HIZIQEELI 17 - Qullaawa Maxaafa

LAMU ALLAMURCHINNA WOYINETE HAQQI LAWISHSHA

¹ Kaaliiqi,

² «Koo manchi beetto, Israeelootaho masalsite kulinsa.

³ Ani Mootichu Kaaliiqi insara yeemmore affanno gede kulinsa: Xuma baalluwanna hala'lado qoolla noosihu mittu jawu allamurchi no. Kuni allamurchino Libaanoosi Ilaallawa hige buuwi; mitte dagucho aana ofolle birxese hiiqqe haa'ri.

⁴ Hattenne hiiqqe haa'rino birxe daddalu gobba masse mittu katamira wori.

⁵ Hakkunni gedensaanni, Israeelete gobbanni fullo guma haa're, waa afi'ranni lophannowa mittowa shaqqado darga masse kaasi.

⁶ Kaashshu, hojja lophikkinni baattote aana hala'le denkeeki; sinnasino allamurchu widira ale higge lophitu. Rumuddasino baattote giddora raqqite e'u; kuni woyinete kaashshi lowo sinnanna lowo daro fushshi.

⁷ «Qoleno hala'lado qoollanna du'muulle baalluwa noosihu wolu jawu allamurchi no. Woyinete haqqi sinnanna rumudda hakku allamurchi waa abbannonsa gede hexxite isi widira higge lophitu.

⁸ Kayinnilla woyinete kaashshi umonni balaxe dancha gede late guma laala dandaannowa wayi nootera shaqqado baattora kaasame no.

⁹ «Kunnira, ani Mootichu Kaaliiqi xa'meemmohu konneeti: Kuni woyinete kaashshi lubbotenni hee'raranna lophara dandaannoni? Hakku umi allamurchi rumushshunku buqqise dihunanno? Gumma giggishshanninna sinna hiiqqaqqanni lattino darosi mooltanno gede diassanno? Ise buqqisate lowo wolqa woy wolqaataame olanto hasi'rannoni?

¹⁰ Ee, kaasamate woyite kaasantino; ikkollana, lubbotenni hee'ranna lopha dandiitannoni? Halalli diilallo gantannose yannara diqoortanno? Hakkiicho lophitanno darga moolte digattanno?» yiie.

LAWISHSHU TIRO

¹¹ Kaaliiqi,

¹² «Lawishshu tiro affinoro, hanni kuri haxawarroota Israeele xa'mi. Baabilooni moote Yerusaalame daye, mootenna ledosi gashshaano Baabilooni haa're ha'rinonsata kulinsa.

¹³ Yihudu moote mininni mitto adhe ledosi gondooro eino; ammanaminoha ikkannosi gede xaarsiisino. Wole egennamino mannano qafade adhe ha'ri.

¹⁴ Togo assinohu, mannu galagale gibbo kayisannokki gedenna gashshootuno eino gondooro diigikkinni hee'ranno gede assateeti.

¹⁵ Ikkollana, haaru Yihudu moote gibbo kayise, faradonna lowo olanto abbitannosi gede soqqamaano Gibitse soqqino. Ikkollana tini hedo wo'mitannosini? Kunni garinni xooqe fula dandaannoni? Gondooro diigannoha ikkiro, horonta gate fule diafanno.

¹⁶ «Ani Mootichu Kaaliiqi heeshshote Magano ikka'yanni xaareemmona, kuni moote ayirradu barcimira ofoshshiishinosihu Baabilooni moote ledo eino gondooro diigasinni mare Baabilooni reyanno.

¹⁷ Baabiloonootu katama horrate manna shitanno woyitenna bushsha duuntanno yannara, Gibitsete mootenna jawaata olantosi nafa mittore assa didandiitanno.

¹⁸ Xaaronna gondooro diigino; konne baala assino daafira, qorichishamikkinni gatanno doogo dinosi» yii.

¹⁹ Mootichu Kaaliiqi, «Heeshshote Magano ikka'yanni xaareemmona, agadheemmo yee su'mi'yanni xaare eino gondooro diiginohura, iso qorichisheemmo.

²⁰ Ugaaxannohu gede woshshaado wore amadeemmosi; anera ammanama hooginohura, Baabilooni masse qorichisheemmosi.

²¹ Filantinota bagadaanosi olu xawira shinanni; reyitukkinni gattannorino raga raga billaallitanno. Hatte yannara, konne coye coyi'roommohu ani Mooticha Kaaliiqa ikkoommota buuxxinanni» yii.

MAGANU UYINO HEXXO

²² Mootichu Kaaliiqi yaannohu konneeti: «Seeda dagucho birxenni, latino guunxicho hiiqqe haa'reemmo; masse seedu ilaali aana kaaseemmo.

²³ Hakkuno Israeelete noohu jawiidi ilaalaati; guunxono sinna fushshite guma laaltanno. Biifado daguchono ikkitanno; addi addi cea dagge aanase ofoltanno; sinnate aana mine mi'nitanno.

²⁴ Baattote aana noo haqqe baala, ani Kaaliiqa ikkoommota affanno. Ani seeddaanna haqqe murmure, harammaadda haqqe ale higge lophitanno gede asseemmo. Ani lattino haqqe mooshsheemmo; mooltino haqqeno latiseemmo. Ani Kaaliiqi konne coye coyi'roommo; asseemmo yoommoreno wonsheemmo» yii.