; fushshaate shiqishatenninna hixaana giiratenni hanqissinoe.

²⁹ Anino, ‹Hakkiichi hadhinanniwi gaaraame darguwa maati?› yee xa'moommonsa. Hakka warinni kayinse, ‹Kaphu maganna magansi'nanni Gaarra› yinanni.

³⁰ Xaano ani Mootichu Kaaliiqi yeemmore Israeelete: Annuwa'ne assitino cubbo baala assatenni umo'ne mayira batteessitinanni? Tiyyi'nanni maganna insate hoode mayira doddinanni?

³¹ Techo nafa hakko gari fushshaate shiqishshinanni; ooso'ne giirate shilqishatenni hakkuri albi maganna kaphunnitenni umo'ne batteessitinanni. Konne baala assitinihu gedensaanni, ki'ne hedo'ya maatiro xa'me afate dagginanni. Ani Mootichu Kaaliiqi heeshshote Magano ikka'yanni xaareemmona, mittoreno xa'mitinaera dieemmo'ne.

³² Wole daga gede woy haqqenna kinna magansidhannori gede ikkate heddinoonni. Kayinni, kuni horonta di"ikkanno coyeti.

MAGANU QORICHANNA MARARROSI

³³ «Ani Mootichu Kaaliiqi heeshshote Magano ikka'yanni xaareemmona, jawaata anga'yanni, wolqaataame cigile'yanninna buwanno hanqi'yanni gashsheemmo'ne.

³⁴ Mittowa gamba asseemmo'ne; billaallitinoonni gobba baalantenni qole abbeemmo'ne. Jawaata anga'ya, wolqaataame cigile'yanna buwannohu hanqi'ya mageeshshihoro leellisheemmo'ne.

³⁵ Halallitte gobba dagannita haa're masseemmo'ne; hakkiicho ille'nenni la'inanna yoo yeemmo'ne.

³⁶ Halallitte gobbara Siina, annuwi'nera yoo yuummonte gede, ki'ne aanano yoo yeemmo. Konne coye coyi'roommohu ani Mootichu Kaaliiqaati.

³⁷ «Kunni ka'a siqqo'yanni allaaleemmo'ne; gondoori'ya giddora eesseemmo'ne.

³⁸ Haxawarritinoerenna mokkookkitinoere mereeri'nenni hooleemmo; xa heedhanno gobbanni fushshe hooleemmonsa. Kayinnilla, galagalte Israeelete gobba higgara diagureemmonsa; ani Kaaliiqa ikkoommota hakka waro affinanni» yiie.

³⁹ Mootichu Kaaliiqi, «Kuneeti xaano ki'ne Israeele ani yeemmota macciishsha gibbiniro, baxxinoonnire baala asse. Hadhine, kaphu magannano magansidhe; hakkunni gedensaanni kayinni, kaphu maganna'nera kakkalo shiqishshinanni qullaawa su'ma'ya dishollishshinanni.

⁴⁰ Hatte gobbara qullaawu jawiidi ilaali'ya Israeelennihura, ki'ne Israeele baalunku magansidhinannie; anino ki'nenni hagiidheemmo. Kakkalo'ne, fila fushshaate'nenna qullaawa afansha'ne adheemmo.

⁴¹ Billaallitinoonni gobbanni abbe mittowa gamba asseemmo'ne yannara, shilqinshanni kakkalo gede asse baxeemmo'ne; ani ki'nera qullaawa ikkoommota dagate leellisheemmo.

⁴² Akaakka'nera aammora xaaroommo gobba Israeele qole abbeemmo'ne yannara, ani Kaaliiqa ikkoommota affinanni.

⁴³ Assitinoonniha saalsiisanno coyenna umo'ne assitine batteessitinoonni gara, hakkiicho qaagginanni; assitinoonni bunshenni kainohunni, umo'ne cee'mitinanni.

⁴⁴ Ki'ne Israeele, bunshe'nenna bushu loosi'ne garinni ikkikkinni, su'mi'yara yee asseemmo'ne danchummanni ani Kaaliiqa ikkoommota affinanni. Konne coye coyi'roommohu ani Mootichu Kaaliiqaati» yii.

WODIIDINNI KA'ANNO GIIRA

⁴⁵ Kaaliiqi,

⁴⁶ «Koo manchi beetto, alba wodiidira higge lai; wodiidiranna wodiidi dubbira himana kuli.

⁴⁷ Wodiidi dubbirano, Mootichu Kaaliiqi, ‹Lai! Kuneeti ani giddokki giira qasammoraati; tini giirano shamanna moola baddukkinni haqqe baala ittanno; tenne giira xoyissannori dihee'ranno. Wodiidinni aliyye geeshsha iillitanno; hakkiira iillita geeshsha doogote xaaddure baala ittanno.

⁴⁸ Ani Kaaliiqi wodiidi dubbira giira qasoommotanna, tenne giirano xoyissara dandaannori nookkita mannu baalunku afanno› yiino yite kulisi» yiie.

⁴⁹ Ani kayinni, «Mooticha Kaaliiqa, ane konne coye assi yitootie! Mannu baalunku, ‹Hakku manchi maammaashsha callaho› yaanni gungumannoe» yoommo.